Jesus Guys 8-12

Hawai‘i Pidgin

8 Da guy Saul stay dea, an he tink dass good dey wen kill Stephen.

Saul Make Jesus Guys Suffa

Dat same day dey wen start fo make all da peopo suffa plenny dat wen come togedda fo church Jerusalem side. So all da peopo dat wen trus da Good Stuff From God wen go all ova Judea an Samaria. But da twelve guys Jesus wen send neva go way. ² Some guys dat trus God an do wat he say wen bury Stephen, an dey sad an crying real hard cuz he wen mahke.

³ But da guy Saul wen start fo wipe out da peopo dat come togedda fo church. He wen go inside all da houses, an he drag away da guys an da wahines, an throw dem inside da jail.

Philip Teach Da Good Stuff Samaria Side

⁴ Jesus guys dat wen go all ova wen teach wat God say inside all da places dey wen go. ⁵ Philip wen go one big town inside Samaria, an teach da peopo ova dea bout da Spesho Guy God Wen Send. ⁶ All da peopo dea wen hear Philip, an dey wen see all da awesome stuff he wen do dat show wat kine guy him, so den dey wen listen real good to da stuff he wen say. ⁷ Plenny bad kine spirits wen make big noise an let go plenny peopo. Plenny peopo dat no can move an no can walk wen come good. ⁸ So everybody dat town wen come real, real good inside.

Simon da Kahuna Guy

⁹ Had one guy name Simon dea dat wen make kahuna dat town. An all da Samaria kine peopo, wen blow dea minds cuz a him. He wen say he one big shot, aah. ¹⁰ All da big guys an da odda peopo wen listen to him real good an say, “Dis guy, he da guy dey name ‘Da Big Power From God.’ ” ¹¹ Dey wen stick wit him cuz he stay blow dea minds long time, cuz he wen make da kahuna kine stuff. ¹² But Philip wen teach da peopo dea da Good Stuff bout how peopo can get God fo dea King, an dat Jesus, he da Spesho Guy God Wen Send. So da guys an da wahines wen trus wat Philip wen say, an he wen baptize dem. ¹³ Simon, he wen trus Jesus too, an Philip wen baptize him. An Simon wen stick wit Philip all da places he wen go. Philip wen do all kine awesome stuff dat show da power he get, an wen blow Simonʼs mind.

¹⁴ Da guys Jesus wen send, dey wen stay Jerusalem side. Dey wen hear dat da peopo Samaria side wen trus wat God wen say. So dey wen send Peter an John ova dea by dem. ¹⁵ Wen Peter an John come, dey wen pray fo da peopo, so dey can get Godʼs Spesho Spirit. ¹⁶ Cuz Godʼs Spesho Spirit neva take charge a da peopo dea yet. Dey wen get baptize cuz a da One name Jesus ony. ¹⁷ Den Peter an John wen put dea hands on top everybody, an den Godʼs Spesho Spirit wen take charge a dem.

¹⁸ Simon wen see dat Godʼs Spesho Spirit wen take charge a da peopo wen da guys Jesus wen send wen put dea hands on top dem. He wen try give dem money, an he say, ¹⁹ “You can give me da power too, so dat wen I put my hands on top da peopo, Godʼs Spesho Spirit goin take charge dem?”

²⁰ Peter wen tell him, “You an yoa money goin mahke togedda! Cuz you tink dat you can buy Godʼs gif wit yoa money! ²¹ You no can work fo God wit us, cuz God see yoa heart no stay right. ²² You betta come sorry cuz a dis real bad ting you wen do, an aks da Boss if he can hemo you from da bad kine stuff you tinking! ²³ Cuz I know you stay real jealous an nuha deep inside, an you stay all tie up wit da kine stuff dat no stay right.”

²⁴ Den Simon wen tell Peter an John, “You can pray to da Boss fo me, so dat all dis stuff dat you wen say no happen to me?”

²⁵ Den Peter an John wen tell da peopo wat God wen do fo dem, an dey wen teach wat God wen say. Den wen dey going back Jerusalem side, dey wen teach da Good Stuff From God inside plenny small towns Samaria side.

Philip An Da Guy From Etiopia

²⁶ One angel guy from da Boss wen tell Philip, “Go sout to da road inside da boonies dat go from Jerusalem to Gaza.” ²⁷ So Philip wen go, an he come by one eunuch guy dat no can marry from Etiopia. He one real importan guy dat stay in charge a all da money fo Queen Candace from Etiopia side. Dis guy wen go Jerusalem fo go down an pray to God. ²⁸ Now he going home, an he sitting inside his carriage. He was reading da book dat Isaiah wen write, da guy dat wen talk fo God befo time. ²⁹ Godʼs Spesho Spirit wen tell Philip, “Go by dat carriage, an stay near um.” ³⁰ Philip wen run ova dea, an hear da guy reading Isaiahʼs book. Philip wen aks da guy, “You undastan wat you reading, o wat?”

³¹ Da Etiopia guy wen say, “I no can undastan um if nobody tell me wat dis mean.” Den he tell Philip fo climb inside da carriage an sit down by him. ³² Da place inside da Bible wea he wen read say,

³⁴ Da guy wen tell Philip, “Please, tell me who Isaiah stay talking bout. He talking bout himself o one nodda guy?” ³⁵ Den Philip wen teach him. He wen start in dat place wea da guy was reading inside da Bible, an wen tell him da Good Stuff Bout Jesus. ³⁶ Dey stay going on da road, an dey come by some water. An da guy wen say, “Look ova dea! Get water. You can baptize me, yeah?”

³⁷ [Philip wen tell him, “I can baptize you if you trus God inside yoa heart fo real kine.”

Da guy wen say, “I trus dat Jesus, he da Spesho Guy God Wen Send. He Godʼs Boy.”] ³⁸ Da guy wen tell his worka guy fo make da carriage stay dea. Den Philip an da guy wen go down inside da water, an Philip wen baptize him. ³⁹ Wen dey wen come outa da water, right den an dea da Bossʼs Spesho Spirit wen take Philip away. Da eunuch guy neva see Philip any moa, but he wen stay going an he feel real good inside. ⁴⁰ Den Philip wen show up Azotus side, an he wen go all da towns, teaching da Good Stuff From God. An den he go Cesarea side.

Saul Wen Change

9 Saul still yet stay telling da peopo dat stay tight wit da Boss dat he goin kill dem. He wen go da Head Priest guy ² an wen tell him fo write lettas fo da Jewish churches Damascus side, so dat if he find some guys o wahines ova dea dat stick wit da Stuff bout Jesus, he can take dem inside da prison Jerusalem side.

³ Saul stay going on da road, an come near Damascus. An you know wat? Right den an dea one light from da sky wen flash aroun him. ⁴ He wen fall down on top da groun, an hear one voice telling him, “Eh, Saul! Saul! How come you making me suffa?”

⁵ Saul wen aks, “Who you, Boss?”

Da voice wen say, “I Jesus, da Guy you stay make suffa. ⁶ Now stand up an go inside da town, an somebody goin tell you wat you gotta do.”

⁷ Da guys dat wen go wit Saul wen stay dea an neva say notting. Dey wen hear da voice, but dey neva see nobody. ⁸ Saul wen stand up, but wen he wen open his eyes, he no can see notting. So dey wen take him by da hand an dey all wen go inside Damascus. ⁹ Fo three days he no can see notting. An all dat time he neva drink o eat notting.

¹⁰ Inside Damascus had one guy name Ananias dat wen stick wit da Good Stuff Bout Jesus. He wen see someting jalike one dream wea da Boss wen tell him, “Ananias!”

He say, “Yeah, Boss?”

¹¹ Da Boss wen tell, “Go da guy Judas house on Strait Street, an tell him you like talk to one guy name Saul from Tarsus. He stay praying ova dea. ¹² He wen dream an he see one guy name Ananias come an put his hands on top him an den his eyes come good again.”

¹³ Ananias say, “Boss, I hear bout dis guy plenny times. He do plenny bad kine stuff to da peopo Jerusalem side dat stay spesho fo you. ¹⁴ An da main priest guys wen give him power, an he wen come ova hea fo bus all da peopo dat aks you fo help dem.”

¹⁵ But da Boss wen tell Ananias, “Go! I wen pick dis guy fo tell who me to da peopos dat not Jews an dea kings an to da Israel peopo too. ¹⁶ An I goin show him how plenny he goin suffa cuz he my guy.”

¹⁷ Den Ananias wen go da house wea Saul stay, an go inside. He wen put his hands on top Saul, an say, “Brudda Saul, Jesus da Boss, da One dat wen show up by you wen you stay on da road coming ova hea, he wen send me by you, so you can see again, an so His Spesho Spirit goin take charge a you.” ¹⁸ Right den an dea someting jalike scales wen fall down from Saulʼs eyes, an he wen see again. He wen stand up, an Ananias wen baptize him. ¹⁹ Afta dat he wen eat, an come strong again.

Saul Tell Da Good Stuff Bout Christ Damascus Side

Saul wen stay litto wile inside Damascus wit da peopo dat trus Jesus. ²⁰ Right den an dea he wen start fo tell da peopo inside da Jewish churches dat Jesus, he Godʼs Boy. ²¹ All da peopo dat wen hear Saul, wen blow dea minds, an dey wen tell, “Eh, wass dis? Dis da guy dat wen wipe out da peopo in Jerusalem dat aks da One name Jesus fo help um, yeah? An he wen come ova hea fo take dem to da main priest guys an throw dem inside jail, yeah?” ²² But Saul wen teach wit mo an mo power, an da Jewish peopo dat wen stay Damascus side wen come all mix up, cuz he show proof dat Jesus, he da Spesho Guy God Wen Send.

²³ Plenny days lata, da Jewish guys wen come togedda fo talk how dey can kill Saul. ²⁴ But Saul wen hear bout dat. Da Jewish guys stay watch da gates fo da town day an nite, so dey can kill him. ²⁵ But nite time da guys dat wen stick wit Saul, wen put him inside one big basket, an wen let him down thru one puka in da wall nite time.

Saul Go Jerusalem

²⁶ Saul go Jerusalem, an try fo go by da odda guys dat stick wit Jesus, but dey all scared him. Dey neva trus him dat he really stay tight wit Jesus. ²⁷ But Barnabas, he wen take Saul an bring him by da guys Jesus wen send. He tell um dat Saul wen see da Boss Up Dea Inside Da Sky wen he stay going Damascus side, an da Boss wen talk to him. An inside Damascus he no scared fo use Jesus name fo do stuff. ²⁸ Dass why Saul wen stay ova dea wit dem, an wen go all ova inside Jerusalem. He no scared fo use da Boss name ova dea too fo do stuff. ²⁹ He talk wit da Jewish guys dat talk Greek, an wen try fo show um dat da Good Stuff Bout Jesus stay fo real. But dey wen make plan fo kill him. ³⁰ Wen da bruddas wen find out bout dat, dey wen take Saul Cesarea side, an send him away Tarsus side.

³¹ Dat time nobody wen bodda da peopo dat wen come togedda fo church all ova Judea, Galilee, an Samaria. Dey wen trus God mo an moa, an Godʼs Spesho Spirit wen kokua dem. Mo an mo peopo wen trus da Good Stuff Bout Jesus. An everyting dey wen do, dey do um an get respeck fo God.

Peter Go Lydda Side an Joppa Side

³² Peter wen go all ova dat place, an he wen go stay Lydda side wit da peopo dat stay spesho fo God ova dea. ³³ Had one guy ova dea name Eneas. He one guy dat no can move. An he neva can get off his bed fo eight years. ³⁴ Peter wen meet him an tell um, “Eh, Eneas, Jesus, da Spesho Guy God Wen Send, he make you come good. Stand up an make yoa bed good.” Right den an dea Eneas wen stand up. ³⁵ All da peopo dat stay Lydda side an Sharon side wen see um, an dey all wen trus da Boss right den an dea.

Da Wahine Name Dorcas

³⁶ Had one wahine dat wen trus Jesus inside Joppa town. Her name Tabita. (In Greek talk her name Dorcas. Dat mean “one deer.”) Everytime she do good tings an help da poor peopo. ³⁷ Dat time she wen come sick an wen mahke. Dey wen wash her body, an put um inside one room upstairs. ³⁸ Lydda town stay near Joppa. Wen da guys dat stick wit Jesus wen hear dat Peter stay Lydda side, dey send two guys by him fo beg um, “Try come now!” ³⁹ Peter wen go wit dem, an wen he come, dey take him upstairs to da room. All da widows stand aroun him, crying an showing him da shirts an coats Dorcas wen make wen she wen stay wit dem. ⁴⁰ Peter tell dem all fo go outside. Den he wen go down on his knees an pray. He wen turn aroun by da mahke wahine, an say, “Eh Tabita! Stand up!” She wen open her eyes, an spock Peter, an wen sit up. ⁴¹ He wen take her hand an wen help her stand up. An he tell Godʼs peopo an da widows fo come, an he show um dat she stay alive. ⁴² All da peopo Joppa side wen hear bout dat, an plenny peopo wen trus da Good Stuff bout da Boss. ⁴³ Peter wen stay Joppa side long time inside Simonʼs house, one guy dat work wit da leather.

Peter An Cornelius

10 Had one guy Cesarea side name Cornelius. He one captain fo six hundred Rome army guys from Italy. ² Him an his ohana, dey not Jewish, but dey all pray an get respeck fo God. He wen give plenny money fo da poor peopo, an everytime he pray to God. ³ One time, three clock in da aftanoon, he wen see someting jalike one dream. He see one angel messenja guy from God dat wen come by him an say, “Eh, Cornelius!” ⁴ Cornelius wen look at um real good, an wen come real scared. He say, “Yeah, Boss?”

Da angel guy say, “God hear wat you wen aks him fo do, an he rememba all da money you wen give fo da poor peopo. ⁵ Now send some guys Joppa side fo bring back one guy name Simon, da same guy dey wen call Peter. ⁶ He stay in da odda Simonʼs house by da sea, da guy dat work wit da leather.” ⁷ Wen da angel guy go way, Cornelius wen call two a his worka guys an one army helpa. Da helpa guy pray an get respeck fo God too. ⁸ Cornelius wen tell dem all da stuff dat wen happen, an wen send da three guys Joppa side.

⁹ Da nex day, noon time, dey stay coming near Joppa. Dat time Peter wen go up on top da flat roof fo pray. ¹⁰ He wen come hungry an like eat. Dey stay making da food ready, an he see someting jalike one dream. ¹¹ He see da sky open up, an one ting jalike one big sheet, dat come down on top da groun by da four corners. ¹² Inside had all kine animals, da kine dat get four feet, an snakes an lizards from da groun, an birds from da sky. ¹³ Den one voice wen tell him, “Eh Peter! Stand up! Kill um an eat um!”

¹⁴ But Peter wen say, “No way, Boss! I neva eat anyting dat stay kapu an not suppose to eat um!”

¹⁵ One mo time da voice wen tell um, “No say dat da kine stay kapu dat God wen make okay.” ¹⁶ An dat wen happen three times, an right den an dea da sheet wen go back up to da sky.

¹⁷ Peter was tinking wat da dream mean. Right den an dea da guys dat Cornelius wen send, wen find out da house wea Simon da leather guy stay, an dey stop in front da gate fo da house. ¹⁸ Dey yell, “Eh, get one guy name Simon Peter ova hea?”

¹⁹ Peter still trying fo figga out wat da dream mean, an Godʼs Spirit wen tell him, “Simon, get three guys dat not Jewish, stay downstairs looking fo you. ²⁰ So stand up an go down dea. Go wit dem an no worry, cuz was me wen bring um.” ²¹ Peter wen go down an wen tell um, “I da guy you stay looking fo. How come you hea?”

²² Da guys say, “Captain Cornelius wen send us. He one good guy dat get respeck fo God, an all da Jewish peopo get respeck fo Captain Cornelius. One spesho angel guy from God wen tell him fo bring you by his house so he can hear wat you get fo say.” ²³ Den Peter wen tell da guys fo come inside an make house.

Da nex day Peter wen go wit da guys, an some a da bruddas from Joppa wen go too. ²⁴ Da nex day dey wen come Cesarea. Cornelius stay wait fo dem, an he tell his ohana an his good friends fo come his house. ²⁵ Wen Peter go inside da house, Cornelius go in front him, an go down on his knees, cuz he get plenny respeck fo him. ²⁶ But Peter tell um, “Stand up. I ony one guy, you know.” ²⁷ Peter stay talking to him, an dey go inside da house. He see plenny peopo ova dea. ²⁸ He tell um, “You guys know dat our Jewish Rules say dat one Jewish guy no can stay togedda wit one guy dat not Jewish, an da Jewish guy no can go inside da odda guyʼs house. But God wen show me dat I no can say one guy stay kapu. ²⁹ So wen da guys wen tell me fo come ova hea, I wen come lidat, an I neva say I no can. So try tell me why you wen tell me fo come.”

³⁰ Cornelius say, “Three days ago I stay praying inside my house, same time like now, three clock in da aftanoon. An right den an dea one guy in da shiny kine clotheses wen stand in front me. ³¹ An he say, ‘Cornelius, God wen hear wat you pray, an he know bout all da money you wen give fo da poor peopo. ³² Send some guys Joppa side fo find Simon, da same guy dey call Peter. He stay inside Simonʼs house by da sea, da guy dat work wit da leather.’ ³³ So right den an dea I wen send dem fo bring you, an you get good heart fo come my house. Now we all stay hea in front God, an we like hear all da stuff God wen tell you fo tell us.”

Wat Peter Say

³⁴ Den Peter wen start fo talk. He tell um, “Now I know dat stay true dat God tink an do da same ting fo everybody. ³⁵ He take everybody in from all da peopos dat get respeck fo him an do da right ting. ³⁶ Dis da Good Stuff dat God wen send peopo fo tell da Israel peopo: ‘Eh! Us guys can come Godʼs friends an feel good inside, cuz a wat Jesus Christ wen do. He da Boss fo everyting an everybody.’ ³⁷ You guys know wat wen happen all ova Judea. First da guy John wen tell da peopo in Galilee fo get baptize. ³⁸ An God wen give Jesus from Nazaret his Spesho Spirit an power. Jesus wen go all ova da place, an do da good kine stuff. Da Devil wen take charge a plenny sick peopo wit his power, but Jesus wen even make dem all come good. Jesus wen do dat cuz God wen stay wit him. ³⁹ Us guys wen see all dis stuff happen. He wen do all dat in da Jewish countryside an inside Jerusalem. Dey wen kill him on top one cross. ⁴⁰ Day Numba three God wen make him come back alive, an wen let some peopo see him. ⁴¹ All da peopo neva see um, but us guys dat God wen pick fo tell bout him, we wen see um. We wen eat an drink wit him afta he wen come back alive. ⁴² He tell us fo teach da peopo an fo tell dem dat we know he da One dat God Wen Send fo judge da peopo dat stay alive an da peopo dat stay mahke. ⁴³ All da guys dat wen talk fo God long time ago wen talk bout him. Dey say dat whoeva trus him, God goin let um go an hemo dea shame fo all da bad kine stuff dey wen do. God goin do dat cuz a wat Jesus wen do.”

Da Peopo Dat Not Jews Get Godʼs Spesho Spirit

⁴⁴ Wen Peter still talking lidat, Godʼs Spesho Spirit wen take charge a all da peopo dat wen hear da Good Stuff From God. ⁴⁵ Da Jewish guys dat trus Jesus an wen come wit Peter, wen blow dea minds, cuz Godʼs Spesho Spirit wen take charge a even da peopo dat not Jews. ⁴⁶ Cuz dey hear um talking in odda languages an saying good stuff bout God. ⁴⁷ Den Peter say, “Dese guys, dey can get baptize wit water, yeah? Dey get Godʼs Spesho Spirit, jalike da time wen we wen get um.” ⁴⁸ So he wen tell um fo get baptize cuz a da One name Jesus, da Spesho Guy God Wen Send. An dey tell Peter fo stay dea wit dem some moa.

Peter Talk To Da Church Guys Inside Jerusalem

11 Da guys Jesus wen send an da bruddas an sistas all ova Judea side wen hear, dat some a da peopo dat not Jews wen trus wat God wen say too. ² Wen Peter go Jerusalem, da Jewish bruddas dat trus da Good Kine Stuff Bout Christ wen squawk at him. ³ Dey say, “You go by some peopo dat not Jews, an wen go inside dea house, an eat wit dem.” ⁴ Den Peter wen tell um all da stuff dat wen happen from da start.

⁵ He say, “I wen stay Joppa town, an I wen pray. I see someting jalike one dream. Had one big sheet dat come down from da sky by da four corners, an wen come down wea I stay. ⁶ I wen look inside um real good, an see all kine animals from da earth dat get four feet, wild animals, snakes, lizards, an birds. ⁷ Den I hear one voice dat say, ‘Eh Peter! Stand up! Kill um an eat um!’ ⁸ But I say, ‘No way, Boss. I neva eat notting dat stay kapu, o dat I not suppose to eat.’ ⁹ Da voice from da sky wen talk again, an say, ‘No say someting stay kapu dat God wen make okay.’ ¹⁰ Dat wen happen three times, an den da sheet wen go up to da sky again.

¹¹ Right den an dea three guys wen come by da house wea I stay. One nodda guy wen send um by me from Cesarea. ¹² Godʼs Spirit wen tell me, ‘No scared fo go wit dem now.’ Dese six bruddas hea, dey wen go wit me Cesarea side. An we wen go inside da guy Cornelius house. ¹³ Den he wen tell us dat one angel messenja guy wen come by his house an say, ‘Send some guys Joppa town fo bring back one guy name Simon dat dey call Peter. ¹⁴ He goin tell you da Good Stuff from me, so dat you an all yoa ohana can come outa da bad kine stuff you stay doing.’ ¹⁵ Wen I start fo talk, Godʼs Spesho Spirit wen take charge a dem, jalike he wen take charge a us at da start. ¹⁶ Den I rememba wat da Boss Jesus wen say, ‘John wen baptize da peopo wit water, but God goin baptize you guys diffren kine: he goin let his Spesho Spirit take charge a you.’ ¹⁷ So, if God give dem da same power he wen give us wen we trus da Boss Jesus, da Spesho Guy God Wen Send, how can I make big noise agains God?”

¹⁸ Wen dey hear dat, dey pau squawk, an dey tell how awesome God stay. Dey say, “Wow! God even let da peopo dat not Jews come sorry fo all da bad kine stuff dey wen do, so dey can get new kine life too!”

Da Peopo Dat Come Togedda Fo Church Inside Antiok

¹⁹ Now, da bruddas an sistas dat wen go all ova da place afta Stephen wen mahke, dey wen go all da way Fonicia, Cyprus, an Antiok, cuz Saul dem wen make da peopo dat trus Jesus suffa. An dey wen tell da Good Stuff From God, but dey ony wen tell da Jewish peopo. ²⁰ But some a dem guys dat come from Cyprus an Cyrene, wen go Antiok, an wen start fo talk to da peopo dea dat talk Greek. Dey wen tell um da Good Stuff Bout Jesus da Boss. ²¹ Da Boss wen help dem, an plenny peopo wen start fo trus him.

²² Da peopo dat wen come togedda fo church inside Jerusalem wen hear bout dat, an dey wen send Barnabas Antiok side. ²³ Wen he come, he see dat God wen do plenny good tings fo dem. He wen stay good inside, an wen give dem good kine words fo stick wit da Boss Jesus, an trus him wit all dea heart. ²⁴ Barnabas, he one good guy. Godʼs Spesho Spirit stay in charge a him, an he stay trus da Boss plenny. An he wen bring plenny mo peopo fo trus da Boss Jesus.

²⁵ Den Barnabas wen go Tarsus fo look fo da guy Saul. ²⁶ He wen find him, an wen bring him Antiok. Barnabas an Saul wen stay togedda wit da odda bruddas an sistas dat come togedda fo church ova dea, an dey wen teach plenny peopo fo one year. Antiok was da first place wea odda peopo wen start fo call Jesus peopo “Christian.” Dat mean, “Christ kine peopo.”

²⁷ Dat time some guys dat talk fo God wen come from Jerusalem to Antiok. ²⁸ One a dem guys name Agabus wen stand up an Godʼs Spirit wen tell um fo say, “Goin get hard time all ova, wea eva da Rome peopo stay in charge. No goin get food notting.” (An dat wen happen wen Cesar Claudius wen stay da big king.) ²⁹ Da peopo dat wen stick wit Jesus wen tink fo help da bruddas an sistas dat wen stay Judea side. An every guy wen give um wat he can. ³⁰ Dey wen do dat, an dey wen send da gifs to da older leadas inside da church ova dea, an Barnabas an Saul wen take da money ova dea fo dem.

Jesus Peopo Suffa Moa

12 Az was bout dis time dat King Herod wen bus some a da church peopo fo make um suffa. ² He make his guys kill Johnʼs brudda James, wit one sword. ³ Wen he wen know dat wen make da Jewish peopo stay good inside, he wen bus Peter too. Dis wen happen wen da Jewish peopo was making da spesho religious time fo da Bread Dat No Mo Yeast. ⁴ Afta he bus Peter, he put um inside jail, an put sixteen security guards dea so dey can watch um. Herod wen tink fo bring Peter in front da judge an all da peopo afta da Passova. ⁵ So Peter wen stay inside da jail, but all da church peopo wen pray real hard fo him.

Peter Come Outa Jail

⁶ Da nite befo dey goin go bring Peter in front da judge, he was sleeping. He was all tie up wit two chains, an he had one guard on da left side an one guy on da right side. An odda guards, dey standing by da door. ⁷ Right den an dea one angel messenja guy from da Boss Up Dea wen show up, an one light wen shine inside da place. Da angel guy wen shake Peter on da side an wake um up. He say, “Hurry up! Stand up!” An da chains wen fall down from Peterʼs hands. ⁸ Den da angel guy wen tell um, “Put on yoa odda clotheses an yoa slippas.” An Peter wen do um. Den da angel guy say, “Put on yoa coat an come wit me.” ⁹ Peter wen go wit him outside da jail, but he neva know if was fo real wat da angel guy doing. He wen tink he stay seeing someting jalike one dream. ¹⁰ Dey wen pass by da first guard, an da nex guard, an wen come by one iron gate dat take dem outa da jail fo go inside Jerusalem. Da gate wen open all by itself fo dem, an dey wen go inside Jerusalem. Afta dey wen walk down one street, den da angel guy wen go way.

¹¹ Den Peter wen figga wat wen happen, an he tink, “Now I know I no stay dreaming! Dis fo real! Da Boss Up Dea wen send his angel guy fo take me away from King Herodʼs power, an from all da stuff da Jewish peopo wen tink fo do to me.”

¹² Wen Peter figga dis, he come by Maryʼs house. She John Markʼs mudda. Plenny peopo wen go ova dea fo pray. ¹³ Peter wen knock on da gate, an one helpa girl name Rhoda wen go fo see who stay dea. ¹⁴ Wen she hear Peterʼs voice, she wen come plenny good inside, an den she wen run back da house, but neva open da gate. She say, “Eh! Peter stay by da gate!” ¹⁵ Dey wen say, “You pupule!” But she still stay telling um, “He stay outside fo real!” Den dey say, “Nah! Must be his angel guy!”

¹⁶ But Peter still stay knocking on da gate, an wen dey wen open da gate an see um, dea jaws wen drop. ¹⁷ Peter wen wave his hand fo dem fo no talk, an he wen tell um dat da Boss Up Dea wen bring him outside da jail. He say, “Go tell da odda James an all da bruddas bout dis.” An den he wen go one nodda place.

¹⁸ In da morning, wen get one big noise wit da guards. Dey tell, “Eh, wat happen? Wea da guy Peter stay?” ¹⁹ Dey go tell King Herod, an he wen tell um fo look all ova fo him. But dey no can find um. Herod wen aks da guards dat was watching Peter wat wen happen. Den he wen tell da odda guys fo kill da guards.

Latas King Herod wen go from Judea to Cesarea, an wen stay ova dea litto wile.

King Herod Mahke

²⁰ King Herod wen stay huhu wit da peopo Tyre side an Sidon side. So dey all wen come fo talk wit Herod. Da peopo wen come friends wit Blastus, Herodʼs helpa guy, an he wen help um so dey can talk to Herod. Dey wen like make friends wit King Herod, cuz dea food stay come from him.

²¹ Da day wen come, an Herod wen wear his fancy kingʼs clotheses. He sit down on top his throne, an wen make one big talk to da peopo. ²² Da peopo wen yell, “Dis one god talking, not one guy talking!” ²³ But King Herod neva say notting. So right den an dea, cuz Herod neva talk good bout God an tank him, one angel guy from da Boss Up Dea wen wack him, an da worms wen eat um, an he wen mahke.

²⁴ Den mo an mo peopo all ova da place wen trus wat God say.

²⁵ Wen Barnabas an Saul wen do all da stuff God wen send um fo do, dey wen come back Antiok from Jerusalem. An dey wen bring John Mark wit dem.