Isaias 9:2-7

Magandang Balita Biblia

² Nakakita^(A) ng isang maningning na liwanag
    ang bayang matagal nang lumalakad sa kadiliman;
sumikat na ang liwanag
    sa mga taong naninirahan sa lupaing balot ng dilim.
³ Pinasigla mo ang kanilang pagdiriwang,
    dinagdagan mo ang kanilang tuwa.
Nagagalak sila na parang panahon ng anihan,
    at parang mga taong naghahati-hati sa nasamsam na kayamanan.
⁴ Sapagkat binali mo ang pamatok ng kahirapan
    at mga bigatin sa kanilang balikat ay pinasan.
Pamalo ng mga mang-aapi, iyong binali
    tulad sa Midian na iyong ginapi.
⁵ Ang panyapak ng mga mandirigma,
    at ang lahat ng kasuotang tigmak sa dugo ay susunugin.
⁶ Sapagkat isinilang ang isang sanggol na lalaki para sa atin.
    Ibibigay sa kanya ang pamamahala;
at siya ay tatawaging Kahanga-hangang Tagapayo,
    Makapangyarihang Diyos, Walang Hanggang Ama,
    Prinsipe ng Kapayapaan.
⁷ Magiging^(B) malawak ang kanyang kapangyarihan
    at walang katapusang kapayapaan ang ipagkakaloob sa trono ni David at sa kanyang kaharian.
Itatatag niya ito at pamamahalaan
    na may katarungan at katuwiran
    mula ngayon at magpakailanman.
Isasagawa ito ni Yahweh na Makapangyarihan sa lahat.