Jeremias 31:18-20

Magandang Balita Biblia

¹⁸ “Narinig kong nananaghoy ang mga taga-Efraim:
‘Pinarusahan ninyo kami
    na parang mga guyang hindi pa natuturuan.
Ibalik ninyo kami nang kami'y gumaling,
    sapagkat kayo si Yahweh na aming Diyos.
¹⁹ Tumalikod kami sa inyo ngunit ngayo'y nagsisisi na;
    natuto kami matapos ninyong parusahan.
Napahiya kami't nalungkot dahil nagkasala kami
    sa panahon ng aming kabataan.’

²⁰ “Si Efraim ang aking anak na minamahal,
    ang anak na aking kinalulugdan.
Kung gaano kadalas ko siyang pinaparusahan,
    gayon ko siya naaalaala.
Kaya hinahanap ko siya,
    at ako'y nahahabag sa kanya.”
Ito ang sabi ni Yahweh.