Job 25-27

Ang Pulong Sa Dios

Ang Tubag ni Bildad

25 Unya mitubag si Bildad nga taga-Shua, ² “Gamhanan ug talahuron ang Dios. Gipatunhay niya ang kalinaw sa kalangitan. ³ Maihap ba ang iyang mga sundalo? May dapit ba nga wala madan-agi sa iyang kahayag? ⁴ Unsaon pag-ingon sa usa ka tawo nga matarong siya atubangan sa Dios? Aduna bay natawo nga hinlo? ⁵ Bisan ang bulan ug ang mga bitoon dili man gani hayag sa iyang panan-aw, ⁶ unsa pa kaha ang tawo nga sama lang sa usa ka ulod.”

Ang Tubag ni Job

26 Unya mitubag si Job, ² “Pagkadako gayod sa tabang nga imong gikahatag kanako—ako nga huyang ug walay gahom! ³ Pagkamaayo mong motambag kanakong walay kaalam! Pagkamaalamon mo gayod! ⁴ Diin ba gikan kining imong gipanulti? Kang kinsang espiritu ang nagtudlo kanimo sa pagsulti niini?

⁵ “Nagkurog sa kahadlok ang mga patay sa ilang nahimutangan didto ilalom sa tubig. ⁶ Dayag gayod sa Dios ang dapit sa mga patay. Walay makatabon sa lugar sa kalaglagan. ⁷ Ginabuklad sa Dios ang kalangitan sa amihan ibabaw sa hawan nga lugar, ug gisab-it niya ang kalibotan sa kawanangan. ⁸ Ginaputos niya ang ulan sa bagang dag-om, apan ang dag-om wala mabusbos bisan bug-at kini. ⁹ Ginatabonan niya sa dag-om ang takdol nga bulan.^{[a] 10} Naghimo siyag utlanan sa langit ug sa yuta, ingon man ang utlanan sa kahayag ug sa kangitngit. ¹¹ Sa iyang pagbadlong, mangatay-og ang mga pundasyon sa langit. ¹² Pinaagi sa iyang gahom gikutaw niya ang dagat, ug sa iyang kaalam gilaglag niya ang dragon nga si Rahab. ¹³ Sa iyang paghuyop mohayag ang langit, ug sa iyang gahom gipatay niya ang nagaikyas nga dragon. ¹⁴ Ginagmay lang kini sa iyang mga binuhatan. Daw hunghong lang kini nga atong madungog kaniya. Kinsa man karon ang makatugkad sa pagkagamhanan sa Dios?”

27 Nagpadayon si Job sa pagsulti, ² “Ipanumpa ko sa buhi nga Makagagahom nga Dios nga naghikaw kanako sa hustisya ug nagpasakit kanako. ³ Samtang nagaginhawa pa ako, ug gitugotan pa ako sa Dios nga mabuhi, ⁴ dili gayod ako mosulti ug daotan ug dili gayod ako mamakak. ⁵ Dili gayod ako mouyon nga husto kamo. Hangtod sa akong kamatayon, moinsister gayod ako nga inosente ako. ⁶ Barogan ko gayod nga matarong ako, ug dili gayod ako moundang. Samtang buhi ako, limpyo ang akong konsensya.

⁷ “Hinaut nga silotan sa Dios ang mga nakigbatok kanako sa silot nga angay sa mga tawong daotan. ⁸ Kay unsa pay paglaom sa tawong dili diosnon kon kuhaon na sa Dios ang iyang kinabuhi? ⁹ Mamati ba ang Dios sa iyang pagpangayo ug tabang kon ang katalagman moabot kaniya? ¹⁰ Malipay kaha siya uban sa Makagagahom nga Dios? Manawag kaha siya sa Dios sa tanang panahon?

¹¹ “Tudloan ko kamo mahitungod sa gahom sa Makagagahom nga Dios. Dili ko itago kaninyo ang iyang mga pamaagi. ¹² Apan kamong tanan nakakita niini. Nganong gisultihan pa man ninyo ako niining mga butang nga walay pulos?

¹³ “Mao kini ang gitakda sa Dios nga Makagagahom nga dangatan sa daotan ug mabangis nga mga tawo: ¹⁴ Bisan daghan pa siyag mga anak, ang uban kanila mamatay sa gira o sa kagutom. ¹⁵ Ang mahibilin kanila mamatay sa sakit, ug walay magsubo sa ilang haya, bisan ang ilang mga asawa.

¹⁶ “Bisag magtigom pa ug daghan kaayong pilak ug bisti ang tawong daotan, ¹⁷ dili siya ang makapahimulos niini. Ang matarong ug inosenteng mga tawo ang mosul-ob sa iyang mga bisti, ug bahinon nila ang iyang pilak. ¹⁸ Ang gipatindog niya nga balay sama kahuyang sa balay sa lawalawa o sa payag-payag sa magbalantay sa uma. ¹⁹ Mohigda siya nga adunahan, apan pagmata niya wala na ang tanan niyang bahandi. ²⁰ Moabot kaniya ang kahadlok nga daw baha, ug paliron siya sa makusog nga hangin sa panahon sa kagabhion. ²¹ Paliron siya sa hangin nga gikan sa sidlakan, ug mahanaw siya sa iyang gipuy-an. ²² Mohuyop kini kaniya nga walay kalooy samtang naningkamot siya sa pag-ikyas gikan sa gahom niini. ²³ May mamakpak ug managhoy sa pagtamay kaniya tungod kay nahanaw na siya sa iyang pinuy-anan.”