Bible in 90 Days

³⁸ तर परमेश्वर तपाईं आफूले रोजेका राजाप्रति रिसाउनु भयो।
    अनि उनलाई एक्लै छाडी दिनु भयो।
³⁹ तपाईंले आफ्नो करार अस्वीकार गर्नु भएकोछ।
    तपाईंले राजाको मुकुट मैलामा फ्याँकिदिनु भयो।
⁴⁰ तपाईंले राजाको शहरका भित्ताहरू भत्काई झार्नु भयो।
    उनका सबै किल्लाहरू ध्वंश पार्नुभयो।
⁴¹ त्यताबाट भएर जाने मानिसहरूले उनका चीजहरू चोरे।
    उनका छिमेकीहरूले उसलाई खिसी गरेर हाँसे।
⁴² तपाईंले त्यस्तो गरेर राजाका शत्रुहरूलाई खुशी बनाउनु भयो।
    तपाईंले उनका शत्रुहरूलाई युद्ध जित्न दिनुभयो।
⁴³ परमेश्वर, तपाईंले उनीहरूको रक्षा गर्दै सघाउनु भयो।
    तपाईंले आफ्ना राजालाई युद्धमा सघाउनु भएन।
⁴⁴ तपाईंले उनलाई जित्न दिनु भएन।
    तपाईंले उनको राजगद्दी भूइँमा फ्याँकिदिनु भयो।
⁴⁵ तपाईंले उनको उमेर घटाई दिनु भयो
    तपाईंले उनलाई लज्जित पार्नुभयो।

⁴⁶ हे परमप्रभु, यस्तो कहिले सम्म चल्ने हो?
    के तपाईंले हामीलाई सधैँ उपेक्षा गर्नुहुन्छ?
    के तपाईंको क्रोध आगो जस्तो सधैँ बल्ने हो?
⁴⁷ याद गर्नुहोस् मेरो जीवन कति छोटो छः
    तपाईंले हामीलाई छोटो जीवन बाँच्नलाई रच्नुभयो।
⁴⁸ कोही पनि बाँच्ने छैन र कहिल्यै मर्दैन,
    कोही पनि चिहानबाट भाग्न पाउने छैन।

⁴⁹ हे परमेश्वर, तपाईंले विगतमा देखाउनु भएको प्रेम खै, कहाँ छ?
    तपाईंले दाऊदको परिवार प्रति विश्वासी हुनेछु भनेर प्रतिज्ञा दिनु भयो।
^50-51 हे स्वामी, कृपया याद गर्नुहोस्, मानिसहरूले कसरी तपाईंको दासलाई अपमान गरे।
हे परमप्रभु, मैले तपाईंका शत्रुहरूबाट ती सारा अपमानहरू सहनु पर्यो।
    ती मानिसहरूले तपाईंले रोजेको राजाको अपमान गरे।

⁵² परमप्रभुको सदा-सर्वदा प्रशंसा गर।
    आमेन! आमेन!

³ तपाईंले यस संसारमा मानिसहरू ल्याउनु हुन्छ
    अनि पछि तिनीहरूलाई धुलोमा परिणत गर्नुहुन्छ।
⁴ तपाईंको लागि हजारौं बर्षहरू पनि
    हिजो बितेको रात जस्तै लाग्दछ।
⁵ हामीलाई कसिंगर जस्तै बढार्नुहुन्छ।
    हाम्रो जीवन बिहानै हराएर विलाई जाने सपना जस्तै छ।
हामी घाँस जस्तै छौ।
⁶     बिहान पख घाँस उम्रन्छ
    अनि बेलुकी यो ओइलाएर मर्छ।
⁷ हे परमेश्वर, तपाईंको रीसले हामीलाई ध्वंश गर्न सक्छ।
    तपाईंको क्रोधले हामीलाई भयभीत पार्दछ।
⁸ तपाईं हाम्रो सबै पापहरू जान्नु हुन्छ।
    हे परमेश्वर, तपाईंले हाम्रो गुप्त पापहरू सबै देख्नुहुन्छ।
⁹ तपाईंको क्रोधले हाम्रो जीवन समाप्त गर्न सक्छ।
    कानेखुसी जस्तै हाम्रो जीवन धमिलिदै जान्छ।
¹⁰ हामी सत्तरी बर्षसम्म बाँच्न सक्छौं,
    यदि अझ बलियो भए अस्सी बर्षसम्म बाँच्न सक्छौं।
हाम्रो जीवन कठिन काम र पीडाले भरिएको छ।
    त्यसपछि अचानक हाम्रो जीनव सिद्धिएर जान्छ अनि हामी उडेर टाढा जान्छौं।
¹¹ हे परमेश्वर! वास्तवमा कसैले पनि तपाईंको क्रोधपूर्ण शक्तिलाई जान्दैन।
    तर हाम्रो डर र तपाईं प्रतिको आदर तपाईंको क्रोध जतिकै महान् छ।
¹² हाम्रो जीवन कति छोटो छ भनेर हामीलाई सिकाउनु होस,
    ताकि हामी साँच्चि नै ज्ञानी हुन सकौं।
¹³ हे परमप्रभु, सधैँ हाम्रो पछाडि आउनुहोस्।
    आफ्ना दासहरू प्रति दयालु हुनुहोस्।
¹⁴ प्रत्येक बिहान आफ्नो प्रेमले हामीलाई भरिदिनु होस्।
    हामी सुखी रहौं र रमाइलो जीनव बिताऔं।
¹⁵ तपाईंले हामीलाई हाम्रो जीवनमा अति उदासीनता र सङ्कटहरू दिनुभयो।
    अब हामीलाई खुशी वा सुखी पार्नुहोस्।
¹⁶ तपाईंका दासहरूले आश्चर्यपूर्वक थोकहरू देखुन्,
जुन तपाईंले तिनीहरूका लागि गर्न सक्नु हुन्छ,
    अनि उनीहरूका नानीहरूले तपाईंको महिमा देख्न सकुन्।
¹⁷ हाम्रो परमप्रभु परमेश्वर, हाम्रो निम्ति कृपालु बन्नु होस्।
    हामी जे काम गछौ त्यो फलदायक होस,
    हामी जे काम गछौं परमेश्वरले सफल पारी दिऊन्।

¹ तिमी सर्वोच्च परमेश्वरकहाँ लुक्न जान सक्छौ।
    तिमी सर्वशक्तिमान् परमेश्वरकहाँ सुरक्षाको लागि जान सक्छौ।
² म परमप्रभुलाई भन्दछु, “तपाईं मेरो सुरक्षा र मेरो किल्ला हुनुहुन्छ।
    मेरो परमेश्वर, म तपाईंमाथि भरोसा गर्दछु।”
³ परमेश्वरले तिमीलाई लुप्त विपदहरू
    र डरलाग्दो बिमारीहरूबाट जोगाउनुहुन्छ।
⁴ तिमी सुरक्षाको लागि परमेश्वर कहाँ जान सक्छौ।
उहाँले तिमीहरूलाई रक्षा गर्नुहुनेछ,
    जसरी एउटा चराले आफ्ना पखेंटाहरू फिँजाएर आफ्ना बच्चाहरूको सुरक्षा गर्दछ।
    परमेश्वर तिमीहरूका सुरक्षाका लागि ढाल र पर्खालहरू जस्ता हुनुहुन्छ।
⁵ तिमीहरू राती व्यर्थमा डराउने कामै छैन
    अनि दिनमा पनि तिमी आफ्ना शत्रुहरूको काँडहरूसित डराउने छैनौं।
⁶ तिमी राती चल्ने रूढीदेखि डराउने छैनौ।
    र दिउँसो क्षय गर्ने नाशदेखि पनि डराउने छैनौ।
⁷ तपाईंले एक हजार शत्रुहरूलाई परास्त गर्नु हुनेछ।
    तपाईंको आफ्नै दाहिने हातले दश हजार शत्रुका सेनाहरूलाई परास्त पार्नेछ।
    ती शत्रुहरूले तपाईंलाई छुँदैनन् पनि।
⁸ हेर मात्र, अनि तिमीले देख्ने छौ
    ती दुष्ट मानिसहरू दण्डित भएको।
⁹ किनभने तिमी परमप्रभुमा भरोसा गर्दछौ।
    तिमीले सर्वोच्च परमेश्वरलाई आफ्नो सुरक्षाको ठाउँ बनायौ।
¹⁰ तिमीलाई केही नराम्रो हुनेछैन।
    त्यहाँ तिम्रो घरमा कुनै प्रकारको रोग हुने छैन।
¹¹ परमेश्वरले तिमीहरूको लागि स्वर्गदूतहरूलाई आज्ञा दिनु हुनेछ,
अनि तिनीहरूले तिमीहरूलाई जहाँ जाँदा पनि रक्षा गर्नेछन्।
¹² तिनीहरूका हातहरूले तिमीहरूलाई पक्रनेछन्,
    त्यसैकारण तिमीहरूले आफ्नो खुट्टा ढुङ्गामा बजार्नु पर्दैन।
¹³ तिमीहरूले सिंहहरूमाथि
    र विषालु सर्पहरूमाथि हिंड्ने शक्ति पाउनेछौ।
¹⁴ परमप्रभु भन्नुहुन्छ, “यदि कुनै मानिसले ममा भरोसा गर्दछ भने,
म उसलाई बचाउँने छु।
    जसले मेरो नाउँलाई उपासना गर्दछ म मेरो भक्तजनहरूलाई रक्षा गर्नेछु।
¹⁵ मेरो भक्तजनहरूले सहयोगको निम्ति मलाई डाक्ने छन्।
अनि म तिनीहरूलाई जवाफ दिने छु
    म तिनीहरूको दुःखको बेलामा साथ रहनेछु,
    म तिनीहरूलाई मुक्त गर्ने छु र सम्मान गर्ने छु।
¹⁶ अनि मेरा भक्तजनहरूलाई दीर्घायु दिनेछु
    अनि तिनीहरूलाई बचाउँनेछु।”

⁹ हे परमप्रभु, तपाईंका सम्पूर्ण शत्रुहरू नाश हुनेछन्।
    सम्पूर्ण ती मानिसहरू जसले पाप कामहरू गरे तिनीहरू नष्ट हुनेछन्।
¹⁰ तर तपाईंले मलाई बलियो बनाउनु भयो।
म दरिलो सींङहरू भएको साँढे जस्तै हुनेछु।
    तपाईंले खास कामको लागि मलाई रोज्नुभयो,
    तपाईंले आफ्ना ताजा तेलहरू ममाथि खन्याउनु भयो।
¹¹ मैले मेरो शत्रुहरू वरिपरि भएको देखें।
तिनीहरू मलाई आक्रमण गर्न तयार भएका विशाल साँढेहरू जस्ता छन्।
    मेरो बारेमा तिनीहरूले के कुरा गरिरहेका छन् सो मैले सुनें।

¹² असल मानिसहरू लेबानेनमा
    परमप्रभुको मन्दिरमा रोपिएको देवदारू जस्ता छन्,
¹³ परमप्रभुको मन्दिरमा रोप्न लगिएको धर्मी मानिसहरू
    हाम्रो परमेश्वरको मन्दिरको प्राङ्गणमा फुलिरहेकाछन्।
¹⁴ तिनीहरू बृद्ध भए तापनि
    तिनीहरूले नयाँ र स्वस्थ रूखले जस्तै लगातार फल उत्पादन गरिरहने छन्।
¹⁵ तिनीहरू त्यहाँ हुनु नै “परमप्रभु असल हुनुहुन्छ,” भन्नलाई नै हो।
    उहाँ मेरो चट्टान हुनुहुन्छ, अनि उहाँले अनुचित काम गर्नुहुन्न।

¹ परमप्रभु राजा हुनुहुन्छ।
    उहाँले वैभवी अनि सामर्थ्यपूर्ण पोषाकहरू लगाउनु हुन्छ।
उहाँ तयार हुनुहुन्छ यसैले सारा संसार सुरक्षित छ, यो नष्ट हुनेछैन।
² परमेश्वर, तपाईंको राज्य सदा-सर्वदा चल्ने छ।
    परमेश्वर, तपाईं अनन्त सम्म बाँच्नु भयो।
³ हे परमप्रभु नदिहरूको आवाज अति गर्जनपूर्ण छ।
    जोडसँग आउने छालहरू गर्जनपूर्ण छन्।
⁴ जोडसँग आउने समुद्रका छालहरू गर्जनपूर्ण र शक्तिशली छन्
    तर परमप्रभु तिनीहरू भन्दा अझ शक्तिशाली हुनुहुन्छ।
⁵ हे परमप्रभु, तपाईंको नियम सदा-सर्वदा चल्ने छ।
    तपाईंको पवित्र मन्दिर धेरै कालसम्म रहनेछ।

¹ हे परमप्रभु, तपाईं परमेश्वर हुनहुन्छ,
जसले मानिसहरूलाई दण्ड दिन्छ।
    तपाईं परमेश्वर हुनुहुन्छ जसले मानिसहरू प्रति दण्ड लिएर आउँछन्।
² तपाईं सारा पृथ्वीका न्याय पालक हुनुहुन्छ।
    अहंकारी मानिसहरूलाई दण्ड दिनुहोस् जो त्यसका लायक छन्।
³ हे परमप्रभु, कहिले सम्म दुष्ट मानिसहरूले खेलाँची गर्नेछन्?
    कहिले सम्म परमप्रभु?
⁴ कहिलेसम्म ती दुष्टकर्मीहरूले
    भयङ्कर कामहरू गर्नेछन्?
⁵ हे परमप्रभु, तिनीहरूले तपाईंको मानिसहरूलाई कष्ट दिए।
    तिनीहरूले नै तपाईंका मानिसहरूलाई दुःखी, पीडित बनाए।
⁶ ती दुष्ट मानिसहरूले हाम्रा देशमा बसिरहेका विधवाहरू र परदेशीहरूलाई मारे।
    तिनीहरूले माता-पिता नभएका नानीहरूलाई हत्या गरे।
⁷ अनि तिनीहरूले भने परमप्रभुले तिनीहरूले गरिरहेका नीच कामहरू देख्दैनन्।
    तिनीहरूले भने कि इस्राएलका परमेश्वरले के भईरहेछ त्यो केही पनि जान्दैनन्।

⁸ तिमी अबुझ मानिसहरू तिमीहरू कहिले ज्ञानी हुन्छौ?
    हे मूर्खहरू हो तिमीहरू कहिले चेतनशील हुन्छौ?
तिमी पापी मानिसहरू अति हरिलट्ठक छौ।
    तिमीहरूले बुझ्नै पर्छ।
⁹ परमेश्वरले हाम्रो कानहरू बनाउनु भयो,
    निश्चय नै जसले कान बनायो उसले सुन्न सक्नुहुन्छ।
परमेश्वरले आँखा बनाउनु भयो,
    निश्चय नै के भइरहेको छ त्यो देख्न पनि सक्नुहुन्छ।
¹⁰ परमेश्वरले ती मानिसहरूलाई अनुशासनमा राख्नु हुनेछ।
    ती मानिसहरूले के गर्नु पर्ने परमेश्वरले सिकाउनु हुनेछ।
¹¹ मानिसहरूले के सोचिरहेछन् परमेश्वर जान्नुहुन्छ।
    परमेश्वर जान्नुहुन्छ कि मानिसहरू हावाका झोंका मात्र हुन्।
¹² मानिस जसलाई परमप्रभुले अनुशासनमा राख्नु भएको छ त्यो सुखी हुनेछ।
    परमेश्वरले त्यस मानिसलाई ठीक तरिकाले बाँच्ने बाटो बताउनु हुनेछ।
¹³ हे परमेश्वर, तपाईंले त्यस मानिसलाई सहयोग गर्नु हुनेछ,
जो सङ्कट आईपर्दा बिछिन्न हुँदछ।
    जब सम्म ती दुष्ट मानिसहरूलाई चिहानमा पुरिदैन,
    त्यसलाई शान्ति बस्न तपाईंले सहायता गर्नु हुनेछ।
¹⁴ परमप्रभुले आफ्ना मानिसहरूलाई त्याग्नु हुन्न,
    उहाँले तिनीहरूलाई सहयोग गर्न छोड्नुहुन्न।
¹⁵ न्याय फर्केर निर्मलतासित आउने छ।
    अनि त्यहाँ असल, ईमान्दारी मानिसहरू हुनेछन्।

¹⁶ कसैले पनि मलाई दुष्ट मानिसहरूको विरूद्ध लड्न सघाएनन्।
    कोही पनि मसँग ती नीच कर्म गर्ने मानिसहरूको विरूद्ध लडाईँ गर्न उभिएनन्।
¹⁷ यदि परमप्रभुले मलाई सहायता नगर्नु भएको भए,
    मृत्युद्वारा म मौन भइसकेको हुन्थें।
¹⁸ म जान्दछु कि म पतन हुन लागेको थिएँ,
    तर परमप्रभुले आफ्नो चेलालाई सहायता गर्नुभयो।
¹⁹ म अत्यन्त चिन्तीत र हड्बडिएको थिएँ
    तर परमप्रभु, तपाईंले मलाई सान्त्वना दिनुभयो अनि खुशी पार्नुभयो!

²⁰ परमेश्वर, कपटी न्यायकर्त्तालाई सहयोग नगर्नुहोस्।
    ती दुष्ट न्यायकर्ताहरूले साधारण जनताको लागि,
    कठिन जीवन यापन गर्ने नियमहरू बनाउँदछन्।
²¹ त्यस्ता न्यायकर्ताहरूले असल मानिसहरूलाई आक्रमण गर्दछन्।
    तिनीहरूलाई दोषी साबित गरेर मार्न लगाउँछन्।
²² तर मेरो परमप्रभु, उच्च पर्वतमाथि मेरो सुरक्षाको ठाउँ हुनुहुन्छ।
    परमेश्वर मेरो चट्टान हुनुहुन्छ, मेरो सुरक्षाको ठाउँ।
²³ परमेश्वरले भयङ्कर कार्य गर्ने ती दुष्ट न्यायकर्ताहरूलाई दण्ड दिनुहुनेछ।
    परमेश्वरले तिनीहरूलाई नष्ट गर्नुहुनेछ किनभने तिनीहरूले पाप गरे।
    परमप्रभु हाम्रा परमेश्वरले ती पापी न्यायकर्ताहरूलाई नष्ट गर्नुहुनेछ।

आज हामी उहाँका भेंडाहरू हौं।
⁸     परमेश्वर भन्नुहुन्छ, “तिमीहरूले “मरीबामाको” जंङ्गलमा हुँदा झैं,
    अनि “मस्साको” मरुभूमिमा गरे झैं जिद्दी नगर।
⁹ तिम्रा पिता-पुर्खाहरूले मलाई जाँच गरे, तिनीहरूले मलाई जाँचे,
    तर तिनीहरूले म के गर्न सक्थें भन्ने कुरा देखे।
¹⁰ चालीस बर्षसम्म मैले ती मानिसहरूको गन-गन सहेर बसें।
    अनि म जान्दथिएँ कि तिनीहरू आज्ञाकारी थिएनन्।
    तिनीहरूले मेरो शिक्षाहरू लिन अस्वीकार गरे।
¹¹ यसैले मेरो रीसमा तिनीहरू
    ‘मेरो विश्रामको भूमिमा पस्ने छैनन’ भनी मैले प्रतिज्ञा गरें।”

¹ परमप्रभुले गर्नु भएको नयाँ कुराहरूका बारेमा नयाँ गीत गाऊ,
    सारा संसारले परमप्रभु प्रति गीत गाउन्।
² परमप्रभु प्रति गाऊ, उहाँको नाउँको प्रशंसा गर!
    सुसमाचार भन, प्रत्येक दिन उहाँको मुक्तिको विषयमा कुरा गर।
³ “परमप्रभु साँच्चि नै अद्भूत हुनुहुन्छ” भनेर मानिसहरूलाई भन,
परमेश्वरले गर्नु हुने आश्चर्यचकित चीजहरूका विषयमा राष्ट्रहरू माझ भन।
    सृजना गर्नु हुने अचम्मका कामहरूको बारेमा मानिसहरूलाई भन।
⁴ परमप्रभु महान् हुनुहुन्छ र प्रशंसाको योग्य हुनुहुन्छ।
    उहाँ अन्य सबै “देवताहरू” को भन्दा अझ उहाँकै डर राख्नु पर्छ।
⁵ अन्य जातिहरूका सबै “देवताहरू” खाली मूर्तिहरू मात्र हुन्।
    तर परमेश्वरले स्वर्ग बनाउनुभयो।
⁶ उहाँको समक्षमा आदर र महिमा चम्किरहेको छ।
    परमेश्वरको पवित्र मन्दिरमा शक्ति र सौन्दर्य छ।
⁷ परिवारहरू, जातिहरू परमप्रभुको प्रशंसा
    र महिमाको गीत गाऔं।
⁸ परमप्रभुको नाउँको प्रशंसा गर
    आफ्ना बलिहरू ल्याऊ र मन्दिर तर्फ जाऊ।
⁹     पवित्रताको सौन्दर्यसित परमप्रभुको उपासना गर।
पृथ्वीमा प्रत्येक मानिसले परमप्रभुको उपासना गर।
¹⁰     जाति-जातिहरूलाई घोषणा गर, परमप्रभु नै राजा हुन्,
ताकि संसार नष्ट नहोस्।
    परमप्रभुले निष्पक्ष रूपमा संसारमा राज गर्नुहुनेछ।
¹¹ हे आकाश, खुशी हो! हे पृथ्वी, आनन्दित बन!
    यसमा भएका समुद्र र प्रत्येक थोक खुशीले कराऊ, चिच्याऊ।
¹² खेतहरू र त्यसमा उब्जने प्रत्येक चीज, खुशी बन।
    जङ्गलका रूखहरू, गाऊ र खुशी बन!
¹³ जव तिनीहरूले परमप्रभु आईरहेको देख्नेछन्,
    परमप्रभु संसारमा राजगर्न आउँदै हुनुहुन्छ,
परमप्रभुले संसारमा भएका राज्यहरूमा
    पक्षपात नगरी न्याय र राज्य गर्नुहुनेछ।

¹ परमप्रभुले राज गर्नु हुन्छ र पृथ्वी खुशी हो।
    सबै सुदूरतिरका देशहरू खुशी हुन्छन्।
² बाक्लो बादलहरूले परमप्रभुलाई घेरी राखेको छ।
    धर्म र न्यायले यस राज्यलाई बलियो बनाउँदछ।
³ परमप्रभुको सामुन्नेबाट एउटा आकाश जाँदछ,
    अनि उहाँका शत्रुहरूलाई नाश गर्दछ।
⁴ उहाँको बिजुली आकाशमा झलाक-झिलिक चम्किन्छ।
    मानिसहरू यसलाई देख्छन् र डराउँछन्।
⁵ परमप्रभुको, समक्ष पर्वतहरू मैन जस्तो पग्लन्छन्,
    सारा पृथ्वीका स्वामीको सामुन्ने।
⁶ हे आकाश, उहाँको धार्मिकताको बारे बताऊ।
    ताकि परमेश्वरको महिमा सारा मानिसहरूले देखुन्।

⁷ मानिसहरू आफ्ना मूर्तिहरू पूजा गर्छन्।
    तिनीहरू आफ्ना “देवताहरूका” विषयमा घमण्ड गर्दछन्।
तर ती मानिसहरू लज्जित हुनेछन्।
    तिनीहरूका “देवताहरू” शिर झुकाएर परमप्रभुलाई उपासना गर्नेछन्।
⁸ हे सियोन, सुन अनि खुशी बन!
    हे यहूदाका शहरहरू, खुशी होऊ।
    किनभने परमप्रभुले बुद्धिमानी निर्णयहरू गर्नु भयो।
⁹ सर्वोच्च परमप्रभु, तपाईं नै वास्तवमा पृथ्वीका शासक हुनुहुन्छ।
    तपाईं अन्य “देवताहरू” भन्दा धेरै असल हुनहुन्छ।
¹⁰ मानिसहरू जसले परमप्रभुलाई प्रेम गर्दछ उसले दुष्टतालाई घृणा गर्छ।
    परमेश्वरले धूर्तहरूबाट उहाँका भक्तजनहरूलाई बचाउँनु हुँदछ।
¹¹ धर्मी मानिसहरूमा उज्यालो र खुशीयाली चम्कन्छ।
¹² धर्मी मानिसहरू, परमप्रभुमा खुशी होऊ।
    उहाँको पवित्र नाउँको आदर गर।

¹ परमप्रभु नै राजा हुनुहुन्छ,
    यसैले सारा जातिहरू डरले काम्छन्।
परमेश्वर राजा सरह करूब स्वर्गदूतहरूमा बस्नु हुन्छ।
    यसैले सारा संसार डरले काम्दछ।
² सियोनमा परमप्रभु महान् हुनुहुन्छ!
    उहाँ सम्पूर्ण मानिसहरूमाथि महान् अगुवा हुनुहुन्छ।
³ सारा मानिसहरूले तपाईंको नाउँको गुण-गान गरून्।
    परमेश्वरको नाउँ विस्मयकारक छ।
    परमेश्वर पवित्र हुनुहुन्छ।
⁴ शक्तिशाली राजाले न्याय मनपराउनु हुन्छ।
    परमेश्वर, तपाईंले मंगलमयता बनाउनु भयो।
    तपाईंले याकूबमा धार्मिकता र निष्पक्षता ल्याउनुभयो।
⁵ परमप्रभु हाम्रो परमेश्वरको प्रशंसा गर
    अनि उहाँको पवित्र पाउदानमा^[a] दण्डवत गर।
⁶ मोशा र हारून उहाँका केही पूजाहारीहरू मध्ये थिए।
    तिनीहरू मध्ये शमूएल हुन् जसले परमेश्वरको नाम पुकारे।
तिनीहरूले परमेश्वरलाई प्रार्थना गरे,
    अनि उहाँले तिनीहरूलाई जवाफ दिनुभयो।
⁷ परमेश्वर अग्ला बादलबाट बोल्नु भयो।
    तिनीहरूले उहाँको विधिहरू पालन गरे
    अनि परमेश्वरले तिनीहरूलाई नियम प्रदान गर्नुभयो।
⁸ हे परमप्रभु हाम्रा परमेश्वर, तपाईंले तिनीहरूको प्रार्थनाको जवाफ दिनुभयो।
    तपाईंले आफू क्षमादायी परमेश्वर अनि नीच काम गर्ने मानिसहरूलाई
    दण्ड दिनेको रूपमा दर्शाउनु भयो।
⁹ हाम्रा परमप्रभु परमेश्वरको प्रशंसा गर।
    हाम्रो परमेश्वर साँच्चि नै पवित्र हुनुहुन्छ।
    उहाँको पवित्र पर्वत तर्फ दण्डवत् गर।

⁶ म मानिसहरूलाई संसारभरि नै हेर्नेछु जसमाथि भरोसा गर्न सकिन्छ
    अनि तिनीहरूलाई मात्र मेरो सेवा गर्न दिन लाउने छु।
    खाली त्यस्ता मानिसहरू मात्र मेरो दासहरू हुन सक्छन् जो शुद्ध जीवन जिउँछ।
⁷ म मेरो घरमा झूटाहरू बस्न दिने छैन।
    म झूट बोल्नेहरूलाई आफू नजिक बस्न दिने छैन।
⁸ यस देशमा बसिरहेका दुष्ट मानिसहरूलाई सधैँ नाश गर्नेछु।
    परमेश्वरको शहरबाट जानलाई म ती सब दुष्टहरूलाई बाध्य पार्नेछु।

¹¹ दिनको अन्तिम प्रहरमा लामो छायाँहरू जस्तो मेरो जीवन प्रायः सुकिसक्यो।
    म सुख्खा र ओइलिएको घाँस सरह मर्दै जाँदैछु।
¹² तर परमप्रभु, तपाईं सदा-सर्वदा बाँच्नु हुनेछ।
    तपाईंको नाउँ सदा-सर्वदा र अनन्त सम्म रहनेछ।
¹³ तपाईं उठ्नु हुनेछ र सियोनलाई सान्त्वना दिनु हुनेछ।
    तपाईं सियोन प्रति कृपालु हुनुहुनेछ त्यो समय आइरहेछ।
¹⁴ तपाईंका दासहरूले उनको, ढुङ्गाहरू मन पराउनेछ,
    तिनीहरूले त्यो शहरको धूलोलाई सम्म मन पराउने छन्।
¹⁵ मानिसहरूले परमप्रभुको नाउँको उपासना गर्नेछन्।
    परमेश्वर, पृथ्वीमा भएका राजाहरूले तपाईंलाई सम्मान गर्नेछन्।
¹⁶ परमप्रभुले फेरि सियोन बनाउँनु हुनेछ।
    मानिसहरूले फेरि उहाँको महिमा देख्नेछन्।
¹⁷ परमेश्वरले जिउँदै छाड्नु भएका मानिसहरूको प्रार्थनाहरूको जवाफ दिनुहुनेछ।
    परमेश्वरले तिनीहरूको प्रार्थना सुन्नुहुनेछ।
¹⁸ यी कुराहरू आउने भविष्यका सन्तानहरूको निम्ति लेख
    अनि भविष्यमा, ती मानिसहरूले परमप्रभुको प्रशंसा गर्नेछन्।
¹⁹ परमप्रभुले आफ्ना पवित्र स्थानबाट तलतिर हेर्नुहुनेछ।
    परमप्रभुले स्वर्गबाट तल पृथ्वीमा हेर्नुहुनेछ।
²⁰ अनि उहाँले कैदीहरूका प्रार्थनाहरू सुन्नुहुनेछ।
    उहाँले मृत्यु घोषित भइसकेका मानिसहरूलाई मुक्ति दिलाई दिनुहुनेछ।
²¹ तब सियोनका मानिसहरूले परमप्रभुको बारेमा भन्नेछन्।
    तिनीहरूले उहाँको नाउँलाई यरूशलेममा प्रशंसा गर्नेछन्।
²² जातिहरू परस्परमा भेला हुनेछन्।
    राज्यहरू परमप्रभुको सेवा गर्नलाई आउने छन्।

²³ मेरो बलले मलाई नै असफल तुल्यायो।
    मेरो जीवन छोटो भएर घट्‌यो।
²⁴ यसकारण मैले भने, “मलाई ठिटौली बेलामा नै मर्न नदिनुहोस्।
    परमेश्वर तपाईं सदा-सर्वदा बाँच्नु हुनेछ।
²⁵ धेरै बर्ष पहिले, तपाईंले यो संसार बनाउनु भयो।
    तपाईंले आफ्नै हातद्वारा यो आकाश बनाउनु भयो।
²⁶ संसार र यो आकाश समाप्त होला तर तपाईं सर्वदा रहनु हुनेछ।
    तिनीहरूले लुगाहरू खोले जस्तै गर्नेछन्,
अनि लुगाहरू जस्तै, तपाईं तिनीहरूलाई परिवर्तन गर्नुहुनेछ।
    तिनीहरू सबै परिवर्तन हुनेछन्।
²⁷ तर तपाईं परमेश्वर, कहिल्यै बद्लिनु हुन्न।
    तपाईं सदा-सर्वदा जीवित रहनु हुन्छ।
²⁸ हामी आज तपाईंका दासहरू हौं।
हाम्रा नानीहरू यहाँ छन्।
    अनि तिनीहरूका सन्तानहरू पनि यहाँ तपाईंको उपासना गर्नेहरू हुनेछन्।”

¹ हे मेरो आत्मा परमप्रभुको प्रशंसा गर।
    हे परमप्रभु मेरो परमेश्वर, तपाईं महान् हुनुहुन्छ!
तपाईं आदर र महिमाले सजिएको हुनुहुन्छ।
²     तपाईं ज्योति पहिरनु हुन्छ जसरी मानिसहरू पोशाक पहिरिन्छन्।
तपाईं पर्दा जस्तै आकाशहरू फैलाउनु हुन्छ।
³     परमेश्वर, तपाईंले तिनीहरूमाथि आफ्नो घर बनाउनु भयो।
तपाईंले बाक्लो बादलहरू रथ सरह चलाउनु भयो,
    अनि बतासको पखेंटाहरूमा आकाश तरेर चढ्नुभयो।
⁴ परमेश्वर, तपाईंले आफ्ना स्वर्गदुतहरूलाई बतास जस्ता
    अनि आफ्ना दासहरूलाई आगोको ज्वाला जस्तै^[b] बनाउनु भयो।
⁵ हे परमेश्वर, तपाईंले यसको आधारमा पृथ्वी बनाउनु भयो,
    यसैले यो ध्वंश हुने छैन।
⁶ तपाईंले यसलाई वस्त्रले जस्तै पानीले ढावनु भयो।
    पानीले पर्वतहरू छोपीए।
⁷ तपाईंले आज्ञा दिनुभयो, अनि पानी आतूरी गर्दै निष्कियो।
    परमेश्वर, तपाईं पानीमा चिच्याउनु भयो, अनि पानी आतूरी गर्दै निस्कियो।
⁸ पानी पर्वतहरूबाट तल र्झन थाल्यो, खाडीहरूमा झर्दै,
    र त्यसपछि ती ठाउँहरू तर्फ लाग्यो जुन तपाईंले बनाउनु भयो।
⁹ तपाईंले समुद्रहरूको सीमा तयार पार्नु भयो
    ताकि पानी कहिल्यै पृथ्वी तर्फ उर्लेर ढाक्ने छैन।

¹⁰ हे परमेश्वर, तपाईंले पानीलाई झरनाहरूबाट नदीहरूतिर बहने बनाउनु भयो।
    यो पर्वतहरूको जलस्रोतबाट तलतिर बहन्छ।
¹¹ नदीहरूको पानी सारा जंङ्गली जनावरहरूको निम्ति हो
    अनि यहाँसम्म कि जंङ्गली गधाहरू पनि यहाँ पानी पिउन आउँछन्।
¹² जङ्गली चरा-चुरूङ्गीहरू पोखरी भए तिर बस्न आउँदछन्।
    तिनीहरू छेउकै रूखका हाँगामा बसेर गाउँदछन्।
¹³ परमेश्वरले बर्षालाई पर्वतहरूमा पठाउनु हुन्छ।
    चीचहरू जुन परमेश्वरले सृष्टि गर्नुभयो र पृथ्वीलाई दिनु भयो ती त्यसैको आवश्यकता हुन्।
¹⁴ परमेश्वरले पशुहरूको आहारको निम्ति घाँस उमार्नु भयो।
    उहाँले हामीलाई सागपातहरू रोप्नलाई दिनुभयो।
    जसलाई हामी हुर्काउने काम गछौं।
    ती सागपातहरूले पृथ्वीदेखि हामीलाई भोजन दिन्छन्।
¹⁵ परमेश्वरले हामीलाई दाखरस दिनुहुन्छ, जसले हामीलाई खुशी तुल्याउँछ,
    तेल जसले हाम्रो छाला नरम पार्दछ,
    अनि भोजन जसले हामीलाई बलियो बनाउँदछ।

¹⁶ लबानोनको विशाल देवदारू रूखहरू परमप्रभुको सम्पत्ति हुन्।
    परमप्रभुले ती रूखहरू रोप्नु भयो अनि त्यसलाई आवश्यकता भरि पानी दिनु भयो।
¹⁷ चरा-चुरूङ्गीहरूले त्यसैमा गुँड लगाउँछन् अनि त्यहाँ बस्छन्।
    सल्लाका रूखहरूमा सारसहरू फिंजिएर बस्दछन्।
¹⁸ उच्च पर्वतहरू जंङ्गली बाख्राहरूको लागि घर हुन्।
    विशाल चट्टानहरू खरायोहरूको लागि लुक्ने ठाउँ हुन्।

¹⁹ परमेश्वर जब बिदाहरू प्रारम्भ हुन्छ तपाईंले हामीलाई दर्शाउनुका लागि जुन दिनुभयो।
    अनि घामले कहिले अस्ताउनु पर्छ त्यो जान्दछ।
²⁰ तपाईंले अन्धकार पार्नु भयो रात हुनलाई,
    त्यस समय जङ्गली पशुहरू बाहिर निस्कन्छन् र चारैतिर घुम्दछन्।
²¹ सिंहहरूले आक्रमण गर्दा परमेश्वरलाई आहार मागे झै गरी गर्जन्छन
    जुन उहाँले तिनीहरूको निम्ति व्यवस्था गरिदिनु हुन्छ।
²² त्यसपछि घाम उदाउँछ, अनि पशुहरू आफ्ना घर तर्फ फर्कन्छ
    अनि विश्राम गर्दछन्।
²³ तब मानिसहरू आफ्नो काम धन्दा तिर लाग्दछन्
    अनि साँझ सम्म काम गरि रहन्छन्।

²⁴ हे परमप्रभु, तपाईंले धेरै चकित थोकहरू गर्नुभयो।
    पृथ्वी त्यही थोकहरूले भरिपूर्ण भई भरिएको छ।
    हामी जताततै प्रत्येक थोकमा तपाईंको बुद्धिमता देख्छौं।
²⁵ समुद्रलाई हेर त्यो कति ठूलो छ।
    अनगन्ती प्राणीहरूले त्यो भरिएकोछ।
    त्यहाँ ससाना र विशाल अनगन्ति प्राणीहरू छन्।
²⁶ त्यस समुद्रमा जहाजहरू चल्दछ,
    लिब्यातान समुद्रमा खेल्छ।
    महा-सागरमा समुद्री प्राणी तपाईंले सृष्टि गर्नुभयो।

²⁷ परमेश्वर, ती सारा जीवित प्राणीहरू तपाईंमा आश्रित छन्
    तपाईंले ठीक समयमा तिनीहरूलाई भोजन दिनुहुन्छ।
²⁸ परमेश्वर, तपाईंले सारा प्राणीहरूलाई भोजन दिनुहुन्छ।
    तपाईंले आफ्ना हातहरू खोलेर, राम्रो पौष्टिक भोजन दिनुहुन्छ,
    अनि तृप्त नहुन्जेलसम्म तिनीहरू खान्छन्।
²⁹ जब तपाईं तिनीहरूबाट टाढा फर्किनुहुन्छ,
    तिनीहरू भयभीत हुन्छन्।
तिनीहरूका आत्माले तिनीहरूलाई छोड्छ, तिनीहरू कमजोर भएर मर्छन्
    अनि तिनीहरूका शरीरहरू फेरि धूलोको कण नै बन्दछन्।
³⁰ तर हे परमप्रभु, जब तपाईंले आफ्नो आत्मा पठाउनु हुन्छ,
अनि तिनीहरू स्वास्थ्य हुन्छन्।
    अनि तपाईंले फेरि भूमि नयाँ बनाउनु हुन्छ।

³¹ परमप्रभुको महिमा अनवरत अनन्त रहीरहोस्!
    उहाँले सृजना गर्नुभएको कुराहरूमा उहाँ आनन्दित होउन्।
³² परमप्रभुले पृथ्वी तिर मात्र हेरि दिंदा पनि त्यो कम्पन हुनेछ।
    उहाँले पर्वतहरूलाई छोडदिंदा मात्र तिनीहरूबाट धुवाँ उड्न थाल्छ।

³³ मेरो जीवनभरी परमप्रभुको प्रशंसाको गीत गाउनेछु।
    जबसम्म म बाँच्छु परमप्रभुको प्रशंसा गरिरहेने छु।
³⁴ भरोसा छ मेरो यी शब्दहरूले उहाँलाई खुशी पार्नेछ।
    म परमप्रभुसित खुशी छु।
³⁵ पृथ्वीबाट पापहरू हटी जाओस्।
    दुष्ट मानिसहरू सदाको लागि हराएर जाऊन्।

मेरो प्राणले परमप्रभुको जयजयकार गर्दछ।
    परमप्रभुको प्रशंसा गर!

¹ परमप्रभुलाई धन्यवाद देऊ, उहाँको नाउँको उपासना गर।
    सबै जाति-जाति मानिसहरूलाई ती अचम्भ लाग्दा कुराहरूको बारेमा भन जुन उहाँले गर्नुहुन्छ।
² परमप्रभु प्रति भजन गाओ, उहाँको प्रशंसा गर।
    उहाँले गर्नु भएको अलौकिक कुराहरूको बारेमा बताऊ जो उहाँले गर्नुहुन्छ।
³ परमप्रभुको पवित्र नाउँमा घमण्ड गर।
    तिमीहरू परमप्रभुलाई खोज्दै-खोज्दै आई पुग्यौं त्यसैले अब खुशी हौ।
⁴ बल पाउनुलाई परमप्रभु कहाँ जाऊ।
    सहायताको लागि सधैँ उहाँकोमा जाऊ।
⁵ याद गर ती अचम्मका कुराहरू जुन उहाँले गर्नुहुन्छ।
    याद गर उहाँका आश्चर्यकामहरू साथै उहाँका बुद्धिमानी निर्णयहरू।
⁶ तिमीहरू उहाँका दास अब्राहामका सन्तानहरू हौ।
    तिमीहरू याकूबका सन्तानहरू हौं तिमीहरू परमेश्वरद्वारा छानिएको मानिसहरू हौ।
⁷ परमप्रभु नै हाम्रो परमेश्वर हुनुहुन्छ।
    परमप्रभुले सारा संसारमा राज्य गर्नुहुन्छ।
⁸ परमेश्वरको करार पत्र सदा-सर्वदा याद गर।
    याद गर उहाँले एक हजार पुस्ताहरूलाई दिनुभएका उहाँका आदेशहरू!
⁹ परमेश्वरले अब्राहामसित करार गर्नु भएको थियो।
    परमेश्वरले इसहाक प्रति प्रतिज्ञा राख्नु भएको थियो।
¹⁰ त्यसपछि याकूबको लागि यो नियम झै बनाउनु भयो।
    परमेश्वरले इस्राएल सँग करार गर्नु भएको थियो,
    यो सदा-सर्वदा रहिरहने छ।
¹¹ परमेश्वरले भन्नुभयो, “म तिमीहरूलाई कनानको देश दिनेछु।
    त्यो देश तिमीहरूकै सम्पत्ति हुनेछ।”
¹² परमेश्वरले त्यो वचन त्यतिबेला राख्नु भएको थियो।
जब अब्राहामका परिवारहरू स-साना थिए।
    तिनीहरू त्यहाँ परदेशीहरू जस्तै बसे।
¹³ तिनीहरू एक जातिदेखि अर्को जाति,
    एक राज्य देखि अर्को राज्य हुँदै भ्रमण गर्दै हिंडे।
¹⁴ तर परमेश्वरले तिनीहरूप्रति अत्याचार गर्न दिनु भएन।
    परमेश्वरले राजाहरूलाई पनि तिनीहरूलाई दुःख नदिनु भनेर चेताउनी दिनुभएको थियो।
¹⁵ परमेश्वरले भन्नुभयो, “मैले रोजेका मानिसहरूलाई दुःख नदेऊ।
    मेरो अगमवक्ताहरू प्रति अधर्मी व्यवहार गर्दै नगर।”
¹⁶ परमेश्वरले त्यस देशमा अनिकाल पारिदिनु भयो।
    मानिसहरूले खानलाई प्रशस्त भोजन पाएनन्।
¹⁷ तर परमेश्वरले यूसुफ नाउँका एकजनालाई तिनीहरूको अगाडि त्यस ठाउँमा पठाउनु भयो।
    यूसुफ एक कमारा सरह बेचियो।
¹⁸ तिनीहरूले यूसुफका खुट्टा वरिपरि डोरीले कसे।
    तिनीहरूले उनको घाँटी वरिपरि फलामको घेरा हाली दिए।
¹⁹ उनले भनेका अगमवाणी कुराहरू साँच्चै नहुन्जेल सम्म तिनी दास सरह नै भए।
    परमप्रभुको सन्देशले प्रमाण गर्यो कि यूसुफ ठीक मानिस हो।
²⁰ यसैले मिश्रका राजाले उनलाई मुक्त गरिदिएँ।
    राष्ट्रका शासकले उनलाई जेल मुक्त गरिदिएँ।
²¹ उहाँले यूसुफलाई आफ्नो घरको जिम्मामा राखिदिए,
    यूसुफले आफ्नो स्वामीको सबै सम्पत्तिमाथि हेरचाह गरे।
²² यूसुफले अन्य अगुवाहरूलाई निर्देश दिए।
    यूसुफले बुढापाकाहरूलाई शिक्षा दिए।
²³ तब इस्राएल मिश्र तर्फ आए,
    याकूब हामको देशमा बसे।
²⁴ याकूबको परिवार अत्यन्त बढेर गयो।
    तिनीहरू आफ्ना शत्रुहरू भन्दा धेरै शक्तिशाली भए।
²⁵ यसकारण मिश्रीहरूले याकूबको परिवारलाई हेला गर्न थाले।
    तिनीहरूले उनीहरूका दासहरू विरूद्ध योजना तयार गर्न थाले।
²⁶ यसैले परमेश्वरले आफ्ना दास मोशालाई पठाउनु भयो,
    अनि उहाँले रोजेको पूजाहारी हारूनलाई पठाउनुभयो।
²⁷ परमेश्वरले मोशा र हारूनको माध्यमद्वारा
    हाम्रो देशमा धेरै आश्चर्यकामहरू देखाउनु भयो।
²⁸ परमेश्वरले निक्खुर कालो अन्धकार पठाउनुभयो
    तर मिश्रवासीहरूले उहाँलाई सुनेनन्।
²⁹ यसैले परमेश्वरले पानीलाई रगतमा परिवर्तन गर्नुभयो,
    अनि त्यहाँका सारा माछाहरू मरे।
³⁰ तिनीहरूका देश भ्यागुतै भ्यागुताले भरियो।
    राजाका सुत्ने कोठा पनि भ्यागुताहरू भरिए।
³¹ परमेश्वरले आज्ञा दिनुभयो, अनि झिंगाहरू र जुम्राहरू आउन थाले।
    तिनीहरू चारैतिर फैलिएर गए।
³² परमेश्वरले बर्षालाई असिनामा परिवर्तन गर्नुभयो।
    बिजुलीको प्रहार तिनीहरूको देशभरि फ्याँकियो।
³³ परमेश्वरले तिनीहरूको अङ्गुरका र नेभराको रूखहरू ध्वंश पारी दिनुभयो।
    परमेश्वरले सारा रूखहरू ध्वंश पारी दिनुभयो।
³⁴ परमेश्वरले आज्ञा दिनुभयो, अनि सलहहरू र फटेङ्ग्राहरू आउन थाले।
    तिनीहरू अनगन्ति थिए।
³⁵ सलहहरू र फटेङ्ग्राहरूले देशका सारा उद्भिद्हरू खाएर नष्ट पारिदिए।
    तिनीहरूले खेतका सारा अन्नबालीहरू खाई नष्ट पारिदिए।
³⁶ त्यसपछि तिनीहरूको देशमा परमेश्वरले पहिलो जन्मेका प्रत्येक पुत्रलाई मारिदिनु भयो।
    परमेश्वरले प्रत्येक पुरूषको शक्ति प्रमाणलाई नष्ट पार्नु भयो।
³⁷ त्यसपछि उहाँले आफ्ना मानिसहरू मिश्रबाट निकाल्नु भयो।
    तिनीहरूले आफूसँग सुन र चाँदीहरू लिएर आए।
    परमेश्वरका मानिसहरू कोही पनि ठोकिएनन् र लडेनन्।
³⁸ परमेश्वरका मानिसहरू गएका देखेर मिश्रवासीहरू खुशी भए
    किनभने तिनीहरूबाट उनीहरू भयभीत थिए।
³⁹ परमेश्वरले कम्बल जस्तो बादल फिंजाई दिनुभयो।
    परमेश्वरले आफ्नो आगो राती उज्यालो पार्नलाई तिनीहरूलाई दिनुभयो।
⁴⁰ मानिसहरूले भोजन मागे अनि परमेश्वरले तिनीहरूलाई वट्टाई चरा ल्याइदिनु भयो।
    परमेश्वरले स्वर्गबाट तिनीहरूलाई प्रशस्त खानेकुरा र रोटीहरू दिनुभयो।
⁴¹ परमेश्वरले चट्टानलाई खण्डित पार्नु भयो।
अनि त्यहाँबाट भल-भल पानी निस्क्यो।
    मरुभूमिमा नदी बग्न थाल्यो।

⁴² परमेश्वरले उहाँको वचन सम्झनु भयो।
    परमेश्वरले आफ्ना दास अब्राहामसँग गर्नु भएको वचन सम्झनुभयो।
⁴³ परमेश्वरले आफ्ना मानिसहरू मिश्रबाट निकालेर ल्याउनु भयो।
    मानिसहरू खुशी र आनन्दले गाउँदै, गाउँदै निस्किए!
⁴⁴ तब परमेश्वरले तिनीहरूलाई देश दिनुभयो, जहाँ अन्य मानिसहरू बस्दै गरेका थिए।
    परमेश्वरका मानिसहरूले अन्य मानिसहरूले गर्नु परेका परिश्रमका चीजहरू पाए।
⁴⁵ परमेश्वरले त्यसो गर्नुभयो, किनकि उहाँका मानिसहरूले उहाँका नियमहरू पालन गर्न सकुन।
    यसकारण तिनीहरूले होशियारीसाथ उहाँका व्यवस्थाहरू पालन गर्न सकुन।

परमप्रभुको प्रशंसा गर!

¹ परमप्रभुको प्रशंसा गर!
परमप्रभुलाई धन्यवाद चढाओ किनभने उहाँ असल हुनुहुन्छ।
    परमेश्वरको प्रेम अनन्त छ!
² कुनै मानिसले पनि उहाँ कति महान् हुनुहुन्छ, भनेर वर्णन गर्न सक्दैन्।
    कसैले पनि परमप्रभु पराक्रमको घोषणा गर्न सक्दैन्।
³ मानिसहरू जसले परमेश्वरको आज्ञाहरू पालन गर्दछन् उनीहरू धन्य हुन्छन्।
    ती मानिसहरूले सधैँभरि असल कामहरू गर्दछन्।

⁴ हे परमप्रभु, याद गर्नुहोस् जब तपाईं आफ्ना मानिसहरूको लागि कृपालु हुनुहुन्छ।
    मलाई पनि बचाउनु पर्छ भन्ने सम्झनु होस्।
⁵ हे परमप्रभु, मलाई राम्रो कुराहरूमा सहभागी हुन दिनुहोस्
    जुन तपाईंले आफ्ना रोजेको मानिसहरूको निम्ति गर्नुभयो।
मलाई तपाईंका मानिसहरूसित प्रफुल्लित हुन दिनुहोस्।
    मलाई तपाईंका मानिसहरूसँग गुण-गान गर्न दिनुहोस्।

⁶ हामीले त्यस्तै पाप गर्यौं जस्तो हाम्रा पुर्खाहरूले गरेका थिए।
    हामी अन्योलमा थियौं, हामीले अधर्म कामहरू गर्यौं!
⁷ हे परमप्रभु, तपाईंले गर्नु भएका आश्चर्य कामहरूबाट
    मिश्रमा हाम्रो पुर्खाहरूले केही पनि सिकेनन्।
त्यहाँ लाल समुद्रद्वारा, हाम्रा पुर्खाहरू
    तपाईंका विरूद्ध उपस्थित भए।

⁸ तर परमेश्वरले आफ्नो नाउँको खातिर हाम्रा पिता-पुर्खाहरूलाई बचाउनु भयो।
    परमेश्वरले तिनीहरूलाई बचाएर आफ्नो महान् शक्ति देखाउनु भयो।
⁹ परमेश्वरले आज्ञा दिनुभयो, अनि लाल समुद्र सुख्खा भयो।
    परमेश्वरले हाम्रो पिता-पुर्खाहरूलाई गहन समुद्र भएर मरुभूमि जस्तै सुख्खा धर्ती सम्म अगुवाई गर्नुभयो।
¹⁰ परमेश्वरले हाम्रा पिता-पुर्खाहरूलाई उनीहरूका शत्रुहरूबाट बचाउनु भयो!
    परमेश्वरले तिनीहरूलाई शत्रुहरूबाट मुक्ति दिनुभयो।
¹¹ परमेश्वरले तिनीहरूका शत्रुहरूलाई समुद्रले ढाकिदिनु भयो।
    तिनीहरूका एउटै शत्रुहरूले पनि बाँच्न पाएनन्।

¹² तब हाम्रा पिता-पुर्खाहरूले परमेश्वरमा विश्वास गरे।
    तिनीहरूले उहाँप्रति गुण-गान गरे।
¹³ तर हाम्रा पिता-पुर्खाहरूले तुरून्तै परमेश्वरले गर्नु भएका कुराहरू बिर्से।
    तिनीहरूले परमेश्वरको सल्लाहलाई ध्यान दिएनन्।
¹⁴ हाम्रा पिता-पुर्खाहरू मरुभूमिमा भोकाए
    अनि तिनीहरूले आफ्नो जङ्गली रूपमा परमेश्वरलाई जाँच गरे।
¹⁵ तर हाम्रा पिता-पुर्खाहरूले मागेका सबै थोक परमेश्वरले दिनुभयो।
    तर परमेश्वरले तिनीहरूलाई डरलाग्दो रोगहरू पनि दिनुभयो।
¹⁶ मानिसहरू मोशादेखि डाह गर्न थाले।
    तिनीहरू हारूनदेखि पनि ईर्ष्यालु भए जो परमप्रभुका पवित्र पूजाहारी हुनुहुन्थ्यो।
¹⁷ यसैकारण परमेश्वरले ती डाही मानिसहरूलाई दण्ड दिनुभयो।
धर्ती चिरिएर दातानलाई निलिदियो।
    त्यसपछि चिरिएको जमीन बन्द भए अनि अबिरामको समुदाय जमीन भित्र छोपिएर गयो।
¹⁸ तब त्यस भीडको माझमा आगो लाग्यो,
    र त्यो आगोले ती दुष्टहरूलाई जलाई दियो।
¹⁹ ती मानिसहरूले होरेब पर्वतमा सुनको बाछो बनाएर
    तिनीहरूले त्यस मूर्तिलाई पूजा गरे!
²⁰ तिनीहरूले आफ्ना गौरवमय परमेश्वरसित
    घाँस खाने बाछोको मूर्ति साटे।
²¹ परमेश्वरले हाम्रा पिता-पुर्खाहरूलाई बचाउनु भयो।
तर तिनीहरूले उहाँको बारेमा ती सबै बिर्सीदिए।
    जुन परमेश्वरले मिश्रमा महान कार्यहरू गर्नु भएको थियो,
    तिनीहरूले उहाँको बारेमा भुलिदिए।
²² परमेश्वरले हाम्रो देशमा आश्चर्यजनक कुराहरू गर्नुभयो।
    परमेश्वरले लाल समुद्रको छेउमा डरलाग्दो कामहरू गर्नुभयो!

²³ परमेश्वरले ती मानिसहरूलाई नष्ट गर्न चाहनु हुन्थ्यो।
    तर परमेश्वरले चुन्नु भएको दास मोशाले, बाटो छेके।
परमेश्वर अत्यन्त रिसाउनु भयो,
तर मानिसहरूमाथि परमेश्वरको रीस रोक्न मोशाले उहासँग बिन्ति गरे।
    यसैले परमेश्वरले मानिसहरूलाई नष्ट गर्नु भएन।

²⁴ तर ती मानिसहरूले कनान भन्ने रमाइलो ठाउँमा जान अस्वीकार गरिदिए।
    तिनीहरूले त्यस ठाउँमा भएका मानिसहरूलाई परास्त पार्न
    परमेश्वरले सहायता गर्नुहुन्छ भनी भरोसा गरेनन्।
²⁵ हाम्रा पिता-पुर्खाहरूले
    परमेश्वरका वचन पालन गर्न अस्वीकार गरे!
²⁶ तर तिनीहरूले आफ्नो परमेश्वरको विरोधमा नालिश गरे।
    यसकारण परमेश्वरले शपथ लिनु भयो कि तिनीहरू मरुभूमिमा मर्नेछन्।
²⁷ परमेश्वरले अन्य मानिसहरूले तिनीहरूका सन्तानहरूलाई परास्त गरोस् भनी वचन दिनुभयो
    परमेश्वर हाम्रा पिता-पूर्खाहरूलाई आफ्नै सम्प्रदायहरू माझ तितर-बितर पार्न वचनबद्ध हुनुभयो।

²⁸ त्यसपछि बाल-पोरमा, परमेश्वरका जनहरू बाललाई पूज्न भनी त्यहाँ सम्मिलित भए।
    परमेश्वरका मानिसहरू उत्सवमा सहभागी हुन पुगे र मरेका मानिसहरू^[c] का नाउँमा चढाएका बलिहरू खाए।
²⁹ परमेश्वर आफ्ना मानिसहरूमाथि भयङ्कर रूपमा क्रोधित भए
    अनि तिनीहरूलाई डरलाग्दो बिमारी पारिदिनु भयो।
³⁰ तर पीनहासले परमेश्वर प्रति प्रार्थना गरे।
    अनि त्यो हैंजा रोकियो।
³¹ पीनहासले उचित काम गरेको परमेश्वरलाई थाहा थियो।
    परमेश्वरले उसलाई सदा-सर्वदा सम्झनु हुने छ।

³² मरीबामा मानिसहरूले परमेश्वरलाई क्रोधित बनाए।
    अनि तिनीहरूले मोशालाई अधर्म काम गर्न लगाए।
³³ ती मानिसहरूले मोशालाई दुःखीत गराए।
    नसोचिकन मोशा बोले।

³⁴ परमप्रभुले अन्य जातिहरूलाई नष्ट पार्न मानिसहरूलाई आज्ञा दिनु भयो।
    तर इस्राएल का मानिसहरूले उहाँको आज्ञा पालन गरेनन्।
³⁵ तिनीहरू अरू जातिहरूसँग मिसिए,
    अनि अरू जातिहरूले जे गर्दै थिए त्यही गरे।
³⁶ ती मानिसहरू परमेश्वरका मानिसहरूका लागि एक पासो नै भए।
    उहाँका भक्तजनहरूले पनि अन्य मानिसहरूले जस्तै कृत्रिम देवताहरू पूज्न थाले।
³⁷ उहाँका भक्तजनहरूले आफ्ना नानीहरू सम्म मारे,
    अनि त्यो भूतहरूलाई बलि चढाए।
³⁸ उहाँका भक्तजनहरूले निर्दोष मानिसहरू मारे।
    तिनीहरूले आफ्नै छोरा-छोरीहरू मारे
    अनि ती कृत्रिम देवताहरूलाई भोग चढाए।
³⁹ यसकारण परमेश्वरका मानिसहरू अरूजातिहरू जस्तै पापहरूले दूषित भए।
    उहाँका मानिसहरू परमेश्वर प्रति आज्ञाकारी भएनन्,
    अनि अरू जातिहरूले जे अधर्म सिकाए त्यही कामहरू गरे।
⁴⁰ परमेश्वर आफ्ना भक्तजनहरूमा क्रोधित हुनु भयो।
    उहाँ तिनीहरूसँग दिक्क हुनुभयो!
⁴¹ परमेश्वरले आफ्ना मानिसहरू अन्य जातिहरूलाई सुम्पनु भयो।
    शत्रुहरूले नै उनीहरूमा राज गरोस्-भनेर उहाँले छोडी दिनुभयो।
⁴² उहाँका मानिसहरूका शत्रुहरूले तिनीहरूलाई नियन्त्रणमा राखे
    अनि तिनीहरूको जीवन कठिन पारिदिए।
⁴³ परमेश्वरले आफ्ना मानिसहरूलाई धेरै पल्ट बँचाइदिनु भयो।
    तर तिनीहरू उहाँकै विरूद्ध उठे अनि आफ्ना इच्छा अनुसार काम गरे।
    तिनीहरूले धेरै भन्दा धेरै अनुचित कामहरू गरे।
⁴⁴ तर जब-जब परमेश्वरका मानिसहरूमा सङ्कट आई पर्यो,
तिनीहरूले परमेश्वरलाई सहायता माग्दथे,
    अनि उहाँले प्रत्येक पल्ट तिनीहरूको प्रार्थना सुनीदिनु हुन्थ्यो।
⁴⁵ परमेश्वरले आफ्ना करार सधैँ याद गर्नुहुन्थ्यो
    र तिनीहरूलाई स-प्रेम सान्त्वना दिनु हुन्थ्यो।
⁴⁶ अन्य जातिहरूले तिनीहरूलाई कैदीहरू जस्तो लगे
    तब परमेश्वरले तिनीहरू प्रति टिठाउने बनाई दिनुभयो।
⁴⁷ हे परमप्रभु, हाम्रा परमेश्वर, हाम्रो उद्धार गर्नुहोस्।
    परमेश्वरले ती राष्ट्रहरूबाट फर्काई हामीलाई ल्याउनु भयो।
यसकारण हामीले उहाँको पवित्र नाउँको गुण-गान गर्न सक्यौं।
    यसकारण हामीले उहाँ प्रति गुण-गान गर्न सक्यौ।
⁴⁸ इस्राएल का परमप्रभु परमेश्वरको प्रशंसा गरौं।
    परमेश्वर सधै रहनु हुन्छ, उहाँ सधै नै रहनुहुने छ।
अनि सारा मानिसहरूले भने, “आमेन!”

परमप्रभुको प्रशंसा गर!

⁴ तिनीहरूमा कतिपय सुख्खा मरुभूमिमा छोडिए।
    तिनीहरूले बस्ने ठाउँ खोजिरहेका थिए।
    तर तिनीहरूले कुनै शहर भेट्टाएनन्।
⁵ तिनीहरू भोका र प्यासा थिए
    अनि कमजोर हुँदै गइरहेका थिए।
⁶ त्यसपछि तिनीहरूले परमप्रभुलाई सहायताको निम्ति पुकारे।
    अनि उहाँले तिनीहरूलाई सङ्कटहरूबाट जोगाउनु भयो।
⁷ परमप्रभुले तिमीहरूलाई सोझै शहर तिर डोराएर लैजानु भयो,
जहाँ तिमीहरू बस्न पाउँथे।
⁸ उहाँको अनन्त प्रेमको निम्ति उहाँले सृजना गर्नु भएका
    आश्चर्यकामहरूको निम्ति उहाँलाई धन्यवाद देओ।
⁹ परमेश्वरले तिर्खाएको आत्मालाई तृप्त पार्नु भयो।
    परमेश्वरले भोको आत्मालाई गुणपूर्ण कुराहरूले परिपूर्ण पारिदिनु भयो।

¹⁰ परमेश्वरका कतिपय मानिसहरू कैदीहरू थिए,
    झ्यालखानाको अँध्यारो कोठाहरूमा बन्दी थिए।
¹¹ किनभने तिनीहरू परमेश्वरले भनेका कुराहरूका विरूद्ध लडेका थिए।
    तिनीहरूले सर्वोच्च परमेश्वरबाट आएका सल्लाहहरू प्रति कानै थापेनन्।
¹² परमेश्वरले तिनीहरूकै कु-कर्मको कारणले गर्दा
    उनीहरूका जीवन जीउन कठिन परिदिनु भयो।
तिनीहरू ठेस लागेर लडे
    अनि त्यहाँ तिनीहरूलाई साथ दिने कोही पनि थिएन।
¹³ ती मानिसहरूलाई सङ्कटहरूमा फँसाइयो।
यसैकारण तिनीहरूले परमेश्वरलाई गुहार मागे
    अनि उहाँले तिनीहरूलाई सङ्कटबाट बचाउनु भयो।
¹⁴ कालो कोठरीको कैदबाट परमेश्वरले तिनीहरूलाई बाहिर निकाल्नु भयो।
    तिनीहरूलाई बाँधिएका डोरीहरू उहाँले चुडाई दिनुभयो।
¹⁵ उहाँको अनन्त प्रेम र मानिसहरूको निम्ति उहाँले सृजना गर्नु भएको
    आश्चर्यकामहरूको निम्ति उहाँलाई धन्यवाद देऊ।
¹⁶ हाम्रा शत्रुहरूलाई नाश गर्न परमप्रभुले हामीलाई सहायता दिनुभयो,
परमेश्वरले तिनीहरूको काँसाको मूल ढोका भत्काउन सक्नुहुन्छ।
    परमेश्वरले तिनीहरूका फलामका बारहरू टुक्रा-टुक्रा पारिदिन सक्नुहुन्छ।

¹⁷ कतिपय मानिसहरूले आफ्ना पापहरू र दोषहरूद्वारा आफैंलाई मूर्ख बनाए।
    उनीहरूले गरेको दुष्ट कामको निम्ति उनीहरूले कष्ट भोगे।
¹⁸ ती मानिसहरूले खान पनि रूचाउँदैनन्
    अनि तिनीहरू प्रायः मर्छन्।
¹⁹ तिनीहरू सङ्कटहरूमा थिए, यसैले सहयोगको निम्ति परमेश्वरलाई गुहार मागे
    र उहाँले तिनीहरूलाई ती सङ्कटहरूबाट बँचाउनु भयो।
²⁰ परमेश्वरले आज्ञा गर्नुभयो र तिनीहरू निको भए।
    यसकारण ती मानिसहरू चिहानबाट बाँचे।
²¹ परमप्रभुको अनन्त प्रेम
    अनि मानिसहरूका निम्ति उहाँले सृजना गर्नु भएको
    आश्चर्यकामहरूको निम्ति परमप्रभुलाई धन्यवाद देऊ।
²² उहाँप्रति बलिदान स्वरूप उपहारहरू अर्पण गर
    अनि उहाँका कार्यहरू प्रति धन्यवाद प्रदान गर।
    खुशी भएर उहाँले गर्नु भएका कार्यहरूको बारे भन्दै जाऊ।

²³ कतिपय मानिसहरू जहाजमा तरेर समुद्र पारी पुगे।
    तिनीहरूका कर्मले नै तिनीहरूलाई महासागर पार तार्यो।
²⁴ ती मानिसहरूले परमेश्वरले के गर्न सक्नु हुन्छ भन्ने कुरा देखे।
    तिनीहरूले समुद्रमा गर्नु भएको उहाँको अद्भूत कामहरू देखे।
²⁵ परमेश्वरले आज्ञा गर्नुभयो, अनि प्रबल बतास बहन थाल्यो।
    छालहरू उच्च भन्दा उच्च हुँदै गए।
²⁶ ती छालहरूले तिनीहरूलाई उठाएर आकाशमा पुर्याए
    अनि गहिरो समुद्रमा झारिदिए।
    तूफान एकदम भयङ्कर थियो ती मानिसहरूको साहस हराएर गयो।
²⁷ तिनीहरू धरमरिरहेका थिए अनि मातेको मानिस सरह पछारिए,
    माझीको रूपमा तिनीहरूको कुशलता बेकार भयो।
²⁸ तिनीहरू सङ्कटहरूले घेरिए, यसैकारण तिनीहरूले परमेश्वरलाई गुहार मागे।
    अनि उहाँले ती सङ्कटहरूबाट तिनीहरूलाई बँचाउनु भयो।
²⁹ परमेश्वरले समुद्र तूफानलाई रोक्नु भयो।
    अनि छालहरूलाई शान्त पार्नुभयो।
³⁰ माझीहरू खुशी भए किनभने समुद्र शान्त थियो।
    अनि परमेश्वरले तिनीहरू जहाँ जान चाहन्थे त्यहाँ जोगाएर लैजानु भयो।
³¹ उहाँको प्रेम र मानिसहरूको लागि उहाँले सृजना गर्नु भएको
    आश्चर्यकामहरूको निम्ति परमप्रभुलाई धन्यवाद देऊ।
³² महासभामा परमेश्वरको प्रशंसा गर।
    बूढा-प्रधानहरू सँगै भेला भएको बेला उहाँको प्रशंसा गर।

³³ परमेश्वरले नदीहरूलाई पनि मरुभूमिमा परिवर्त्तन गर्नुभयो।
    परमेश्वरले झरनाहरू बहनुदेखि रोकिदिनु भयो।
³⁴ परमेश्वरले मलिलो भूमिलाई काम नलाग्ने नूनिलो जमीन बनाई दिनुभयो।
    किनभने ती दुष्ट मानिसहरूले गर्दा हो, जो त्यस ठाउँमा बसीरहेका थिए।
³⁵ परमेश्वरले मरुभूमिलाई पानीको पोखरीमा परिवर्त्तन गर्नुभयो।
    परमेश्वरले बाँझो जमीनमा पानीको मूल फुटाउनु भयो।
³⁶ परमेश्वरले भोकाएका मानिसहरूलाई राम्रो ठाउँमा लानुभयो।
    अनि तिनीहरूले आफ्नो निम्ति शहर बसाए।
³⁷ ती मानिसहरूले त्यस धर्तीमा बिऊ छरे,
र तिनीहरूले त्यहाँ अङ्गुरको खेती गरे।
    अनि तिनीहरूले असल बाली पाउन सके।
³⁸ परमेश्वरले ती मानिसहरूलाई आशीर्वाद दिनु भयो।
तिनीहरूका सन्तानहरू बढे।
    तिनीहरूका अधिक भन्दा अधिक पशुहरू भए।
³⁹ घोर विपत्ति र सङ्कटहरूले गर्दा
    तिनीहरूका परिवारहरू सानो र कमजोर भए।
⁴⁰ परमेश्वरले तिनीहरूका शासकहरूलाई लज्जित र व्याकुल पार्नु भयो।
    उहाँले तिनीहरूलाई मरुभूमिमा भडकिहिँड्ने बनाउनु भयो जहाँ कुनै बाटो छैन।
⁴¹ त्यसपछि परमेश्वरले ती गरीब मानिसहरूलाई तिनीहरूको दुःखबाट मुक्ति दिनुभयो।
    अनि तिनीहरूका परिवारहरू भेंडाका बथानहरू जस्ता विशाल हुँदै गए।
⁴² असल मानिसहरूले त्यसलाई देख्छन् अनि तिनीहरू आनन्दित हुन्छन्
    तर दुष्ट मानिसहरूले त्यसलाई देखे पछि अनुहार खुम्च्याउँछन्।
⁴³ यदि कुनै मानिस ज्ञानी छ भने उसले यी कुराहरू सम्झने छ।
    परमेश्वरको प्रेम के हो, त्यसपछि मात्र उसले वास्तविक रूपमा बुझ्न थाल्नेछ।

⁷ परमेश्वर उहाँको मन्दिरमा बोल्नु भयोः
    “म युद्ध जित्ने छु अनि विजयी भएर प्रफुल्लित हुनेछु!
म यो धर्ती आफ्ना मानिसहरूको माझमा भाग गरेर बाँडिदिने छु।
    शेकेम तिनीहरूलाई दिनेछु।
    म तिनीहरूलाई सुक्कोत बेंसी दिनेछु।
⁸ गिलाद र मनस्से मेरो हुनेछ।
    एप्रैम मेरो शिरकवज हुनेछ,
    यहूदा मेरो राजदण्ड हुनेछ।
⁹ मोआब मेरो खुट्टा धुने ठूलो गर्दुवा हुनेछ,
    एदोम मेरो जुत्ताहरू बोक्ने दास हुनेछ,
    म पलिस्तिलाई परास्त गर्ने छु अनि विजय भएको खुसीमा कराउने छु।”

^10-11 तर तपाईंले हामीलाई त्यागेर जानु भयो!
    तपाईं हाम्रा सेनाहरूसँग जानु भएन!
कसले मलाई शत्रुहरूको किल्लातिर लैजाने हो?
    कसले मलाई एदोमको विरूद्ध लडाइँ गर्न लैजाने हो?
¹² हे परमेश्वर, हाम्रा शत्रुहरू नाश गर्नलाई साथ दिनुहोस्।
    मानिसहरूले हामीलाई सघाउन सक्दैनन्!
¹³ परमेश्वरले मात्र हामीलाई बलियो बनाउन सक्नु हुन्छ।
    परमेश्वरले हाम्रा शत्रुहरू पराजित गर्न सक्नु हुन्छ।