Genesis 21:1-7

Magandang Balita Biblia

Ang Kapanganakan ni Isaac

21 Pinagpala ni Yahweh si Sara at tinupad ang kanyang pangako. ² Ayon^(A) sa panahong sinabi ng Diyos, si Sara nga ay nagdalang-tao at nanganak ng isang lalaki, kahit matanda na noon si Abraham. ³ Isaac ang ipinangalan ni Abraham sa kanyang anak. ⁴ Ayon^(B) sa utos ng Diyos, tinuli ni Abraham ang bata walong araw pagkasilang nito. ⁵ Isandaang taon na si Abraham nang ipanganak si Isaac. ⁶ Sinabi ni Sara, “Nakakatawa ang ginawang ito sa akin ng Diyos at sinumang makarinig nito'y tiyak na matatawa rin.” ⁷ At sinabi pa niya, “Sa edad na iyon ni Abraham, sinong makakapagsabi sa kanyang ako'y mag-aalaga pa ng bata? Gayunman, nabigyan ko pa rin siya ng anak kahit siya'y matanda na.”