Marcos 15:42-16:8

Ang Biblia (1978)

⁴² At ^(A)nang kinahapunan, sapagka't noo'y ^(B)Paghahanda, sa makatuwid baga'y ang araw na nauuna sa sabbath,

⁴³ Dumating si Jose na taga Arimatea, isang ^(C)kasangguni na may marangal na kalagayan, na ^(D)naghihintay rin naman ng kaharian ng Dios; at pinangahasan niyang pinasok si Pilato, at hiningi ang bangkay ni Jesus.

⁴⁴ At nanggilalas si Pilato kung siya'y patay na: at nang mapalapit niya sa kaniya ang ^(E)senturion, ay itinanong niya sa kaniya kung malaon nang patay.

⁴⁵ At nang matanto niya sa senturion, ay ipinagkaloob niya ang bangkay kay Jose.

⁴⁶ At binili niya ang isang kayong lino, at pagkababa sa kaniya sa krus, ay binalot siya ng kayong lino at inilagay siya sa isang libingan na hinukay sa isang bato; at iginulong niya ang isang bato hanggang sa pintuan ng libingan.

⁴⁷ At ^(F)tinitingnan ni Maria Magdalena at ni Mariang ina ni Jose kung saan siya nalagay.

16 At ^(G)nang makaraan ang sabbath, ^(H)si Maria Magdalena, at si Mariang ina ni Santiago, at ^(I)si Salome, ^(J)ay nagsibili ng mga pabango, upang sila'y magsiparoon at siya'y pahiran.

² At pagkaumagang-umaga nang unang araw ng sanglinggo, ay nagsiparoon sila sa libingan nang sikat na ang araw.

³ At kanilang pinaguusapan, Sino kaya ang ating mapagpapagulong ng bato mula sa pintuan ng libingan?

⁴ At pagkatingin, ay nakita nilang naigulong na ^(K)ang bato: sapagka't yao'y totoong malaki.

⁵ At pagkapasok sa libingan, ay ^(L)kanilang nakita ang isang binata na nakaupo sa dakong kanan, na nararamtan ng isang damit na maputi; at sila'y nangagitla.

⁶ At sinabi niya sa kanila, Huwag kayong mangagitla: hinahanap ninyo si Jesus, ang Nazareno, na ipinako sa krus: siya'y nagbangon; wala siya rito: tingnan ninyo ang dakong pinaglagyan nila sa kaniya!

⁷ Datapuwa't magsiyaon kayo, sabihin ninyo sa kaniyang mga alagad at kay ^(M)Pedro, Siya'y nangunguna sa inyo sa Galilea: doon siya makikita, ^(N)ayon sa sinabi niya sa inyo.

⁸ At sila'y nagsilabas, at nagsitakas mula sa libingan; sapagka't sila'y nagsipangilabot at nangagitla: ^(O)at hindi sila nangagsasabi ng anoman sa kanino man; sapagka't sila'y nangatatakot.