Mga Bilang 26:57-62

Magandang Balita Biblia

Ang Lipi ni Levi

⁵⁷ Ang lipi naman ni Levi ay binubuo ng mga angkan nina Gershon, Kohat, at Merari. ⁵⁸ Kabilang din sa liping ito ang mga sambahayan ni Libni, Hebron, Mahli, Musi at Korah. Si Kohat ang ama ni Amram, ⁵⁹ na napangasawa ni Jocebed na kabilang din sa lipi ni Levi. Isinilang si Jocebed sa Egipto. Naging anak nila sina Aaron, Moises at Miriam. ⁶⁰ Naging^(A) anak naman ni Aaron sina Nadab, Abihu, Eleazar at Itamar. ⁶¹ Sina^(B) Nadab at Abihu ay namatay nang sila'y gumamit ng apoy na di karapat-dapat kay Yahweh. ⁶² Lahat-lahat, ang natala sa lipi ni Levi ay 23,000, mula sa gulang na isang buwan pataas. Sila'y hindi kabilang sa talaan ng Israel sapagkat hindi sila kasama sa paghahati ng lupain.