Mateo 15:22-29

Ang Biblia (1978)

²² At narito, ang isang babaing Cananea na lumabas sa mga hangganang yaon, at nagsisigaw, na nagsasabi, Kahabagan mo ako, Oh Panginoon, ikaw na ^(A)Anak ni David; ang aking anak na babae ay pinahihirapang lubha ng isang demonio.

²³ Datapuwa't siya'y hindi sumagot ng anomang salita sa kaniya. At nilapitan siya ng kaniyang mga alagad at siya'y pinamanhikan, na nangagsasabi, ^(B)Paalisin mo siya; sapagka't nagsisisigaw siya sa ating hulihan.

²⁴ Datapuwa't siya'y sumagot at sinabi, ^(C)Hindi ako sinugo kundi sa mga tupang nangaligaw sa bahay ni Israel.

²⁵ Datapuwa't lumapit siya at ^(D)siya'y sinamba niya, na nagsasabi, Panginoon, saklolohan mo ako.

²⁶ At siya'y sumagot at sinabi, Hindi marapat na kunin ang tinapay sa mga anak at itapon sa mga ^(E)aso.

²⁷ Datapuwa't sinabi niya, Oo, Panginoon: sapagka't ang mga aso man ay nagsisikain ng mga mumo na nangalalaglag mula sa dulang ng kanilang mga panginoon.

²⁸ Nang magkagayo'y sumagot si Jesus at sinabi sa kaniya, Oh babae, ^(F)malaki ang pananampalataya mo: mangyari sa iyo ayon sa ibig mo. At gumaling ang kaniyang anak mula sa oras na yaon.

²⁹ At umalis si Jesus doon, at ^(G)naparoon sa tabi ng dagat ng Galilea; at umahon sa bundok, at naupo doon.