ಮತ್ತಾಯ 1

Kannada Holy Bible: Easy-to-Read Version

ಯೇಸುವಿನ ವಂಶಾವಳಿ

(ಲೂಕ 3:23-38)

1 ಯೇಸು ಕ್ರಿಸ್ತನ ವಂಶಾವಳಿಯಿದು. ಆತನು ದಾವೀದನ ವಂಶದವನು. ದಾವೀದನು ಅಬ್ರಹಾಮನ ವಂಶದವನು.

²ಅಬ್ರಹಾಮನು ಇಸಾಕನ ತಂದೆ.

ಇಸಾಕನು ಯಾಕೋಬನ ತಂದೆ.

ಯಾಕೋಬನು ಯೆಹೂದ ಮತ್ತು ಅವನ ಸಹೋದರರ ತಂದೆ.

³ಯೆಹೂದನು ಪೆರೆಚನ ಮತ್ತು ಜೆರಹನ ತಂದೆ. (ಅವರ ತಾಯಿ ತಾಮರಳು.)

ಪೆರೆಚನು ಹೆಚ್ರೋನನ ತಂದೆ.

ಹೆಚ್ರೋನನು ಅರಾಮನ ತಂದೆ.

⁴ಅರಾಮನು ಅಮ್ಮಿನಾದಾಬನ ತಂದೆ.

ಅಮ್ಮಿನಾದಾಬನು ನಹಶೋನನ ತಂದೆ.

ನಹಶೋನನು ಸಲ್ಮೋನನ ತಂದೆ.

⁵ಸಲ್ಮೋನನು ಬೋವಜನ ತಂದೆ. (ಬೋವಜನ ತಾಯಿ ರಹಾಬಳು.)

ಬೋವಜನು ಓಬೇದನ ತಂದೆ. (ಓಬೇದನ ತಾಯಿ ರೂತಳು.)

ಓಬೇದನು ಇಷಯನ ತಂದೆ.

⁶ಇಷಯನು ಅರಸನಾದ ದಾವೀದನ ತಂದೆ.

ದಾವೀದನು ಸೊಲೊಮೋನನ ತಂದೆ. (ಸೊಲೊಮೋನನ ತಾಯಿ ಊರೀಯನ ಹೆಂಡತಿಯಾಗಿದ್ದಳು.)

⁷ಸೊಲೊಮೋನನು ರೆಹಬ್ಬಾಮನ ತಂದೆ.

ರೆಹಬ್ಬಾಮನು ಅಬೀಯನ ತಂದೆ.

ಅಬೀಯನು ಆಸನ ತಂದೆ.

⁸ಆಸನು ಯೆಹೋಷಾಫಾಟನ ತಂದೆ.

ಯೆಹೋಷಾಫಾಟನು ಯೆಹೋರಾಮನ ತಂದೆ.

ಯೆಹೋರಾಮನು ಉಜ್ಜೀಯನ ತಂದೆ.

⁹ಉಜ್ಜೀಯನು ಯೋತಾಮನ ತಂದೆ.

ಯೋತಾಮನು ಆಹಾಜನ ತಂದೆ.

ಆಹಾಜನು ಹಿಜ್ಕೀಯನ ತಂದೆ.

¹⁰ಹಿಜ್ಕೀಯನು ಮನಸ್ಸೆಯ ತಂದೆ.

ಮನಸ್ಸೆಯು ಆಮೋನನ ತಂದೆ.

ಆಮೋನನು ಯೋಷೀಯನ ತಂದೆ.

¹¹ಯೋಷೀಯನು ಯೆಕೊನ್ಯ ಮತ್ತು ಅವನ ಸಹೋದರರ ತಂದೆ. (ಈ ಸಮಯದಲ್ಲಿಯೇ ಯೆಹೂದ್ಯ ಜನರನ್ನು ಗುಲಾಮಗಿರಿಗಾಗಿ ಬಾಬಿಲೋನಿಗೆ ಕೊಂಡೊಯ್ದದ್ದು.)

¹²ಯೆಹೂದ್ಯರನ್ನು ಬಾಬಿಲೋನಿಗೆ ಕೊಂಡೊಯ್ದ ನಂತರದ ಕುಟುಂಬದ ಚರಿತ್ರೆ:

ಯೆಕೊನ್ಯನು ಶೆಯಲ್ತಿಯೇಲನ ತಂದೆ.

ಶೆಯಲ್ತಿಯೇಲನು ಜೆರುಬ್ಬಾಬೆಲನ ತಂದೆ.

¹³ಜೆರುಬ್ಬಾಬೆಲನು ಅಬಿಹೂದನ ತಂದೆ.

ಅಬಿಹೂದನು ಎಲ್ಯಕೀಮನ ತಂದೆ.

ಎಲ್ಯಕೀಮನು ಅಜೋರನ ತಂದೆ.

¹⁴ಅಜೋರನು ಸದೋಕನ ತಂದೆ.

ಸದೋಕನು ಅಖೀಮನ ತಂದೆ.

ಅಖೀಮನು ಎಲಿಹೂದನ ತಂದೆ.

¹⁵ಎಲಿಹೂದನು ಎಲಿಯಾಜರನ ತಂದೆ.

ಎಲಿಯಾಜರನು ಮತ್ತಾನನ ತಂದೆ.

ಮತ್ತಾನನು ಯಾಕೋಬನ ತಂದೆ.

¹⁶ಯಾಕೋಬನು ಯೋಸೇಫನ ತಂದೆ.

ಯೋಸೇಫನು ಮರಿಯಳ ಗಂಡ.

ಮರಿಯಳು ಯೇಸುವಿನ ತಾಯಿ.

ಯೇಸುವನ್ನು ಕ್ರಿಸ್ತ^[a] ನೆಂದು ಕರೆಯುತ್ತಿದ್ದರು.

¹⁷ಅಬ್ರಹಾಮನಿಂದಿಡಿದು ದಾವೀದನವರೆಗೆ ಹದಿನಾಲ್ಕು ತಲೆಮಾರುಗಳು. ದಾವೀದನಿಂದಿಡಿದು ಬಾಬಿಲೋನಿಗೆ ಸೆರೆಯೊಯ್ದ ಸಮಯದವರೆಗೆ ಹದಿನಾಲ್ಕು ತಲೆಮಾರುಗಳು. ಬಾಬಿಲೋನಿಗೆ ಸೆರೆಹಿಡಿದುಕೊಂಡು ಹೋದಂದಿನಿಂದ ಕ್ರಿಸ್ತನು ಹುಟ್ಟುವವರೆಗೆ ಹದಿನಾಲ್ಕು ತಲೆಮಾರುಗಳು.

ಯೇಸು ಕ್ರಿಸ್ತನ ಜನನ

(ಲೂಕ 2:1-7)

¹⁸ಯೇಸು ಕ್ರಿಸ್ತನ ತಾಯಿ ಮರಿಯಳು. ಯೇಸುವಿನ ಜನನ ಈ ರೀತಿ ಸಂಭವಿಸಿತು: ಮದುವೆಮಾಡಿಕೊಳ್ಳಲು ಯೋಸೇಫನಿಗೂ ಮರಿಯಳಿಗೂ ನಿಶ್ಚಿತಾರ್ಥವಾಗಿತ್ತು. ಆದರೆ ಮದುವೆಗೆ ಮೊದಲೇ ತಾನು ಗರ್ಭಿಣಿಯಾಗಿರುವುದು ಮರಿಯಳಿಗೆ ತಿಳಿದುಬಂತು. ಮರಿಯಳು ಪವಿತ್ರಾತ್ಮನ ಪ್ರಭಾವದಿಂದ ಗರ್ಭಿಣಿಯಾಗಿದ್ದಳು. ¹⁹ಮರಿಯಳನ್ನು ಮದುವೆಯಾಗಲಿದ್ದ ಯೋಸೇಫನು ನೀತಿವಂತನಾಗಿದ್ದನು. ಮರಿಯಳನ್ನು ಜನರ ಮುಂದೆ ನಾಚಿಕೆಪಡಿಸಲು ಅವನು ಇಷ್ಟಪಡಲಿಲ್ಲ. ಆದ್ದರಿಂದ ಅವನು ಗುಟ್ಟಾಗಿ ನಿಶ್ಚಿತಾರ್ಥವನ್ನು ರದ್ದುಗೊಳಿಸಬೇಕೆಂದಿದ್ದನು.

²⁰ಯೋಸೇಫನು ಹೀಗೆ ಆಲೋಚಿಸಿಕೊಂಡನಂತರ, ಪ್ರಭುವಿನ ದೂತನು ಯೋಸೇಫನಿಗೆ ಕನಸಿನಲ್ಲಿ ಕಾಣಿಸಿಕೊಂಡನು. ಆ ದೂತನು, “ದಾವೀದನ ಮಗನಾದ ಯೋಸೇಫನೇ, ಮರಿಯಳನ್ನು ನಿನ್ನ ಹೆಂಡತಿಯಾಗಿ ಸ್ವೀಕರಿಸಲು ಭಯಪಡಬೇಡ. ಆಕೆ ಪವಿತ್ರಾತ್ಮನ ಪ್ರಭಾವದಿಂದ ಗರ್ಭಿಣಿಯಾಗಿದ್ದಾಳೆ. ²¹ಆಕೆ ಒಬ್ಬ ಮಗನನ್ನು ಹೆರುವಳು. ನೀನು ಆ ಮಗುವಿಗೆ ಯೇಸು ಎಂದು ಹೆಸರಿಡುವೆ. ನೀನು ಆತನಿಗೆ ಆ ಹೆಸರನ್ನೇ ಇಡು; ಏಕೆಂದರೆ ಆತನು ತನ್ನ ಜನರನ್ನು ಅವರ ಪಾಪಗಳಿಂದ ರಕ್ಷಿಸುವನು” ಎಂದು ಹೇಳಿದನು.

²²ಪ್ರವಾದಿಯ ಮೂಲಕ ಪ್ರಭು ತಿಳಿಸಿದ್ದೆಲ್ಲ ನೆರವೇರುವಂತೆ ಇದೆಲ್ಲಾ ನಡೆಯಿತು. ²³ಅದೇನೆಂದರೆ: “ಕನ್ನಿಕೆಯೊಬ್ಬಳು ಗರ್ಭಿಣಿಯಾಗಿ ಒಬ್ಬ ಮಗನಿಗೆ ಜನ್ಮ ಕೊಡುತ್ತಾಳೆ. ಆತನಿಗೆ ಇಮ್ಮಾನುವೇಲ್ ಎಂಬ ಹೆಸರನ್ನು ಇಡುವರು.”^(A) (ಇಮ್ಮಾನುವೇಲ್ ಎಂದರೆ “ದೇವರು ನಮ್ಮ ಸಂಗಡ ಇದ್ದಾನೆ” ಎಂದರ್ಥ.)

²⁴ಯೋಸೇಫನು ಎಚ್ಚರಗೊಂಡ ಮೇಲೆ ಪ್ರಭುವಿನ ದೂತನು ಕನಸಿನಲ್ಲಿ ಹೇಳಿದ್ದಂತೆಯೇ ಮರಿಯಳನ್ನು ಪತ್ನಿಯನ್ನಾಗಿ ಸ್ವೀಕರಿಸಿಕೊಂಡನು. ²⁵ಆದರೆ ಮರಿಯಳು ಮಗನನ್ನು ಹೆರುವ ತನಕ ಯೋಸೇಫನು ಅವಳೊಂದಿಗೆ ಶರೀರ ಸಂಬಂಧವಿಲ್ಲದೆ ಇದ್ದನು. ಯೋಸೇಫನು ಆ ಮಗುವಿಗೆ “ಯೇಸು” ಎಂದು ಹೆಸರಿಟ್ಟನು.

Footnotes

1:16 ಕ್ರಿಸ್ತನು ಇದರರ್ಥ “ಅಭಿಷಿಕ್ತನು” (ಮೆಸ್ಸೀಯನು) ಅಥವಾ ‘ದೇವರಿಂದ ಆರಿಸಲ್ಪಟ್ಟವನು.’

Kannada Holy Bible: Easy-to-Read Version (KERV)