Bible in 90 Days

Naghambal si Bildad

8 Dayon nagsabat si Bildad nga taga-Shua, ² “San-o ka bala mag-untat sa imo mga ginahambal? Kagahod sa imo kag wala sing pulos ang imo mga ginahambal. ³ Indi puwede nga lubagon sang Makagagahom nga Dios ang hustisya ukon tikuon ang husto. ⁴ Nakasala ang imo mga anak sa Dios, gani dapat lang nga silutan niya sila. ⁵ Pero kon magdangop ka sa Makagagahom nga Dios kag magpakitluoy sa iya, ⁶ kag magkabuhi nga matinlo kag matarong, bisan karon dayon buligan ka niya kag ibalik ang imo maayo nga kahimtangan. ⁷ Kag ang manggad nga mangin imo sa palaabuton mas dako gid kon ikomparar sa manggad mo sang una.

⁸ “Pamangkuta bala ang nahauna nga mga henerasyon. Hibalua kon ano ang natun-an^[a] sang ila mga katigulangan. ⁹ Kay daw bag-o lang kita natawo kag diutay lang ang aton nahibaluan, kag umalagi lamang kita sa kalibutan pareho sa landong nga wala nagadugay. ¹⁰ Pamatii sila, kay tudluan ka nila sang ila nahibaluan.

¹¹ “Indi mabuhi ang tanom nga nagatubo sa tubig kon wala sing tubig. ¹² Mapatay ini gilayon samtang nagatubo pa lang kag indi pa talapson. ¹³ Pareho man sina ang dangatan sang tanan nga tawo nga nagatalikod sa Dios. Wala sing paglaom ang tawo nga indi diosnon. ¹⁴ Ang tanan nga ginasaligan niya matapok pareho sa lawa sang damang. ¹⁵ Kon sandigan niya, nagakabugto dayon; kon uyatan niya, nagakahukas. ¹⁶ Kon tan-awon daw maayo ang iya kahimtangan, pareho sa tanom nga nabunyagan sing maayo kag nasilakan sang adlaw. Nagagapa ini sa katamnan ¹⁷ kag nagapanggamot sing maayo sa mga bato. ¹⁸ Pero kon magabot na ini, wala na sing may magsapak sini. ¹⁹ Amo ina ang katapusan sang iya kabuhi, kag may magatubo naman nga tanom sa duta nga iya gintubuan.

²⁰ “Sa pagkamatuod, wala ginasikway sang Dios ang tawo nga wala sing kasawayan ang iya kabuhi, kag wala niya ginabuligan ang malaot nga tawo. ²¹ Pakadlawon ka niya liwat, kag pahugyawon sa kalipay. ²² Pakahuy-an niya ang imo malaot nga mga kaaway, kag laglagon ang ila mga panimalay.”

Naghambal si Job

9 Dayon nagsabat si Job, ² “Huo, matuod inang ginasiling mo. Pero paano makapamatuod ang tawo nga inosente siya sa atubangan sang Dios? ³ Bisan baison pa niya ang Dios sa korte, wala siya sing may mahimo, kay sa isa ka libo nga pamangkot sang Dios bisan isa indi niya masabat. ⁴ Maalam kag gamhanan gid ang Dios. Sin-o bala ang nagkontra sa iya kag nagmadinalag-on?

⁵ “Sa wala sing paandam, ginauyog niya ang mga bukid kag nagakalatiphag ini sa iya kaakig. ⁶ Ginapalinog niya ang duta halin sa pundasyon sini. ⁷ Sa iya lang pagmando, puwede nga indi magbutlak ang adlaw kag indi magsiga ang mga bituon. ⁸ Siya lang ang nagahumlad sang kalangitan, kag siya lang ang nagapauntat sang balod. ⁹ Siya ang nagtuga sang mga grupo sang mga bituon nga ginatawag Oso, Orion, Pleades, kag sang mga bituon sa bagatnan. ¹⁰ Nagahimo siya sang makatilingala nga mga butang kag mga milagro nga indi matungkad kag indi maisip. ¹¹ Kon maglabay siya sa akon, indi ko siya makita kag mabatyagan. ¹² Kon may gusto siya nga kuhaon, wala sing may makapugong sa iya. Sin-o bala ang makareklamo sa iya ginahimo? ¹³ Wala ginapunggan sang Dios ang iya kaakig. Bisan ang mga kabulig sang dragon nga si Rahab nagaluhod sa kahadlok sa iya. ¹⁴ Gani paano ko madepensahan ang akon kaugalingon sa Dios? Ano ang ihambal ko para makipagbais sa iya? ¹⁵ Bisan inosente pa ako, indi ako makadepensa sang akon kaugalingon. Ang mahimo ko lang amo ang pagpakitluoy sa Dios nga akon Manughukom. ¹⁶ Bisan pangabayon ko siya nga mag-atubangay kami kag magsugot siya, indi gihapon niya ako pagpamatian. ¹⁷ Kay ginapaantos niya ako nga daw sa ginasalakay sang bagyo, kag ginadugangan niya ang akon mga kasakit sa wala sing rason. ¹⁸ Daw halos indi niya ako pagpaginhawaon sing maayo sa mga kasakit nga ginapaantos niya sa akon. ¹⁹ Kon sa pakusog lang, makusog gid siya! Kag kon sa akusaray, sin-o ang makaakusar sa iya? ²⁰ Bisan inosente pa ako, sentensyahan gihapon ako nga silutan tungod sang akon ginapanghambal sa pagdepensa sa akon kaugalingon. ²¹ Bisan wala sing kasawayan ang akon kabuhi, baliwala na ini sa akon. Ginakaugtan ko ang akon kabuhi. ²² Kay amo man lang gihapon; pareho lang nga laglagon sang Dios ang matarong kag ang malaot. ²³ Nagakadlaw lang siya kon mapatay gulpi ang matarong sa kalamidad. ²⁴ Gintugyan niya ang kalibutan sa mga malaot. Ginatabunan niya ang mata sang mga manughukom. Kon indi siya ang nagahimo sini, ti sin-o pa abi?

²⁵ “Kadasig magligad sang mga inadlaw sang akon kabuhi; daw mas madasig pa sang sa manugdalagan. Nagaligad ini nga wala gid sing kalipay. ²⁶ Huo, kadasig magligad sang akon kabuhi; pareho kadasig sang madasig nga sakayan ukon sang agila nga nagasibad. ²⁷ Bisan indi na ako magreklamo kag untatan ko na ang pagpangasubo, kag magyuhom na ako, ²⁸ mahadlok gihapon ako sa mga pag-antos nga mag-abot sa akon. Kay nahibaluan ko nga indi niya ako pagkabigon nga inosente. ²⁹ Sanglit ginakabig niya ako subong nga nakasala, ano pa ang pulos sa pagpaninguha ko nga depensahan ang akon kaugalingon? ³⁰ Bisan pa habunan ko ang akon bug-os nga lawas agod mangin matinlo ako, ³¹ itum-oy niya gihapon ako sa lunangon nga buho, agod bisan ang akon bayo mangil-aran sa akon. ³² Indi tawo ang Dios pareho sa akon, gani indi ako makabais sa iya kag makaakusar sa iya sa korte. ³³ Kuntani may makapatunga sa amon nga duha sa paghusay sa amon. ³⁴ Kag mapauntat niya ang paghanot sang Dios sa akon, agod indi na ako mahadlok. ³⁵ Dayon makahambal na ako sa iya nga wala sing kahadlok, pero sa karon indi ko pa ini mahimo.”

10 “Ginakangil-aran ko ang akon kabuhi, gani pagusto ako sa pagreklamo. Magahambal ako sa kalain sang akon buot. ² Amo ini ang ihambal ko sa Dios: ‘Indi ako paghusgari nga malain ako, kundi pahibalua ako kon ano ang imo akusasyon kontra sa akon. ³ Nalipay ka bala sa pagpaantos sa akon? Ngaa ginasikway mo ako nga imo ginhimo kag ginapaburan mo ang mga padihot sang mga malaot? ⁴ Ang pagtan-aw mo bala pareho sa pagtan-aw sang tawo? ⁵ Pareho lang bala kalip-ot ang imo kabuhi sa tawo? ⁶ Ti, ngaa nagadali ka gid sa pagpangita sa akon sang sala? ⁷ Nahibaluan mo nga wala ako sing sala, pero sin-o ang makadepensa sa akon sa imo?

⁸ “ ‘Ikaw ang nagporma kag naghimo sa akon, kag karon laglagon mo ako? ⁹ Dumduma nga ginporma mo ako halin sa duta,^[b] kag karon ibalik mo na ako sa duta? ¹⁰ Ikaw ang nagporma sa akon sa tiyan sang akon iloy, nga daw pareho sa keso nga naporma halin sa gatas. ¹¹ Ginporma mo ako nga may mga tul-an kag mga ugat kag ginputos sang unod kag panit. ¹² Ginhatagan mo ako sang kabuhi kag ginpakitaan sang kaayo, kag gintipigan mo man ang akon kabuhi. ¹³ Pero karon nahibaluan ko nga ang matuod mo nga plano sa akon ¹⁴ amo nga bantayan mo ako kon makasala ako, kag dayon indi mo ako pagpatawaron. ¹⁵ Nakasala man ako ukon wala, pareho lang nga kaluluoy ako. Kay nahuy-an gid ako kag natam-an sa akon mga pag-antos. ¹⁶ Ginatinguhaan ko nga magbangon, pero ginatiid mo ako pareho sa leon agod laglagon. Ginapakita mo ang imo gahom kontra sa akon. ¹⁷ Sige-sige ang imo pag-akusar sa akon, kag nagadugang nga nagadugang ang imo kaakig sa akon. Wala sing untat ang imo pagsalakay sa akon.

¹⁸ “ ‘Ngaa bala gintugutan mo pa nga matawo ako? Kuntani napatay na lang ako sa wala pa sing may nakakita sa akon. ¹⁹ Kuntani wala na lang ako matuga. Napatay na lang kuntani ako sa tiyan sang akon iloy kag pagkabun-ag ginlubong deretso. ²⁰ Diutay na lang nga tion ang nabilin sa akon, gani pabay-i na lang ako agod sa bisan malip-ot lang nga tion malipay man ako ²¹ sa wala pa ako magkadto sa lugar nga masubo kag madulom, nga sa diin indi na ako makabalik diri. ²² Puwerte gid kadulom didto; puro lang gab-i kag wala gid sang kasanag, kag wala didto sing kahusayan.’ ”

Naghambal si Zofar

11 Dayon nagsabat si Zofar nga taga-Naama, ² “Dapat lang nga masabat inang imo mga ginapanghambal. Indi mapamatud-an nga inosente ka paagi lang sa pagwakal. ³ Indi mo kami mapahipos sa imo mga ginapanghambal nga wala sing pulos. Nagahunahuna ka bala nga indi ka namon pagsabdungon sa imo mga pagpasipala? ⁴ Nagasiling ka nga husto ang imo pagpati kag matinlo ka sa atubangan sang Dios. ⁵ Maayo kuntani nga maghambal ang Dios sa imo ⁶ kag sugiran ka niya sang mga butang nga wala mo pa mahibaluan. May mga butang nga nahibaluan mo na kag may mga butang nga wala pa. Nahibaluan mo na bala nga ang silot sang Dios sa imo kulang pa sa nagakabagay sa imo? ⁷ Matungkad mo bala ang tanan parte sa Makagagahom nga Dios? ^8-9 Mas mataas pa ini sang sa langit kag mas madalom pa sang sa lugar sang mga patay. Malapad pa ini sang sa kalibutan kag mas masangkad pa sang sa dagat. Ti, maabot bala ini sang imo hunahuna?

¹⁰ “Halimbawa, dakpon ka sang Dios kag dal-on sa korte kag dayon prisohon, sin-o ang makapugong sa iya? ¹¹ Nahibaluan gid niya kon sin-o ang dayaon nga mga tawo kag nakita niya ang ila kalautan. ¹² Daw imposible na sa isa ka buang-buang nga magmaalamon, subong nga imposible sa talunon nga asno nga magbata sing tawo.^[c]

¹³ “Job, kon maghinulsol ka lang kag magdangop sa Dios, ¹⁴ kag indi ka na magpakasala kag indi mo pagtugutan ang imo panimalay sa pagpakasala, ¹⁵ sigurado gid nga indi ka na mahuya kag magakabuhi ka nga malig-on kag wala sing ginakahadlukan. ¹⁶ Dayon malipatan mo na ang imo mga kasakit, nga daw sa tubig lang ini nga naglabay. ¹⁷ Kag ang imo kabuhi mangin masanag pa sang sa silak sang adlaw sa udto. Ang kadulom sang imo kabuhi magasanag pareho sa kaagahon. ¹⁸ Magakabuhi ka nga malig-on tungod kay may paglaom ka. Protektaran ka sang Dios kag magapahuway nga wala sing ginakahadlukan. ¹⁹ Magahigda ka nga wala sing may nagapahadlok sa imo, kag madamo ang magapangayo sang bulig sa imo. ²⁰ Pero ang mga malaot mapaslawan, kag wala na sing mapalagyuhan pa, kag ang ila lang paglaom amo ang kamatayon.”

Naghambal si Job

12 Dayon nagsabat si Job, ² “Nagahunahuna kamo nga kamo lang ang maalam kag wala na sing may mabilin pa nga maalam kon mapatay na kamo. ³ Pero maalam man ako pareho sa inyo; indi kamo labaw sa akon. Nahibaluan ko man ining tanan nga inyo ginsiling. ⁴ Nangin kaladlawan ako sa akon mga abyan bisan matarong ako kag wala sing kasawayan, kag bisan ginasabat sadto sang Dios ang akon mga pangamuyo. ⁵ Ang mga tawo nga pareho sa akon nga nagaantos kag daw sa matumba na, ginatamay sang mga tawo nga nagapatawhay-tawhay lang. ⁶ Pero ang mga tulisan kag ang mga tawo nga nagapaakig sa Dios nagakabuhi nga malinong bisan ang ila ikasarang amo ang ila ginapakadios.^[d]

^7-8 “Magtuon ka bala sa bisan ano nga klase sang sapat—ang nagalakat, ang nagalupad, ang nagakamang, kag ang nagalangoy. ⁹ Kay tanan sila nakahibalo sining ginhimo sang Ginoo. ¹⁰ Ara sa iya kamot ang kabuhi ukon ang ginhawa sang tanan nga tinuga, pati sang tawo. ¹¹ Kon ang dila sang tawo makahibalo kon ano ang manamit ukon indi manamit nga pagkaon, ang dulunggan sang tawo makahibalo man kon ano ang maayo ukon malain nga mga pulong. ¹² Madamo sing nahibaluan ang tigulang nga tawo, kay samtang nagalawig ang iya kabuhi, nagadamo pa gid ang iya nahibaluan.

¹³ “Pero ang Dios indi lamang may kaalam kundi may gahom pa, kag sa iya lang ang matuod nga paghangop kon ano ang dapat himuon. ¹⁴ Wala sing may makakay-o sa iya ginaguba, kag wala sing may makahilway sa iya ginapriso. ¹⁵ Kon punggan niya ang ulan, nagamala ang duta, kag kon pabay-an niya ang ulan, nagabaha kag nagakahalitan ang duta. ¹⁶ Makusog siya kag madinalag-on, kag ara sa idalom sang iya gahom ang nagapangdaya kag ang ginadayaan. ¹⁷ Ginadula niya ang kaalam sang mga manuglaygay, kag ginapabuang niya ang mga manughukom. ¹⁸ Ginapahalin niya ang mga hari sa ila trono kag ginapabihag. ¹⁹ Ginakuha niya ang mga pari kag ang mga tawo sa ila gamhanan nga posisyon. ²⁰ Ginapahipos niya ang mga ginasaligan nga mga manuglaygay, kag ginakuha niya ang husto nga pag-intiendi sang mga tigulang. ²¹ Ginatamay niya ang dungganon nga mga tawo, kag ginakuhaan niya sang gahom ang gamhanan nga mga tawo. ²² Ginapahayag niya ang mga sekreto, kag ginapasanag ang madulom. ²³ Ginapagamhanan niya kag ginapasangkad ang mga nasyon, pero ginapierdi man niya ini kag ginalaglag. ²⁴ Ginahimo niya nga mga buang-buang ang ila mga pangulo, kag ginapatalang-talang sila sa kamingawan. ²⁵ Nagapangapkap sila sa madulom kag nagaduling-duling pareho sa hubog.”

13 “Nakita kag nabatian ko ang tanan nga ginsiling ninyo, kag naintiendihan ko ini. ² Kon ano ang inyo nahibaluan, nahibaluan ko man; indi kamo labaw sa akon. ³ Pero indi ako magpakigbais sa inyo sang akon kaso kundi sa Dios nga Makagagahom. ⁴ Kay ginatinguhaan ninyo nga bulngon ako sing mga binutig. Tanan kamo pareho sa doktor nga wala sing pulos. ⁵ Mas maayo pa nga maghipos na lang kamo tanan. Amo ina ang pinakamaayo ninyo nga himuon.

⁶ “Palihog pamatii ninyo ang akon mga rason. ⁷ Ginadepensahan bala ninyo ang Dios sa inyo nga pagbinutig? ⁸ Ginaapinan bala ninyo siya, nga daw sa ginadepensahan ninyo sa korte? ⁹ Kon usisaon kamo sang Dios, may maayo ayhan siya nga makita sa inyo? Indi kamo maghunahuna nga madayaan ninyo siya pareho sang inyo pagdaya sa mga tawo. ¹⁰ Sigurado gid nga sabdungon kamo sang Dios bisan ginaapinan pa ninyo siya. ¹¹ Wala bala kamo mahadlok sa iya gahom? ¹² Ang inyo mga hulubaton wala sing pulos pareho sa abo; ang inyo mga rason kapigaw pareho sa kolon.

¹³ “Hipos kamo samtang nagahambal ako, kag pabay-i lang ninyo ako bisan ano ang matabo sa akon. ¹⁴ Handa ako sa pagtaya sang akon kabuhi. ¹⁵ Sigurado nga patyon ako sang Dios; wala na ako sing paglaom.^[e] Pero sa gihapon depensahan ko ang akon kaugalingon sa iya atubangan. ¹⁶ Basi pa lang paagi sini maluwas ako, kay ang tawo nga indi diosnon indi gid makapalapit sa iya atubangan.

¹⁷ “Pamatii sing maayo ang akon mga ginahambal. ¹⁸ Karon nga preparado na ako sa pagdepensa sang akon kaugalingon, nahibaluan ko nga ideklarar ako nga inosente. ¹⁹ Sin-o bala ang makaakusar sa akon nga nakasala ako? Kon may ara gid man, mahipos na ako kag mapatay.

²⁰ “O Dios, ihatag ining duha ka butang sa akon kag indi na ako magpanago sa imo: ²¹ untati na ang pagpaantos mo sa akon, kag indi na ako pagpahadluka sa imo makahaladlok nga ginahimo sa akon. ²² Karon, maghambal ka sa akon kag sabton ko ikaw, ukon ako ang maghambal sa imo kag sabton mo ako. ²³ Sugiri ako kon ano bala nga sala ang akon nahimo. Ipakita sa akon ang akon mga paglapas kag mga sala. ²⁴ Ngaa bala nagalikaw ka sa akon, kag ginakabig mo ako nga imo kaaway? ²⁵ Ngaa ginapahadlok kag ginalagas mo ako? Pareho man lang ako sa dagami ukon sa dahon nga ginapalid sang hangin. ²⁶ Nagasulat ka sang masakit nga mga akusasyon kontra sa akon, kag ginapabayad mo ako sa mga sala nga nahimo ko sang bataon pa ako. ²⁷ Daw pareho lang nga ginakadenahan mo ang akon mga tiil. Ginabantayan mo ang tagsa ko ka tikang, kag ginasunod mo ang agi sang akon mga tiil. ²⁸ Gani pareho ako sa gabok nga butang nga nagakadunot ukon pareho sa bayo nga ginaut-ot sang sapat-sapat.”

14 “Kami nga mga tawo malip-ot lang ang amon kabuhi, kag madamo kami sang kalisod. ² Pareho kami sa bulak nga nagabuskad kag sa indi madugay nagakalaya, ukon pareho sa landong nga nagakadula gilayon. ³ Ti ngaa ginabantayan mo gid ang tawo, Ginoo? Gusto mo pa siya^[f] nga hukman. ⁴ May tawo bala nga makakabuhi nga matinlo gid? Wala! Kay ang tanan natawo nga mahigko. ⁵ Ginpat-od mo na kon ano kalawig ang kabuhi sang tawo. Kag indi siya makapasobra sa tion nga gintalana mo sa iya. ⁶ Gani indi na lang paghingabuta ang tawo, pabay-i na lang siya agod makapatawhay man siya pareho sa isa ka trabahador pagkatapos sang obra.

⁷ “Kon utdon ang isa ka kahoy, may tsansa pa nga mabuhi ini kag magtubo liwat. ⁸ Bisan patay na ang puno sini kag gulang na ang mga gamot, ⁹ kon matubigan magapanalingsing pa ini pareho sa isa ka bag-o nga tanom. ¹⁰ Pero kon ang tawo ang mapatay, madula na ang tanan niya nga kusog. Pagkabugto sang iya ginhawa amo na ina ang iya katapusan. ¹¹ Subong nga nagabuhin ang tubig sa dagat kag nagahubas ang suba, ¹² ang tawo nagakapatay, kag indi na siya makabangon ukon makabugtaw sa iya pagkatulog samtang may kalangitan pa.

¹³ “O Ginoo, kabay pa kuntani nga taguon mo na lang ako sa lugar sang mga patay hasta madula ang imo kaakig, kag magtalana ka sang tion nga dumdumon mo ako didto. ¹⁴ Kon mapatay ang tawo mabuhi pa bala siya liwat? Ti batason ko ang bug-os nga tion sang akon pag-antos hasta mag-abot ang tion nga matapos ini. ¹⁵ Sa tion nga magpanawag ka sa akon, Ginoo, magasabat ako. Handumon mo ako nga imo tinuga. ¹⁶ Bisan sa sina nga tion bantayan mo ang akon mga ginahimo, pero indi mo na pagdumdumon pa ang akon sala. ¹⁷ Daw pareho lang nga isulod mo ini sa bag agod matabunan kag indi mo na makita pa. ¹⁸ Pero subong nga nagakatiphag ang bukid kag nagakahulog ang bato halin sa banglid, ¹⁹ kag subong man nga nagatais ang bato sa padayon nga pag-ilig sang tubig kag nagaab-ab ang duta tungod sa madamol nga ulan, ginaguba mo ang paglaom sang tawo. ²⁰ Ginadaog mo siya permi kag nagakapatay siya, kag ginabag-o mo ang iya hitsura kon magtaliwan na siya. ²¹ Indi siya makahibalo kon ang iya mga anak ginapadunggan ukon ginapakanubo. ²² Ang nabatyagan lang niya amo ang iya kaugalingon nga kasakit kag kasubo.”

Naghambal si Elifaz

15 Dayon nagsabat si Elifaz nga taga-Teman, ² “Job, ang maalam nga tawo wala nagahambal sing wala sing pulos. ³ Wala siya nagapakigbais sa wala sing pulos nga mga pulong. ⁴ Pero ang imo iya mga ginapanghambal makatulod sa tawo nga indi na magtahod kag magpangalagad sa Dios. ⁵ Ang imo mga ginapanghambal bunga sang imo kalautan. Kag ginadayaan mo ang iban paagi sa imo mga pulong. ⁶ Indi na kinahanglan nga hukman ko pa ikaw. Ang imo mismo ginapanghambal amo ang nagapamatuod kontra sa imo. ⁷ Nagahunahuna ka bala nga ikaw ang una nga natawo? Natawo ka na bala antes gintuga ang mga bukid? ⁸ Nabatian mo na bala ang mga plano sang Dios? Ikaw lang bala ang maalam? ⁹ Ano bala ang imo nahibaluan nga wala man namon nahibaluan? Ano bala ang imo naintiendihan nga wala man namon naintiendihan? ¹⁰ Nakatuon kami sa mga tawo nga tigulang na, mas tigulang pa sa imo amay! ¹¹ Ginhambalan ka namon sang mga pulong nga halin sa Dios nga makapabaskog kag makapalipay sa imo. Kulang pa bala ina? ¹² Ngaa nagapadala ka sa imo balatyagon? Ano bala ang nagpabulag sa imo sa kamatuoran ¹³ nga naakig ka gid sa Dios kag naghambal sinang malain nga mga pulong kontra sa iya? ¹⁴ Mahimo bala sang tawo nga magkabuhi nga matinlo kag matarong? ¹⁵ Wala gani nagasalig ang Dios sa iya mga anghel! Kon ining langitnon nga mga tinuga^[g] indi gani matinlo sa iya panulok, ¹⁶ ang tawo pa ayhan, nga malaot kag makasasala, kag ginauhaw sa paghimo sang malain?

¹⁷ “Job, pamatii ako. Sugiran ko ikaw kag paathagan sang akon naeksperiensyahan. ¹⁸ Makasugid man parte sini ang maalamon nga mga tawo nga nakatuon sa ila mga katigulangan. ¹⁹ Mga maalamon gid sila, kay sila lang ang nagapanag-iya sang ila duta, kag wala sing mga taga-iban nga lugar nga nagsakop sa ila.

²⁰ “Ang malaot nga tawo nagaantos sa bug-os niya nga kabuhi. ²¹ Permi siya ginakulbaan, kag bisan sa tion nga wala sing katalagman ginakulbaan siya nga basi salakayon siya sang mga tulisan. ²² Nahadlok siya magkadto sa dulom kay basi patyon siya. ²³ Nagatalang-talang siya sa pagpangita sang pagkaon bisan diin.^[h] Nahibaluan niya nga malapit na siya mapatay.^{[i] 24} Puwerte ang iya kakulba, pareho sa hari nga manugsalakay sa inaway. ²⁵ Nagakatabo ini sa iya, tungod nagarebelde siya^[j] sa Dios nga Makagagahom kag nagabato sa iya. ²⁶ Daw pareho lang nga nagauyat siya sang mabakod nga taming kag gusto gid nga kontrahon ang Dios. ²⁷ Bisan manggaranon kag matambok siya subong, ²⁸ magaestar siya sa guba nga mga banwa, sa mga balay nga wala sing may nagaestar kag daw sa marumpag na. ²⁹ Indi na siya padayon nga magamanggaranon. Ang iya manggad indi magdugay, kag ang iya pagkabutang indi magdamo sa duta. ³⁰ Indi siya makapalagyo sa kalaglagan.^[k] Mangin pareho siya sa kahoy nga ang mga salingsing sini masunog. Madula ang tanan niya nga pagkabutang sa isa lang ka paghuyop sang Dios. ³¹ Indi niya pagdayaan ang iya kaugalingon paagi sa pagsalig sa mga butang nga wala sing pulos, kay wala gid siya sing may makuha sa sini. ³² Sa wala pa mag-abot ang iya tion, mabaton niya ang iya silot kag indi na siya mag-uswag pa.^{[l] 33} Mangin pareho siya sa ubas nga nagakapulak ang iya hilaw nga mga bunga, ukon pareho sa kahoy nga olibo nga nagakapulak ang iya mga bulak. ³⁴ Kay ang mga indi diosnon magakalamatay nga wala sing mga kaliwat. Kag magakalasunog ang mga balay nga ginpatindog nila paagi sa pagpanguwarta. ³⁵ Nagahunahuna sila permi sa pagpanggamo, paghimo sang malain, kag pagpangdaya.”

Naghambal si Job

16 Dayon nagsabat si Job, ² “Nabatian ko na ina sang una pa. Imbes nga lipayon ninyo ako, ginapasubo pa gani ninyo ako tapat. ³ Indi na bala kamo mag-untat sa paghambal sing wala sing pulos? Ano gid bala ang nagatublag sa inyo nga sagi kamo ka bais sa akon? ⁴ Kon kamo sa akon lugar, makahambal man ako pareho sa inyo ginahambal sa akon. Waswasan ko man kamo hambal kag magalungo-lungo sang akon ulo sa inyo. ⁵ Pero indi ko ina paghimuon. Sa baylo, mahambal ako sang mga pulong nga makapabaskog kag makalipay sa inyo. ⁶ Pero sa karon, ang akon kasakit nagapadayon bisan ano pa ang akon ihambal. Kag kon maghipos man ako indi gihapon ini madula.

⁷ “O Dios, ginpakapuyan mo ako. Ginlaglag mo ang bug-os ko nga panimalay. ⁸ Ginpakurinot^[m] mo ako; puwerte na sa akon kaniwang, kag suno sa iban ini nagapamatuod nga nakasala ako. ⁹ Sa imo kaakig, O Dios, ginsalakay mo ako. Daw pareho ka sa mabangis nga sapat nga naggus-ab sang akon unod. Ginpabagrutan mo ako sang imo ngipon kag gintulok sang masakit nga daw sa kaaway mo ako.

¹⁰ “Ginyaguta kag ginkadlawan ako sang mga tawo. Gintampa nila ako sa guya sa pagtamay sa akon. Nag-isa sila kontra sa akon. ¹¹ Gintugyan ako sang Dios sa kamot sang malaot kag makasasala nga mga tawo. ¹² Maayo ang akon kahimtangan sadto, pero ginlaglag niya ako. Daw sa ginkuga niya ako kag gindugmok. Ginhimo niya ako nga iya iliguon. ¹³ Ginlibutan ako sang iya mga manugpana, kag ginpana nga wala sing luoy-luoy. Natuhog ang akon batobato, kag nag-awas ang akon apdo sa duta. ¹⁴ Wala untat ang pagpilas niya sa akon; daw isa siya ka soldado nga nagasalakay sa akon. ¹⁵ Nagasuksok ako sang sako kag nagapungko sa duta sa pagpangasubo. ¹⁶ Nagapalamula ang akon guya sa sobra nga hibi kag nagapalamarok ang akon mata. ¹⁷ Wala gid ako sang may nahimo nga sala, kag sinsero gid ako sa akon pagpangamuyo.

¹⁸ “Pareho ako sa tawo nga ginpatay nga nagapangabay sa duta nga indi pagtabunan ang iya dugo sa wala pa niya maangkon ang hustisya. ¹⁹ Bisan karon ang akon saksi^[n] ara sa langit. Siya ang magasiling nga wala ako sing sala. ²⁰ Ang akon mga abyan nagatamay sa akon, pero nagahibi ako sa Dios sa pagpangayo sang bulig. ²¹ Ang akon saksi amo ang magapakitluoy sa Dios para sa akon pareho sa isa ka tawo nga nagapakitluoy para sa iya abyan. ²² Kay sa indi madugay magataliwan na ako kag indi na magbalik.”

17 “Madali na lang ako mapatay; daw sa mabugto na ang akon ginhawa. Handa na ang lulubngan para sa akon. ² Ginalibutan ako sang mga manugtamay. Bulgar gid ang ila pagtamay sa akon. ³ O Dios, buligi ako nga mahilway ako. Wala na sang iban nga makabulig sa akon kundi ikaw lang. ⁴ Ginlipdan mo ang panghunahuna sang akon mga abyan agod indi sila makaintiendi. Gani indi sila pagtuguti nga magmadinalag-on sa ila nga pag-akusar sa akon. ⁵ Pareho sila sa tawo nga nagaluib sa iya mga abyan para makakuwarta, nga amo ang kabangdanan sang pag-antos^[o] sang iya kabataan.

⁶ “Ginhimo ako sang Dios nga kaladlawan sang mga tawo, kag ginaduplaan nila ako sa guya. ⁷ Nagapalangdulom na ang akon panulok sa kasubo; daw kalag na ako kaniwang. ⁸ Ang mga tawo nga nagakabig sang ila kaugalingon nga matarong nagakatingala sa sining natabo sa akon. Ginapakamalaot nila ako subong sa isa ka indi diosnon nga tawo. ⁹ Para sa ila ang matarong nga tawo malig-on sa iya nga pagkabuhi kag nagabaskog pa gid. ¹⁰ Pero ginahangkat ko sila sa pag-usisa liwat sa akon. Sigurado nga masapwan ko nga wala sing bisan isa sa ila nga nakaintiendi. ¹¹ Madali na lang matapos ang akon mga inadlaw. Napaslawan ang akon mga plano kag mga handom. ¹² Pero nagasiling sila nga basi mangin maayo man ang akon kahimtangan sa palaabuton. Siling nila, ‘Sa pihak sang kadulom may magaabot nga kasanag.’ ¹³ Kon maglaom gid man ako, ang akon lauman amo ang makaestar na sa lugar sang mga patay. Gusto ko na iplastar ang akon hiligdaan sa sining madulom nga lugar. ¹⁴ Kabigon ko na ang lulubngan nga akon amay, kag kabigon ko ang mga ulod nga magaut-ot sa akon nga akon iloy kag mga utod nga babayi. ¹⁵ May paglaom pa bala ako? Sin-o ang makasiling nga may paglaom pa ako? ¹⁶ Ang akon paglaom magaupod sa akon sa lugar sang mga patay. Magaupod kami didto sa idalom sang duta.”

Naghambal si Bildad

18 Dayon nagsabat si Bildad nga taga-Shua, ² “Job, san-o mo pa bala untatan inang imo ginapanghambal? Kay-uha bala ang imo ginapanghambal kag maestorya kami sa imo. ³ Ginakabig mo bala kami nga pareho sa mga baka nga wala sing pag-intiendi? ⁴ Ginahalitan mo lang ang imo kaugalingon sa imo kaakig. Nagahunahuna ka bala nga tungod lang sa imo, pabay-an sang Dios ang kalibutan ukon sayluhon niya ang mga bato sa ila sini nahamtangan?

⁵ “Sa pagkamatuod, ang malaot nga tawo sigurado gid nga mapatay. Pareho siya sang suga nga indi na magsiga. ⁶ Mangin madulom ang iya tolda kay mapatay ang suga sa iya tupad. ⁷ Sang una sigurado ang iya mga tikang, pero subong nagakatumba na siya. Ang iya mismo padihot amo ang nagalaglag sa iya. ⁸ Siya mismo ang naglakat pakadto sa siod, kag nasiod siya. ⁹ Indi na makahalin ang iya tiil. ¹⁰ Ginbutang ini nga siod sa iya alagyan, kag natago ini sa duta. ¹¹ Nalibutan siya sang mga butang nga nagapahadlok sa iya kag daw sa nagalagas ini sa iya. ¹² Ang kalamidad daw sa gutom nga tawo nga gusto maglamon sa iya. Ang kalaglagan handa sa paglaglag sa iya. ¹³ Ang iya panit ginaut-ot sang makamamatay nga balatian kag nagakadunot ang iya mga tiil kag kamot. ¹⁴ Ginapahalin siya sa iya elistaran^[p] nga nagaprotektar sa iya, kag ginadala siya sa makahaladlok nga hari.^{[q] 15} Madula ang iya elistaran tungod masunog ini sang nagadabadaba nga asupre. ¹⁶ Mangin pareho siya sang kahoy nga malaya ang mga gamot kag mga sanga sini. ¹⁷ Wala na sing may magdumdom sa iya diri sa kalibutan. Kalimtan na gid siya. ¹⁸ Tabugon siya sa sining kalibutan nga masanag pakadto sa lugar sang mga patay nga madulom. ¹⁹ Wala siya sing mga anak ukon mga kaliwat, kag wala gid sing may mabilin nga buhi sa iya pamilya.^{[r] 20} Ang mga tawo sa bisan diin nga lugar^[s] nagakatingala kag nagakahadlukan sa natabo sa iya. ²¹ Matuod gid nga amo ina ang dangatan sang malaot nga tawo, nga wala nagakilala sa Dios.”

Naghambal si Job

19 Dayon nagsabat si Job, ² “Hasta san-o pa ninyo ako paantuson kag sakiton sa inyo mga ginapanghambal? ³ Pila na ka beses^[t] nga ginainsulto ninyo ako. Wala kamo mahuya sa pagpakalain sa akon. ⁴ Kon nakasala gid man ako, akon na ina problema. ⁵ Nagahunahuna kamo nga matarong kamo sang sa akon, kag ginakabig ninyo ang akon pag-antos nga pamatuod nga nakasala ako. ⁶ Pero ang Dios ang naghimo sini sa akon. Siya ang nagbutang sang siod sa akon palibot.

⁷ “Nagapanawag ako sa pagpangayo sang bulig, pero wala sing may nagasabat sa akon. Nagapangayo ako sang hustisya, pero wala sing may nagahatag sini sa akon. ⁸ Ginbalabagan sang Dios ang akon alagyan agod indi ako makaagi. Gintabunan niya sang kadulom ang akon alagyan. ⁹ Ginkuha niya ang akon kadungganan kag maayo nga reputasyon. ¹⁰ Ginapaantos niya ako bisan diin ako magliso hasta nga daw sa mapatay na ako. Ginkuha niya ang akon paglaom nga daw sa kahoy nga gin-gabot. ¹¹ Puwerte gid ang iya kaakig sa akon, kag ginakabig niya ako nga isa sa iya mga kaaway. ¹² Daw pareho lang nga ginpadal-an niya ako sang mga soldado sa pagsalakay sa akon. Ginakibon nila ako palibot sa akon tolda.

¹³ “Ginpapalagyo niya sa akon ang akon mga paryente.^[u] Ang akon mga kilala malayo na sa akon. ¹⁴ Wala na ang mga tawo nga malapit sa akon. Ginkalimtan na ako sang akon mga kilala. ¹⁵ Ginkabig ako sang akon mga bisita kag kabulig nga mga babayi nga estranghero. Ang pagtan-aw nila sa akon taga-iban nga lugar. ¹⁶ Kon magtawag ako sa akon suluguon, wala gid siya nagasabat, bisan pa nga nagapakitluoy ako sa iya. ¹⁷ Nabahuan sang akon ginhawa ang akon asawa, kag nangil-aran sa akon ang akon mga utod nga lalaki. ¹⁸ Bisan ang magagmay nga mga bata nagatamay sa akon. Kon makita nila ako,^[v] ginakadlawan nila ako. ¹⁹ Ang tanan nga suod ko nga abyan nangil-aran sa akon. Gintalikdan ako sang akon mga ginahigugma. ²⁰ Daw sa tul-an na lang ako nga naputos sang panit, kag daw halos mapatay na ako.

²¹ “Maluoy kamo mga abyan ko. Kaluoyi ninyo ako, kay ginapaantos ako sang Dios. ²² Ngaa ginahingabot ninyo ako pareho sang ginahimo sang Dios sa akon? Indi pa bala tuman ang inyo pagpaantos sa akon? ²³ Maayo kuntani kon ginsulat ang mga ginpanghambal ko sa isa ka libro, ²⁴ ukon ginsinsil sing maayo sa bato agod indi mapanas hasta san-o.

²⁵ “Pero nahibaluan ko nga buhi ang akon manug-apin,^[w] kag sa ulihi magaabot siya sa duta sa pag-apin sa akon. ²⁶ Kon madunot na ang akon panit kag maghalin na ako sa akon lawas, makita ko ang Dios.^{[x] 27} Makita ko siya mismo sang akon mga mata, kag indi na siya mangin iban sa akon. Dako gid ang akon handom nga makita siya.

²⁸ “Kon padayunon ninyo ang pag-akusar sa akon nga nagaantos ako tungod sa akon sala, ²⁹ magaabot gid sa inyo ang makahaladlok nga silot^[y] sang Dios. Huo, silutan gid niya kamo tungod sa iya kaakig. Dayon mahibaluan ninyo nga ginasentensyahan kamo sang Dios.”

Naghambal si Zofar

20 Dayon nagsabat si Zofar nga taga-Naama, ² “Kinahanglan nga magsabat ako kay indi ako mapahamtang. ³ Ginsabdong mo ako nga may pag-insulto, kag karon may nagatulod sa akon panghunahuna nga magsabat ako sa imo. ⁴ Sigurado gid nga nahibaluan mo nga halin pa sang una, umpisa sang pagtuga sa tawo sa kalibutan, ⁵ ang kalipay sang malaot nga mga tawo umalagi lang. Huo, wala nagadugay ang kalipay sang mga tawo nga indi diosnon. ⁶ Bisan puwerte ang iya pagkamatinaas-taason, nga daw lambot na ini sa mga panganod ukon sa langit, ⁷ madula siya hasta san-o pareho sang iya tai. Ang mga nakakilala sa iya, mamangkot kon diin na siya. ⁸ Madula siya pareho sang damgo ukon sang palanan-awon sa kagab-ihon, kag indi na gid siya makita. ⁹ Indi na siya makita sang nakakilala sa iya, kag madula siya sa lugar nga iya anay ginaestaran. ¹⁰ Ang iya mga anak amo ang magabayad sa mga imol sa iya mga kinawat sa ila. ¹¹ Mapatay siya kag ilubong nga bataon kag makusog pa.

¹² “Ang paghimo sang kalautan pareho sa pagkaon nga matam-is sa iya baba, ¹³ kag ginaugom niya ini sing malawig agod masaboran gid niya. ¹⁴ Pero pag-abot sini sa iya tiyan mangin mapait ini kag magahilo sa iya pareho sa dalit sang man-og. ¹⁵ Isuka niya pareho sa pagkaon ang manggad nga iya ginkawat. Bisan ara na ini sa iya tiyan ipasuka ini sang Dios sa iya. ¹⁶ Magasuyop siya sang dalit sang mga man-og nga amo ang magapatay sa iya. ¹⁷ Indi na niya matilawan ang bugana nga lana, gatas kag dugos, nga daw sa sapa ukon suba nga nagailig. ¹⁸ Indi siya makabaton sing balos sa iya pagpangabudlay. Indi siya makapangalipay sa iya manggad. ¹⁹ Kay ginpigos niya ang mga imol kag ginpabay-an niya sila nga pigado. Gin-agaw niya ang mga balay nga indi iya. ²⁰ Wala siya nagakaayawan sa iya pagkadalok. Ang tanan nga magustuhan niya indi makaluwas sa iya. ²¹ Pero wala na sing may mabilin sa iya nga iya makaon, kay ang iya manggad madula. ²² Sa iya kabuganaan, magaabot sa iya ang kalisod. Puwerte gid nga pag-antos ang magaabot sa iya. ²³ Kon mabusog na niya ang iya kaugalingon, ipaagom sang Dios sa iya ang iya puwerte nga kaakig, kag paulanan siya sang silot. ²⁴ Bisan makapalagyo man siya sa salsalon nga armas, matuhog gihapon siya sang saway nga pana. ²⁵ Matuhog ang iya apdo, kag magalapos ang pana sa iya lawas. Magaabot sa iya ang kahadlok. ²⁶ Madula ang iya manggad sa kadudulman. Sunugon siya kag ang tanan nga nabilin sa iya elistaran^[z] sang kalayo nga indi tawo ang nagpasiga. ²⁷ Ipahayag sang langit ang iya sala kag magasaksi ang duta kontra sa iya. ²⁸ Pagaanuron sang baha ang iya balay sa adlaw nga ipaagom sang Dios ang iya kaakig. ²⁹ Amo ina ang kapalaran sang malaot nga tawo nga gintalana sang Dios para sa iya.”

Naghambal si Job

21 Dayon nagsabat si Job, ² “Pamatii ninyo ako sing maayo agod mapalipay man ninyo ako. ³ Pamati kamo samtang nagahambal ako, kag kon makatapos na gani ako, yagutaa gihapon ninyo ako kon gusto ninyo. ⁴ Ang akon reklamo indi kontra sa tawo kundi sa Dios. Amo ini ang rason kon ngaa dali ako maakig. ⁵ Tan-awa bala ninyo ako kag makapanabon gid kamo sang inyo kamot sa inyo baba sa katingala, nga indi makapati sa natabo sa akon. ⁶ Kon hunahunaon ko ang mga nagakatabo sa akon, nagakurog ako sa kahadlok.

⁷ “Ngaa padayon nga nagakabuhi ang mga malaot? Nagatigulang pa sila kag nagamauswagon. ⁸ Kag makita pa nila ang pagdako sang ila mga anak kag mga apo. ⁹ Nagaestar pa sila sa ila mga balay nga wala sing katalagman kag wala sing may ginakahadlukan. Kag wala sila ginasilutan sang Dios. ¹⁰ Wala nagakapalyar sa pagpamata ang ila mga baka, kag wala ini ginahar-asi.^{[aa] 11} Ang ila mga bata madamo pareho sa mga karnero.^[ab] Nagasinaot sila, ¹² nagakinanta, kag nagakinalipay sa tukar sang tamborin, arpa kag plawta. ¹³ Nagakabuhi sila nga mainuswagon kag nagakalamatay nga malinong. ¹⁴ Pero nagasiling sila sa Dios, ‘Pabay-i lang kami! Wala kami nagahandom nga mahibaluan ang imo mga pamaagi. ¹⁵ Sin-o gid bala ikaw nga ginatawag Makagagahom? Ngaa dapat ka namon alagaron? Kag ano gid ang amon makuha kon magpangamuyo kami sa imo?’ ¹⁶ Pero ang matuod, ang ila pag-uswag wala naghalin sa ila kaugalingon nga pagpangabudlay. Gani kon ano man ang ilaygay sining mga malaot, indi gid ako magpamati.

¹⁷ “Diutay lang ang nagakapatay nga malaot nga mga tawo. Talagsa lang nagaabot sa ila ang kalisod ukon ang kasakit nga ginapadala sang Dios tungod sa iya kaakig. ¹⁸ Talagsa lang sila ginatabog nga daw sa dagami ukon upa nga ginapalid sang mabaskog nga hangin. ¹⁹ Nagasiling kamo nga kon indi sila pagsilutan sang Dios, ang ila mga kabataan amo ang iya silutan. Pero nagasiling ako nga ang nakasala amo ang dapat silutan sang Dios, agod maeksperiensyahan nila ²⁰ kag makita nila mismo ang ila kalaglagan. Pabay-i nga matilawan nila ang kaakig sang Makagagahom nga Dios. ²¹ Kay kon patay na sila wala na sila kalibutan sa nagakalatabo sa ila panimalay.

²² “Makatudlo bala ang tawo sa Dios, sanglit siya ang pinakamataas nga hukom? ²³ May mga tawo nga nagakapatay nga bugana kag matawhay ang ila kahimtangan, ²⁴ kag maayo ang ila lawas. ²⁵ May mga tawo man nga nagakapatay nga mapait ang ila kahimtangan, kag wala gid makatilaw sang maayo nga pangabuhi. ²⁶ Pero pareho lang sila nga ilubong sa duta kag pagakaunon sang mga ulod.

²⁷ “Nahibaluan ko gid kon ano ang inyo ginahunahuna. Nahibaluan ko ang inyo mga padihot kontra sa akon. ²⁸ Sugiran ninyo ako sang mga tawo nga manggaranon nga nagkalaguba ang ila mga balay tungod sa ila kalautan. ²⁹ Pero pamangkuta ang mga nagaalagi, kag pamatii ang ila mga ginasiling. Kay sugiran nila kamo ³⁰ nga bisan ang malaot nga mga tawo nagakaluwas sa adlaw nga mag-abot ang kalamidad tungod sa kaakig sang Dios. ³¹ Wala gid sing may nagasabdong sing hayag sa malaot nga tawo. Wala gid sing may nagabalos sa iya ginhimo. ³² Kon ilubong na siya, may nagaguwardya pa sang iya lulubngan. ³³ Madamo ang nagakumpanyar sa iya, kag ang duta nagahatag sang kapahuwayan sa iya.

³⁴ “Gani paano ninyo ako mapalipay sa inyo mga ginahambal nga wala sing pulos? Wala gid sing kamatuoran ang inyo ginasiling.”

Naghambal si Elifaz

22 Dayon nagsabat si Elifaz nga taga-Teman, ² “May mabulig bala ang tawo sa Dios, ukon bisan ang maalam nga tawo? ³ Mapalipay mo bala ang Makagagahom nga Dios kon matarong ka? May makuha bala siya sa imo kon wala sing kasawayan ang imo kabuhi? ⁴ Ginasabdong ka sang Dios kag ginasentensyahan indi tungod kay nagatahod ka sa iya, ⁵ kundi tungod kay puwerte na gid ang imo kalautan kag wala na sang untat ang imo pagpakasala. ⁶ Kay ginakuha mo nga wala sing kaluoy ang bayo sang imo isigkatawo bilang garantiya sa iya utang sa imo. ⁷ Wala mo ginahatagan sang tubig ang mga ginauhaw, kag wala mo man ginahatagan sang pagkaon ang mga ginagutom. ⁸ Ginagamit mo ang imo pagkagamhanan kag pagkadungganon sa pag-angkon sang duta. ⁹ Kon magpangayo sa imo sang bulig ang mga balo nga babayi, ginapapauli mo sila nga wala sing dala. Pati ang mga ilo wala mo ginatratar sing maayo. ¹⁰ Amo ina kon ngaa ginalibutan ka sang mga siod, kag nagaabot sa imo ang gulpi nga kahadlok. ¹¹ Amo ina kon ngaa nadulman ka kag indi makakita, kag ginalapawan sang baha.

¹² “Ang Dios ara sa pinakaibabaw sang langit, labaw pa sa pinakamataas nga mga bituon. ¹³ Amo ina kon ngaa nagasiling ka, ‘Wala nakahibalo ang Dios sa akon ginahimo. Natabunan siya sang gal-om, paano siya makahukom? ¹⁴ Ginalikupan siya sang madamol nga mga panganod, gani indi niya kita makita samtang nagalakat siya sa ibabaw sang langit.’

¹⁵ “Magpadayon ka bala sa pagsunod sa pagginawi nga dugay na nga ginasunod sang malaot nga mga tawo? ¹⁶ Nagkalamatay sila sa wala pa ang ila tion; pareho sila sa pundasyon sang balay nga gin-anod sang baha. ¹⁷ Nagsiling sila sa Makagagahom nga Dios, ‘Pabay-i lang kami! Ano bala ang mahimo mo para sa amon?’ ¹⁸ Pero ang Dios amo ang nagpuno sang ila mga balay sang maayo nga mga butang. Gani kon ano man ang ilaygay sining malaot nga mga tawo, indi gid ako magpamati.

¹⁹ “Kon makita sang matarong kag inosente nga mga tawo ang pagkalaglag sang malaot nga mga tawo, magakalipay sila kag magakadlaw sa ila. ²⁰ Magasiling sila, ‘Nalaglag gid ang aton mga kaaway, kag ginlamon sang kalayo ang ila pagkabutang.’

²¹ “Job, magpasakop ka sa Dios kag magpakighusay sa iya agod pakamaayuhon niya ikaw. ²² Batuna ang iya mga pagtudlo kag tipigi ang iya mga pulong sa imo tagipusuon. ²³ Kon magbalik ka sa Makagagahom nga Dios, kag kuhaon mo ang kalautan sa imo panimalay, ibalik niya ang imo maayo nga kahimtangan. ²⁴ Indi paghatagi sang bili ang imo mga bulawan; kabiga ina nga daw sa balas lang ukon daw sa mga bato lang sa suba. ²⁵ Dayon ang Makagagahom nga Dios mangin pareho sang bulawan kag malahalon nga pilak sa imo. ²⁶ Dayon masapwan mo ang kalipay nga nagahalin sa Makagagahom nga Dios, kag indi ka mahuya sa pagpalapit sa iya. ²⁷ Magapangamuyo ka sa iya kag pamatian ka niya, kag pagatumanon mo ang imo mga promisa sa iya. ²⁸ Ano man ang ginaplano mo nga himuon, matuman ini, kag mangin masanag ang imo alagyan. ²⁹ Kon may ara sang tawo nga nagakaluya, kag kon magpangamuyo ka sa Dios nga pabakuron siya, buligan niya ang amo nga tawo. ³⁰ Bisan ang tawo nga nakasala luwason niya paagi sa imo matarong nga kabuhi.”

Naghambal si Job

23 Dayon nagsiling si Job, ² “Hasta subong puwerte gid ang akon reklamo. Ginapaantos pa gid ako sang Dios sa pihak sang akon pag-ugayong.^{[ac] 3} Kon nahibaluan ko lang kon diin ko siya pangitaon; kon makakadto lang ako sa iya ginaestaran, ⁴ ihambal ko gid sa iya ang akon kaso kag ipresentar ko ang akon mga rason. ⁵ Gusto ko mahibaluan kon ano ang isabat niya sa akon, kag gusto ko intiendihon ang isiling niya. ⁶ Baison ayhan niya ako paagi sa iya gahom? Siyempre indi! Pamatian niya ang akon ihambal. ⁷ Ang matarong nga tawo nga pareho sa akon makarason sa atubangan sang Dios nga akon Manughukom, kag hilwayon niya ako hasta san-o.

^8-9 “Ginpangita ko ang Dios sa palibot—sa sidlangan, nakatundan, aminhan, kag bagatnan—pero wala ko siya makita. ¹⁰ Pero nahibaluan niya ang akon ginahimo. Sa tapos nga matilawan niya ako, masapwan niya nga matinlo ako pareho sa puro nga bulawan. ¹¹ Ginsunod ko ang iya mga pamaagi, kag wala gid ako naglikaw sa sini. ¹² Ginatuman ko permi ang iya sugo, kag ginatipigan ko ini sa akon tagipusuon.^{[ad] 13} Pero pagusto ang Dios sa iya ginahimo; wala sing may makabalabag sa iya. Ginahimo niya ang iya naluyagan. ¹⁴ Gani himuon niya ang iya ginplano nga himuon sa akon, kag madamo ang iya plano sa akon. ¹⁵ Amo gani nga nahadlok ako sa iya. Kon hunahunaon ko ini, puwerte ang akon kahadlok. ¹⁶ Ginpaluya kag ginpahadlok ako sang Dios nga Makagagahom. ¹⁷ Pero wala ako nag-untat sa pagreklamo bisan daw sa natabunan ako sang puwerte nga kadulom.

Nagpamangkot si Job Kon Ngaa Wala Ginasilutan sang Dios ang Malaot nga mga Tawo

24 “Ngaa wala nagatalana ang Makagagahom nga Dios sang tion sa paghukom sa malaot nga mga tawo? Ngaa wala makita sang mga nagakilala sa iya inang tion sa paghukom? ² Nagapanguha sang duta ang malaot nga mga tawo paagi sa paghalin sang mga muhon.^[ae] Nagapangawat sila sang mga sapat kag ginaimpon nila sa ila mga sapat. ³ Ginakawat nila ang mga asno sang mga ilo, kag ginakuha nila bilang garantiya sa utang ang baka sang balo nga babayi. ⁴ Ginapigos^[af] nila ang mga imol, gani napilitan ini nga magpanago. ⁵ Nagapangita sila sang ila pagkaon sa kamingawan pareho sa talunon nga mga asno. Halos wala na sing iban nga lugar nga mapangitaan nila sang pagkaon para sa ila mga anak. ⁶ Nagapanipot sila sang mga patubas sa uma, pati sa talamnan sang ubas sang malaot nga mga tawo. ⁷ Nagatulog sila kon gab-i nga ginatugnawan, kay wala sila sing habol kag kulang ang ila bayo. ⁸ Nagakabasa sila sang ulan nga nagatupa sa mga kabukiran, kag nagadasok sila sa higad sang mga bato tungod kay wala sila sing pasilungan.

⁹ “Ginakuha sang malaot nga mga tawo ang bata sang balo kag imol nga babayi bilang bayad sa utang. ¹⁰ Nagalakat ang mga imol nga kulang sing bayo; ginapapas-an sila sang mga inani nga uyas pero gutom sila. ¹¹ Ginapapuga sila sang olibo kag ubas, pero indi sila makatilaw sini. ¹² Mabatian sa siyudad ang mga pag-ugayong sang mga tagumatayon kag ang pagpangayo sang bulig sang mga napilasan sing grabe, pero wala gid pagbalusi sang Dios ang naghimo sing malain sa ila.

¹³ “May mga tawo nga nagakontra sa kasanag. Wala sila nagalakat sa kasanag kag wala nila ini naintiendihan. ¹⁴ Ang manugpatay nagabangon aga pa sa pagpatay sang mga imol, kag kon gab-i nagapangawat siya. ¹⁵ Ang nagapanginbabayi nagahulat magdulom agod wala sing may makakita sa iya. Ginatabunan niya ang iya nawong agod wala sing may makakilala sa iya. ¹⁶ Kon gab-i nagasulod ang mga kawatan sa mga balay, pero kon adlaw nagapanago sila, kay nagalikaw sila sa kasanag. ¹⁷ Ginakabig nila ang kadulom nga kasanag, kay mas gusto nila ang makahaladlok nga kadulom.

Ang Sabat sang Abyan ni Job

¹⁸ “Pero indi magadugay ang malaot nga mga tawo pareho sa bukal sang tubig. Ang duta nga ila ginapanag-iyahan ginapakamalaot sang Dios. Gani wala sing may nagakadto sa ila talamnan sang ubas. ¹⁹ Subong nga ang snow nagakatunaw kag nagakadula sa init, ang mga makasasala madula man sa kalibutan. ²⁰ Indi na sila pagdumdumon pa kundi kalimtan na sila bisan sang ila iloy. Laglagon sila pareho sa kahoy nga gin-utod, kag kaunon sila sang mga ulod. ²¹ Kay wala nila pagtratara sing maayo ang mga baw-as nga babayi. Kag wala nila ginakaluoyan ang mga balo nga babayi.

²² “Ginalaglag sang Dios ang gamhanan nga mga tawo paagi sa iya gahom. Bisan malig-on sila, wala sing kasiguruhan ang ila kabuhi. ²³ Posible nga tugutan sila sang Dios nga magkabuhi nga wala sing katalagman, pero ginabantayan gid sang Dios ang tanan nila nga hulag. ²⁴ Sa malip-ot nga tion nagauswag sila, pero sa indi madugay magakawala sila pareho sa bulak nga nagakalaya ukon pareho sa uhay nga gin-garab. ²⁵ Kon indi husto ang akon ginasiling, sin-o ang makapamatuod nga nagabutig ako? Sin-o ang makasiling nga sayop ako?”