Bible in 90 Days

¹ परमप्रभुको प्रशंसा गर!
परमप्रभुको नाउँको प्रशंसा गर!
    परमप्रभुको दासहरू हो, उहाँको प्रशंसा गर!
² ती मानिसहरू, जो परमप्रभुको मन्दिरमा,
    र परमप्रभुकै मन्दिरका चोकहरूमा उभिहेका छन्, उहाँको प्रशंसा गर।
³ परमप्रभुको प्रशंसा गर, किनभने उहाँ भलो हुनुहुन्छ।
    उहाँको नाउँको प्रशंसा गर, किनभने यो आनन्दमय छ।

⁴ परमप्रभुले याकूबलाई रोज्नु भयो,
    इस्राएल परमप्रभु कै हो।
⁵ म जान्दछु परमप्रभु महान् हुनुहुन्छ!
    हाम्रो स्वामी सबै देवताहरूभन्दा महान् हुनुहुन्छ!
⁶ परमप्रभुले चाहेका जे पनि,
    आकाशमा, पृथ्वीमा, पातालमा, समुद्रमा र गहिरा सागरहरूमा गर्नुहुन्छ।
⁷ परमप्रभुले पृथ्वीभरि नै बादलहरू उठ्ने बनाउनु हुन्छ।
    परमेश्वरले बिजुली र बर्षा पठाउनु हुन्छ।
    परमेश्वरले हावा ल्याउनुहुन्छ।
⁸ परमप्रभुले प्रथम जन्मिएका सारा पुरूषहरू,
    अनि मिश्रमा प्रथम जन्मिएका सारा पशुहरू नाश गर्नुभयो।
⁹ परमप्रभुले धेरै आश्चर्यजनक र अलौकिक कार्यहरू मिश्रमा गर्नुभयो।
    परमप्रभुले फिरऊन र उनका अधिकारी प्रति त्यस्ता घटनाहरू गराउनु भयो।
¹⁰ परमेश्वरले धेरै ठूला-ठूला जातिहरूलाई परास्त पार्नुभयो।
    शक्तिशाली राजाहरूलाई पनि उहाँले मार्नुभयो।
¹¹ परमप्रभुले अमोरीहरूका राजा सीहोनलाई परास्त पार्नु भयो।
    परमप्रभुले ओग् भन्ने बाशानका राजालाई परास्त पार्नु भयो।
    परमप्रभुले कनानका सबै जातिहरूलाई परास्त पार्नुभयो।
¹² परमेश्वरले तिनीहरूका भूमि इस्राएल लाई सुम्पनु भयो।
    परमप्रभुले ती जग्गाहरू आफ्ना मानिसहरूलाई दिनुभयो।

¹³ हे परमप्रभु, तपाईंको नाउँ सदा-सर्वदा प्रख्यात रहने छ!
    हे परमप्रभु, मानिसहरूले तपाईंलाई सदा-सर्वदा याद गर्नेछन्।
¹⁴ परमप्रभुले अन्य जातिहरूलाई दण्ड दिनु भयो,
    तर परमप्रभुले आफ्ना दासहरूलाई कृपादृष्टि राख्नु भएको थियो।
¹⁵ अन्य मानिसहरूका देवताहरू सुन र चाँदीका मूर्तिहरू थिए।
    तिनीहरूका देवताहरू मानिसहरूले बनाएका मूर्तिहरू मात्र थिए।
¹⁶ ती मूर्तिहरूका मुखहरू थिए तर बोल्न सक्दैनथे।
    ती मूर्तिहरूका आँखाहरू थिए तर देख्न सक्दैनथे।
¹⁷ ती मूर्तिहरूका कानहरू थिए तर सुन्न सक्दैनथे।
    ती मूर्तिहरूका नाकहरू थिए तर सुँघ्न सक्दैनथे।
¹⁸ तिनीहरू जसले ती मूर्तिहरू बनाए उनीहरू पनि त्यस्तै खालको हुनेछन्।
    किनभने तिनीहरूले ती मूर्तिहरूमा सहायताको निम्ति भरोसा गरे।

¹⁹ हे इस्राएलको परिवार, परमप्रभुको प्रशंसा गर!
    हे हारूनको परिवार, परमप्रभुको प्रशंसा गर!
²⁰ हे लेवीको परिवार, परमप्रभुको प्रशंसा गर!
    हे परमप्रभुको भक्तजनहरू हो, परमप्रभुको प्रशंसा गर!
²¹ सियोनबाट आएका परमप्रभु धन्य हुनुभयो,
    हे यरूशलेम र उहाँको वास-स्थानबाट।

परमप्रभुको प्रशंसा गर।

¹ हामी परमप्रभुको प्रशंसा गरौं! किनभने उहाँ भलो हुनुहुन्छ।
    उहाँको स्नेहपूर्ण करूणा अनन्तसम्म रहनेछ।
² देवहरूका परमेश्वरलाई प्रशंसा गरौं!
    उहाँको स्नेहपूर्ण करूणा अनन्तसम्म रहनेछ।
³ परमप्रभुहरूका पनि महा-परमप्रभुलाई प्रशंसा गरौंष।
    उहाँको स्नेहपूर्ण करूणा अनन्तसम्म रहनेछ।
⁴ परमेश्वरको प्रशंसा गरौं! जसले एक्लैले नै आश्चर्यकामहरू गर्नुभयो।
    उहाँको स्नेहपूर्ण करूणा अनन्तसम्म रहनेछ।
⁵ परमेश्वरको प्रशंसा गरौं! जसले आकाश बनाउन बुद्धि लगाउनु भयो।
    उहाँको स्नेहपूर्ण करूणा अनन्तसम्म रहनेछ।
⁶ परमेश्वरले सुक्खा जमीन समुद्रमा राख्नु भयो।
    उहाँको स्नेहपूर्ण करूणा अनन्तसम्म रहनेछ।
⁷ परमेश्वरले ठूला-ठूला ज्योतिहरू बनाउनु भयो,
    उहाँको स्नेहपूर्ण करूणा अनन्तसम्म रहनेछ।
⁸ दिनमा शासन गर्न परमेश्वरले घाम बनाउनु भयो।
    उहाँको स्नेहपूर्ण करूणा अनन्तसम्म रहनेछ।
⁹ परमेश्वरले रातमा शासन गर्नलाई जून र तारहरू बनाउनु भयो।
    उहाँको स्नेहपूर्ण करूणा अनन्तसम्म रहनेछ।
¹⁰ परमेश्वरले मिश्रमा सबै भन्दा पहिला जन्मेका पुरूषहरू र पशुहरू मार्नु भयो।
    उहाँको स्नेहपूर्ण करूणाआ अनन्तसम्म रहनेछ।
¹¹ परमेश्वरले मिश्रबाट इस्राएललाई ल्याउनु भयो,
    उहाँको स्नेहपूर्ण करूणा अनन्तसम्म रहनेछ।
¹² परमेश्वरले आफ्नो महान् शक्ति र बल देखाउनु भयो।
    उहाँको स्नेहपूर्ण करूणा अनन्तसम्म रहनेछ।
¹³ परमेश्वरले लाल समुद्रलाई दुइ भागमा बाँड्नु भयो।
    उहाँको स्नेहपूर्ण करूणा अनन्तसम्म रहनेछ।
¹⁴ परमेश्वरले इस्राएल लाई समुद्र तार्नु भयो।
    उहाँको स्नेहपूर्ण करूणा अनन्तसम्म रहनेछ।
¹⁵ परमेश्वरले फिरऊन र उनका सैनिकहरूलाई लाल समुद्रमा डुबाई दिनु भयो।
    उहाँको स्नेहपूर्ण करूणा अनन्तसम्म रहनेछ।
¹⁶ परमेश्वरले आफ्नो मानिसहरूलाई मरुभूमि भएर डोर्याउनु भयो।
    उहाँको स्नेहपूर्ण करूणा अनन्तसम्म रहनेछ।
¹⁷ परमेश्वरले शक्तिशाली राजाहरूलाई हराउनु भयो।
    उहाँको स्नेहपूर्ण करूणा अनन्तसम्म रहनेछ।
¹⁸ परमेश्वरले बलवान राजाहरूलाई पनि हराउनु भयो।
    उहाँको स्नेहपूर्ण करूणा अनन्तसम्म रहनेछ।
¹⁹ परमेश्वरले अमोरीहरूका राजा सीहोनलाई हराउनु भयो।
    उहाँको स्नेहपूर्ण करूणा अनन्तसम्म रहनेछ।
²⁰ परमेश्वरले बाशानका राजा ओग्‌लाई हराउनु भयो।
    उहाँको स्नेहपूर्ण करूणा अनन्तसम्म रहनेछ।
²¹ परमेश्वरले तिनीहरूका जग्गा इस्राएललाई दिनुभयो।
    उहाँको स्नेहपूर्ण करूणा अनन्तसम्म रहनेछ।
²² परमेश्वरले त्यो जग्गा उपहारको रूपमा इस्राएललाई दिनुभयो।
    उहाँको स्नेहपूर्ण करूणा अनन्तसम्म रहनेछ।
²³ परमेश्वरले हामी हारेको बेलामा सम्झनु भयो।
    उहाँको स्नेहपूर्ण करूणा अनन्तसम्म रहनेछ।
²⁴ परमेश्वरले शत्रुहरूबाट हामीलाई बचाउनु भयो।
    उहाँको स्नेहपूर्ण करूणा अनन्तसम्म रहनेछ।
²⁵ परमेश्वरले प्रत्येकलाई खाना दिनुभयो।
    उहाँको स्नेहपूर्ण करूणा अनन्तसम्म रहनेछ।
²⁶ स्वर्गका परमेश्वरको प्रशंसा गरौं।
    उहाँको स्नेहपूर्ण करूणा अनन्तसम्म रहनेछ।

¹ हामी बाबेल नदीहरूका किनारमा बसेर
    सियोनलाई सम्झेर रोयौं।
² हामीले हाम्रा वीणाहरू छेउमा भएको बेंसीको रूखहरूमा झुण्डाएर राख्यौ।
³ बाबेलमा जसले हामीलाई पक्रेर राखे उनीहरूले नै गीत गाउनु भने।
    तिनीहरूले हामीलाई खुशीका गीतहरू गाउन भने,
    तिनीहरूले हामीलाई सियोनको बारेमा गीतहरू गाउनु भने।
⁴ तर कसरी विदेशमा हामीहरू
    परमप्रभुका गीतहरू गाउन सक्छौं?
⁵ हे यरूशलेम, यदि मैले तिमीलाई बिर्सेको भए,
    मैले कहिल्यै फेरि दाहिने हातले वीणा बजाउनु बिर्सिने थिएँ।
⁶ यरूशलेम यदि मैले तिमीलाई भुलेको भए,
    तब म भरोसा गर्छु फेरि कहिल्यै गाँउने थिईन।
म कसम खाँन्छु, म तिमीलाई कहिलै भुल्ने छैन।

⁷ म कसम खाँन्छु यरूशलेम सधैँ मेरो महान् आनन्द हुनेछ।
    हे परमप्रभु, एदोमीहरूले के काम गरे, याद गर्नुहोस्।
तिनीहरूले चिच्यए, “पूर्णरूपले विध्वंश पार,
    त्यसको जगसम्मै पूर्णरूपले विध्वंश गर।”
⁸ हे बेबिलोन, तिमी नाश हुनेछौ!
    त्यस मानिसलाई धन्यवाद देऊ जसले तिमीलाई दण्ड दिन्छ,
    जुन दण्डको निम्ति तिमी योग्य थियौ।
⁹ त्यस मानिसलाई धन्यवाद देऊ जसले तिम्रा शिशुहरू समाते,
    र तिनीहरूलाई ढुङ्गामा थेचारे।

⁴ हे परमप्रभु, तपाईंले भन्नु भएका कुराहरू सुने पछि
    पृथ्वीका जम्मै राजाहरूले तपाईंको प्रशंसा गर्नेछन्।
⁵ तिनीहरूले परमप्रभुको मार्गको गुण-गान गर्ने छन्,
    किनभने परमप्रभुको महिमा महान् छ।
⁶ परमेश्वर अत्यन्तै महत्वपूर्ण हुनुहुन्छ,
    तर पनि उहाँले नम्र मानिसहरूको हेरचाह गर्नुहुन्छ।
परमेश्वर ती अंहकारी मानिसहरूले के गर्दछन् भन्ने कुरा जान्नुहुन्छ,
    तर उहाँ त्यस्ता मानिसहरूबाट टाढा नै रहनु हुन्छ।
⁷ परमेश्वर, यदि म सङ्कटमा परे भने मलाई जिउँदै राख्नुहोला।
    यदि मेरो शत्रुहरू ममाथि क्रोधित भए तिनीहरूबाट मलाई बचाउनुँ होस्।
⁸ परमप्रभु, मलाई ती कुराहरू दिनुहोस् जुन तपाईंले वचन दिनु भएको थियो।
    परमप्रभु, तपाईंको स्नेहपूर्ण करूणा अनन्त रहनेछ।
    परमप्रभु, तपाईंले हामीलाई रच्नु भयो, यसैले हामीलाई नत्याग्नु होस्!

¹¹ हे परमप्रभु, मैले तपाईं देखि लुक्ने कोशिश गरे र भन्छु,
    “दिन रातमा परिर्वतन भएको छ।
    निश्चय रातले मलाई लुकाउनेछ।”
¹² तर अन्धकार पनि तपाईंको निम्ति अन्धकार हुँदैन।
    परमप्रभु, तपाईंको निम्ति रात दिन झैं उज्जवल छ।
    तपाईंको निम्ति रात र दिन उस्तै हो।
¹³ हे परमप्रभु, तपाईंले मेरो सम्पूर्ण शरीर बनाउनु भयो।
    म आमाको गर्भमा हुँदा मेरो विषयमा सवै कुराहरू जान्नुहुन्छ।
¹⁴ हे परमप्रभु, म तपाईंको प्रशंसा गर्छु।
तपाईंले मलाई आश्चर्यपूर्वक र अपूर्व प्रकारले बनाउनु भयो।
    म जान्दछु कि तपाईंले जे गर्नुभयो, त्यो आश्चयपूर्ण छ।

¹⁵ तपाईं मेरो बारेमा सारा कुराहरू जान्नुहुन्छ।
    जब मेरो शरीरले आफ्नो रूप लिंदै बढदै गयो,
    तपाईंले मेरो हड्डीहरू नियाल्नु भयो जुन मेरो आमाको गर्भमा लुकेको थियो।
¹⁶ तपाईंले मेरो अंग-प्रत्यंग बढ्दै गरेको नियाल्नु भयो,
तपाईंले आफ्नो पुस्तकमा ती कुराहरू लेख्नु भयो।
    तपाईंले प्रत्येक दिन मलाई नियाल्नु भयो।
    कुनै दिन पनि त्यसै खाली गएन।
¹⁷ तपाईंका विचारहरू मेरो निम्ति महत्वपूर्ण छन्।
    हे परमेश्वर, तपाईं यति विघ्न जान्नुहुन्छ।
¹⁸ यदि मैले ती सबै गन्न सक्दो हुँ ता,
तिनीहरू बालुवाका कणहरू भन्दा धेरै हुने थिए होला।
    अनि मैले जब गनी सकेपछि पनि, तपाईंसँगै नै हुनेछु।

¹⁹ हे परमेश्वर, दुष्ट मानिसहरूलाई मार्नु होस्।
    त्यस्ता हत्याराहरू मदेखि टाढै राखी दिनुहोस्।
²⁰ ती दुष्टहरूले तपाईंको बारेमा नराम्रा कुराहरू गरे
    तिनीहरूले तपाईंको नाउँको पनि बद्नाम गरे।
²¹ हे परमप्रभु, म ती मानिसहरूलाई घृणा गर्दछु,
ज-जसले तपाईंलाई घृणा गर्दछन्।
    म ती मानिसहरूलाई घृणा गर्दछु,
    जो तपाईंको विरूद्धमा उठ्दछन्।
²² म तिनीहरूलाई पूर्ण रूपले घृणा गर्छु।
    तपाईंका शत्रुहरू मेरो पनि शत्रुहरू हुन्।
²³ हे परमप्रभु, मेरो हृदयमा हेर्नुहोस् अनि मेरो मनलाई जान्नुहुन्छ।
    मलाई जाँच्नुहोस् र मेरो विचारहरू जान्नुहुन्छ।
²⁴ मसँग त्यस्तो कुनै पापपूर्ण विचारहरू छ भने हेर्नु होस्,
    अनि त्यस्तो बाटोमा डोर्याएर लैजानु होस् जुन अनन्त रहनेछ।

⁴ हे परमप्रभु, मलाई दुष्ट मानिसहरूबाट जोगाई दिनुहोस्,
    क्रुर मानिसहरूबाट मेरो रक्षा गरिदिनु होस,
    तिनीहरू मेरो पछि लागेर खोज्दछन् र कष्ट दिने प्रयास गर्दछन्।
⁵ ती अहङ्कारीहरूले मेरो निम्ति पासो थापे।
    तिनीहरूले मलाई पक्रन भनी जाल फिँजाए।
    तिनीहरूले मेरो बाटोमा पासो थापे।

⁶ हे परमप्रभु, तपाईं मेरो परमेश्वर हुनुहुन्छ।
    हे परमप्रभु, मेरो प्रार्थना सुनी दिनुहोस्।
⁷ हे परमप्रभु, तपाईं मेरो बलवान स्वामी हुनुहुन्छ।
तपाईं मेरो मुक्तिदाता हुनुहुन्छ।
    तपाईं मेरो मुकुट सरह हुनुहुन्छ,
    जसद्वार युद्धमा मेरो शिर सुरक्षित पारिन्छ।
⁸ हे परमप्रभु, ती मानिसहरू दुष्ट छन्।
    तिनीहरूले चाहेका कुराहरू नपाऊन्।
    तिमीहरूका योजनाहरू सफल नहोस्।

⁹ परमप्रभु, कुनै पनि शत्रुहरूलाई जित्न नदिनुहोस्।
ती मानिसहरूले दुष्ट योजना बनाँउछन्।
    तर ती दुष्ट कार्यहरू उनीहरूमाथि नै परून्।
¹⁰ जल्दै गरेको कोईलाहरू उनीहरूकै शिरमा बर्षोस्,
    मेरो शत्रुहरूलाई आगोमा फ्याँकियोस्,
तिनीहरूलाई चिहानमा फ्याँकिदिनु होस्
    ताकि उनीहरू चढेर आउनु कहिल्यै नसकुन्।
¹¹ परमप्रभु, ती झूटाहरूलाई बाँच्न नदिनुहोस्।
    नराम्रा कुराहरू ती नराम्रा मानिसहरूमा नै घटोस्।
¹² म जान्दछु कि परमप्रभुले दीन-दुःखी मानिसहरूलाई,
निष्पक्ष रूपले न्याय गर्नुहुनेछ
    परमेश्वरले असहाय मानिसहरूलाई साथ दिनुहुनेछ।
¹³ धर्मी मानिसहरूले, तपाईंको नाउँको गुण-गान गर्नेछन् परमप्रभु।
    सोझा मानिसहरूले तपाईंलाई पूज्ने छन्।

³ हे परमप्रभु, मैले भनेका कुराहरूमा अधीन गर्न मलाई सहायता गनुहोस्।
    म के भन्छु त्यस विषयमा होशियारहुन सहायता गर्नुहोस्।
⁴ मलाई नराम्रो कुरा गर्ने चाहना तर्फ नफर्काउनु होस्,
    दुष्ट मानिसहरूले अनुचित काम गर्छन्,
    मलाई तिनीहरूसित सामिल हुन देखि जोगाउनु होस्।
मलाई ती कुराहरूमा सहभागी हुन देखि जोगाउनु होस,
    जुन कुरामा ती दुष्ट मानिसहरूले आनन्द लिइरहेका हुन्छन्।
⁵ यदि एकजना धर्मी मानिसले मलाई पिटे देखि,
म त्यसलाई दया सम्झने थिएँ।
    तपाईंका भक्तजनहरूले मलाई चेताउनी दिऊन्।
तिनीहरूलाई त्यसो गर्न असल हुन्थ्यो।
    म ती कुराहरू स्वीकार गरौंला।
तर म सधैँ ती दुष्ट मानिसहरूको विरोधमा नै प्रार्थना गर्नेछु।
⁶ तिनीहरूका अधिकारीहरूलाई दण्ड होस्
    तब मैले सत्य बोलेको उनीहरूले बुझ्नेछन्।

⁷ मानिसहरूले खन्दै र जोत्दै जमीन वरिपरि मैला थुपारे वा फिंजाए।
    यस्तै प्रकारले, हाम्रा हड्डीहरू तिनीहरूका चिहानमा वरिपरि फिंजिएर गए।
⁸ हे परमप्रभु मेरो स्वामी, मैले तपाईंको सहायता खोजें
    म तपाईंमा भरोसा गर्छु मलाई मर्न नदिनु होस्।
⁹ दुष्ट मानिसहरूले मेरो लागि पासो थापे।
    मलाई ती पासोहरूमा फस्न नदिनुहोस्। मलाई पासोमा पर्न नदिनुहोस्।
¹⁰ ती दुष्ट मानिसहरू आफ्नै पासोमा आफैं फँसुन्
    ता कि म चाँहि त्यहाँबाट उम्कनसकुँ।

⁴ मैले वरिपरि हेरें,
    अनि म मेरो कुनै पनि साथीहरूलाई हेर्दै हेर्दिनँ।
मेरो भाग्ने ठाउँ कतै छैन।
    कसैले पनि मलाई बचाउँने प्रयास गर्दैन।
⁵ यसैले म परमप्रभुको साथ पाउनलाई रोइ-कराई गर्दछु।
    हे परमप्रभु, तपाईं मेरो सुरक्षाको ठाउँ हुनुहुन्छ।
    परमप्रभु, तपाईं मलाई अनवरत बाँच्न दिनुहोस्।
⁶ परमप्रभु, मेरो प्रार्थना सुनिदिनु होस्,
    मलाई तपाईंको अति खाँचो छ।
मलाई खेदने ती मानिसहरूबाट बचाउँनुहोस्,
    तिनीहरू मभन्दा पनि बलिया छन्।
⁷ मलाई यस फन्दाबाट छुटकारा पाउनलाई सहायता दिनुहोस्,
    ता कि म तपाईंको नाउँको प्रशंसा गर्न सकुँ,
अनि धर्मी मानिसहरू मसँग मिलेर उत्सव मनाउने छन्।
    किनभने तपाईंले मलाई हेरचाह गर्नुहुन्छ।

⁷ परमप्रभु चाँडो गरेर मलाई जवाफ दिनुहोस्।
    मैले आफ्नो आँट हराएँ।
मदेखि टाढा नभाग्नु होस्।
    मलाई मर्नबाट जोगाउनु होस् र ती मरेर चिहानमा सुतिरहेको मध्ये एउटा हुन नदिनु होस्।
⁸ परमप्रभु, आज बिहान तपाईं आफ्नो स्नेहपूर्ण करूणा मलाई देखाउनु होस्।
    म तपाईंलाई भरोसा गर्दछु,
मैले गर्नुपर्ने कुराहरू मलाई देखाउनु होस्।
    तपाईंको हातमा मैले आफ्नो जीवन अर्पण गरें।
⁹ हे परमप्रभु, म तपाईंकहाँ सुरक्षाको निम्ति आएको छु।
    मलाई मेरो शत्रुहरूबाट बचाउनु होस्।
¹⁰ तपाईंले मलाई के गर्न चाहनुहुन्छ देखाउनु होस्।
    तपाईं मेरो परमेश्वर हुनुहुन्छ।
    तपाईंको शुद्ध आत्माले मलाई सही मार्ग निर्देश गरोस्।
¹¹ हे परमप्रभु, मलाई बाँच्न दिनुहोस्,
    यसकारण मानिसहरूले तपाईंको नाउँको प्रशंसा गर्नेछन्।
तपाईं वास्तवमा धर्मी हुनुहुन्छ भनेर दर्शाउनु होस्,
    अनि मेरो शत्रुहरूबाट मलाई बचाउनु होस्।
¹² हे परमप्रभु, तपाईंको प्रेम देखाउनुहोस्,
    अनि मेरो शत्रुहरूलाई परास्त पार्नुहोस्,
जसले मलाई मार्ने प्रयास गरिरहेका छन्।
    किनभने म तपाईंको दास हुँ।

³ हे परमप्रभु, मानिसहरू तपाईंको लागि किन मुख्यछन्?
    किन तपाईं मानव जातिलाई नियाल्नुहुन्छ?
⁴ मानिसको जीवन हावाको झोंका मात्र हो।
    मानिसको जीवन अस्थायी छाँयाँ जस्तो मात्र हो।

⁵ हे परमप्रभु, आकाश च्यातेर तपाईं तलतिर झर्नुहोस्
    पर्वतहरूमा छुनुहोस् र धूवाँ त्यहाँबाट उठ्ने छ।
⁶ परमप्रभु, चट्याङ्ग पठाउनु होस् र मेरो शत्रुहरूलाई भगाउनु होस्।
    तपाईंका “काँडहरू” चलाउनु होस् र तिनीहरूलाई खेद्नुहोस्।
⁷ परमप्रभु, आकाशबाट तल झरेर मलाई बचाउनु होस्।
    मलाई शत्रुहरूका समुद्रमा डुब्नबाट बचाउनु होस्।
    मलाई ती परदेशीहरूबाट बचाउनु होस्।
⁸ ती शत्रुहरू झूटाहरू हुन्।
    तिनीहरूले जे कुरा गर्छन् तिनीहरू सत्य छैनन्।

⁹ हे परमप्रभु, तपाईंले गर्नु भएका आश्चर्यजनक,
कुराहरूका बारेमा म एक नयाँ गीत गाउने छु।
    म तपाईंको स्तुति-गान गर्नेछु अनि दशतारे वीणा बजाउने छु।
¹⁰ परमप्रभुले नै राजाहरूलाई युद्ध जित्नलाई सघाउनु भयो।
    परमप्रभुले आफ्ना दास दाऊदलाई शत्रुहरूका तरवारहरूबाट बचाउनु भयो।
¹¹ मलाई ती विदेशीहरूबाट बचाउनु होस्।
    ती शत्रुहरू झूटा छन्।
    तिनीहरूले भनेका कुराहरू असत्य छन्।

¹² हाम्रा जवान छोराहरू बलिया रूखहरू जस्ता छन्।
    हाम्रा छोरीहरू राजाको दरबारमा सजिएको सजावट जस्ता छन्।
¹³ हाम्रो भण्डारहरू बिभिन्न प्रकारका अन्नहरूले भरिएका छन्।
    हाम्रा भेंडाहरूले प्रसस्त पाठाहरू जन्माउँछन्।
त्यहाँ हाम्रो खेतहरूमा हजारौं-हजार भेंडाहरू होस्।
¹⁴     हाम्रा गाईहरूले प्रशस्तै बाछा-बाछीहरू पाउनेछन्।
हाम्रा शत्रुहरूले हाम्रा पर्खाल भत्काउन सक्ने छैनन्,
    र हाम्रा एक जना मानिस पनि लानपाउने छैनन्।
    हाम्रा गल्लीहरूमा रूवा़-बासी हुनेछैन।

¹⁵ साँच्चो आशिष पाउनु कति असल कुरा हो।
    यदि परमप्रभु नै उनीहरूको परमेश्वर हुनुहुन्छ भने,
    ती मानिसहरू आशिषित हुन्छन्।

⁸ परमप्रभु अनुग्रही र दयाले भरिपूर्ण हुनुहुन्छ।
    परमप्रभु धीरजी र मायालु हुनुहुन्छ।
⁹ परमप्रभु प्रत्येक मानिसको लागि असल हुनुहुन्छ।
    परमेश्वरले बनाउनु भएको प्रत्येक कुरामाथि आफ्नो दया देखाउनु हुन्छ।
¹⁰ परमप्रभु, जुन कुराहरू तपाईंले गर्नुभयो त्यसले तपाईंको प्रशंसा ल्याउँदछ।
    तपाईंका भक्तजनहरूले तपाईंको गुण गाउँछन्।
¹¹ तिनीहरूले भन्छन्, तपाईंको राज्य कति महान् छ।
    तिनीहरूले भन्छन् तपाईं कति महान् हुनुहुन्छ।
¹² परमप्रभु, यसकारण अन्य मानिसहरूले तपाईंले गर्नु भएका महान् कार्यहरूका विषयमा सिक्नेछन्।
    मानिसहरूले तपाईंको राज्य कति महान् र आश्चर्यपूर्ण छ भनेर सिक्नेछन्।
¹³ परमप्रभु, तपाईंको राज्य सदा-सर्वदा रहनेछ।
    तपाईंको प्रभुत्व सदा-सर्वदा रहिरहनेछ।

¹⁴ पतन भएका मानिसहरूलाई परमप्रभुले उठाउनु हुन्छ।
    परमप्रभु जो सङ्कटहरूमा पर्दछन् उनीहरूलाई सघाउनु हुन्छ।
¹⁵ परमप्रभु, सम्पूर्ण जीवित प्राणीहरूले आफ्नो भोजनको लागि तपाईंलाई नै खोज्दछन्
    अनि तपाईंले तिनीहरूलाई ठीक समयमा नै आहार दिनुहुन्छ।
¹⁶ परमप्रभु, तपाईं आफ्ना हातहरू खुल्ला पार्नुहोस्
    अनि तपाईंले प्रत्येक जीवित प्राणीहरूलाई उनीहरूको आवश्यकता अनुसार सबै थोकहरू दिनुहोस्।
¹⁷ परमप्रभुले गर्नुभएको प्रत्येक कुरा धार्मिक अनि उचित छ।
    प्रत्येक कुराहरूबाट उहाँ कति भलो हुनुहुन्छ, भन्ने दर्शन्छ।
¹⁸ जसले परमप्रभुको साथ माग्छ उहाँ ती प्रत्येकको नजीक हुनुहुन्छ।
    जसले परमप्रभुलाई साँच्चो मनले पूज्दछ उहाँ ती प्रत्येकको नजीक हुनुहुन्छ।
¹⁹ परमप्रभुले त्यही गर्नुहुन्छ जो भक्तजनहरूले चाहन्छन्।
    परमप्रभुले उहाँका भक्तजनहरूले सहायताको निम्ति गरेको पुकार सुन्नु हुन्छ।
    उहाँले उनीहरूको प्रार्थनालाई जवाफ दिनुहुन्छ र तिनीहरूलाई बचाउनुहुनेछ।
²⁰ जसले उहाँलाई प्रेम गर्दछ परमप्रभुले तिनीहरूकै रक्षा गर्नुहुन्छ
    तर परमप्रभुले दुष्ट मानिसहरूलाई नष्ट गर्नुहुन्छ।
²¹ म परमप्रभुको प्रशंसा गर्नेछु!
    म, प्रत्येकले सदा-सर्वदा र अनन्त उहाँको प्रशंसा गरेको चाहन्छु।

¹ परमप्रभुको प्रशंसा गरौं!
    हे मेरो प्राण, परमप्रभुको प्रशंसा गर!
² जीवनभरि नै म परमप्रभुको गुणगान गर्नेछु
    जीवनभरि नै म उहाँ प्रति प्रशंसाको गीत गाउने छु।
³ साथ पाउनलाई तिमीहरूको अगुवामाथि आश्रित नबन मानिसहरूलाई भरोसा नगर।
    किनभने मानिसहरूले तिमीलाई बचाउन सक्दैनन्।
⁴ मानिसहरू मर्दछन् र गाडिन्छन्,
    अनि तब, तिनीहरूका सबै योजनाहरू र सहयोगहरू जान्छन्।
⁵ तर मानिसहरूले जसले परमप्रभुको साथ माग्दछन् तिनीहरू सुखी छन्।
    ती मानिसहरू आफ्ना परमप्रभु परमेश्वरमा आश्रित छन्।
⁶ परमप्रभुले स्वर्ग अनि पृथ्वी बनाउनु भयो।
    परमप्रभुले समुद्र र त्यहाँ भएका प्रत्येक कुरा रच्नु भयो।
परमप्रभुले तिनीहरूलाई सधैँ रक्षा गर्नुहुन्छ।
⁷ दबिएका मानिसहरूको निम्ति परमेश्वर न्याय गराउनु हुन्छ।
    परमप्रभुले भोकाहरूलाई भोजन दिनु भयो।
कैदमा थुनिएकाहरूलाई स्वतन्त्र पार्नुभयो।
⁸     परमप्रभुले अन्धाहरूलाई फेरि देख्ने शक्ति दिनुभयो।
परमप्रभुले ती मानिसहरूलाई साथ दिनुहुन्छ जो सङ्कटमा परेका छन्।
    परमप्रभुले धर्मी मानिसहरूलाई प्रेम गर्नुहुन्छ।
⁹ परमप्रभुले परदेशीहरूलाई हाम्रो देशमा रक्षा गर्नुहुन्छ।
    परमप्रभुले विधवाहरू र टुहुरा-टुहुरीहरूलाई हेरचाह गर्नुहुन्छ
    तर परमप्रभुले दुष्ट मानिसहरूलाई नाश गर्नुहुन्छ।
¹⁰ परमप्रभुले सधैँको निम्ति राज्य गर्नुहुनेछ
    हे सियोन! तेरा परमेश्वरले सदा-सर्वदा राज्य गर्नुहुनेछ।

परमप्रभुको प्रशंसा गरौं!

¹ परमप्रभुको प्रशंसा गर किनभने उहाँ असल हुनुहुन्छ।
    परमप्रभुप्रति स्तुतिगान गर!
    उहाँको गुण-गान गर्नु आनन्दमय र असल हो।
² परमप्रभुले यरूशलेम बनाउनु भयो।
    परमेश्वरले इस्राएल वासीहरूलाई फेरि फर्काई ल्याउनु भयो,
    जसलाई कैदी बनाएर थुनिएको थियो।
³ परमेश्वरले तिनीहरूको टुक्रीएको हृदय निको पारिदिनु हुन्छ।
    तिनीहरूका घाउहरूमा मलमपट्टी बाँधिदिनुहुन्छ।
⁴ परमेश्वरले ताराहरू गन्नुहुन्छ,
    र ती प्रत्येकको नाउँ जान्नुहुन्छ।
⁵ हाम्रो स्वामी महान् हुनुहुन्छ,
उहाँ अत्यन्त पराक्रमी हुनुहुन्छ।
    उहाँको ज्ञान अपार छ।
⁶ परमप्रभु नम्र मानिसहरूलाई सघाउनु हुन्छ
    तर दुष्ट मानिसहरूलाई सताउनु हुन्छ।
⁷ परमप्रभुलाई धन्यवाद होस्।
    हाम्रो परमप्रभुलाई वीणा बजाएर प्रशंसा गरौं।
⁸ परमेश्वरले आकाश बादलहरूले भरिदिनु हुन्छ।
    परमेश्वरले पृथ्वीमा बर्षा पठाउनु हुन्छ
    परमेश्वरले पर्वतहरूमा हरियो घाँसहरू उमार्नु हुन्छ।
⁹ परमेश्वरले पशुहरूलाई खाना दिनुहुन्छ।
    परमेश्वरले चराहरूलाई खुवाउनु हुन्छ।
¹⁰ युद्धका घोडाहरूले र शक्तिशाली सैन्यहरूले
    उहाँलाई खुशी पार्दैन।
¹¹ परमप्रभु ती मानिसहरू सित आनन्दित हुनुहुन्छ,
जसले उहाँलाई पूज्दछन्।
    परमप्रभु ती मानिसहरूसँग खुशी हुनुहुन्छ,
    जसले उहाँको प्रेममा भरोसा राख्छन्।
¹² हे यरूशलेम! परमप्रभुको प्रशंसा गर!
    हे सियोन! आफ्ना परमप्रभुको प्रशंसा गर।
¹³ यरूशलेम, परमेश्वरले तिम्रा प्रवेशद्वारहरू बलियो बनाइदिनु भयो।
    अनि परमेश्वरले तिम्रो शहरका मानिसहरूलाई आशीर्वाद दिनुभयो।
¹⁴ परमेश्वरले तिमीहरूलाई आफ्नो देशमा ल्याईदिनु भयो।
    यसैले शत्रुहरूले तिमीहरूका अन्नहरू युद्धमा लगेनन्।
    अनि तिमीहरूसँग प्रशस्त खाद्य-पदार्थहरू छन्।
¹⁵ परमेश्वरले पृथ्वीलाई आदेश दिनुभयो,
    यसले तुरन्तै पालन गर्यो।
¹⁶ जबसम्म धर्ती ऊन जस्तो सेतो हुँदैन परमेश्वरले हिम बर्षा गराउनु हुन्छ।
    परमेश्वरले हावाबाट धूलोको कण खसे झैं हिमपात बर्षाउनु हुन्छ।
¹⁷ परमेश्वरले आकाशबाट चट्टानहरू झैं असिना बर्षाउनु हुन्छ।
    उहाँले पठाएको चिसो कसैले पनि थाम्न सक्तैन।
¹⁸ त्यसपछि, परमेश्वरले अर्को आज्ञा गर्नुभयो,
अनि फेरि तातो बतास बहन थाल्यो
    हिउँ पग्लियो अनि पानी बग्न थाल्यो।

¹⁹ परमेश्वरले आज्ञाहरू याकूबलाई दिनुभयो,
    परमेश्वरले आफ्ना नियमहरू र कानूनहरू इस्राएललाई दिनुभयो।
²⁰ परमेश्वरले यस्ता कामहरू कुनै जातिको लागि गर्नु भएन।
    परमेश्वरले अन्य जातिहरूलाई आफ्नो नियमहरू सिकाउनु भएन।

परमप्रभुको प्रशंसा गर!

¹ परमप्रभुको प्रशंसा गर!

माथि स्वर्गमा भएका स्वर्गदूतहरू हो।
    परमप्रभुको प्रशंसा गर।
² हे सारा स्वर्गदूतहरू हो, परमप्रभुको प्रशंसा गर!
    उहाँ र उहाँका सारा सैन्यहरूका प्रशंसा गर!
³ हे सूर्य र चन्द्र, परमप्रभुको प्रशंसा गर।
    आकाशमा भएका ताराहरू र ज्योतिहरू, उहाँको प्रशंसा गर।
⁴ हे आकाशका आकाश, परमप्रभुको प्रशंसा गर!
    आकाशमाथि भएका पानी हो, परमप्रभुको प्रशंसा गर!
⁵ परमप्रभुको प्रशंसा गर!
    किनभने परमेश्वरले आज्ञा दिनुभयो अनि सबैको सृजना भयो।
⁶ परमेश्वरले यी सब कुराहरू सदा-सर्वदा रहोस् भनी रच्नुभयो।
    परमेश्वरले सारा नियमहरू बनाउनुभयो जुन कहिल्यै अन्त हुने छैनन्।
⁷ हे पृथ्वीमा भएका सारा कुराहरू हो, परमप्रभुको प्रशंसा गर!
    समुद्रमा भएका सारा ठूल-ठूला प्राणीहरू हो, परमप्रभुको प्रशंसा गर।
⁸ परमेश्वरले आगो र हिउँ,
    असिना, धुँवा, आँधी, बतास रच्नुभयो।
⁹ परमेश्वरले पर्वतहरू र डाँडा-काँडाहरू रचना गर्नुभयो,
    फलका रूखहरू र देवदारको रूखहरू रच्नुभयो।
¹⁰ परमेश्वरले सारा जङ्गली पशुहरू, विशाल पशुहरू,
    साना-साना घस्रने जन्तुहरू साथै चरा-चरूङ्गीहरू रच्नु भयो।
¹¹ परमेश्वरले राजा र राष्ट्रहरू दुवै पृथ्वीमा बनाउनु भयो।
    परमेश्वरले अगुवाहरू र न्याय कर्ताहरू बनाउनु भयो।
¹² परमेश्वरले जवान पुरूष र नारीहरू रच्नु भयो।
    परमेश्वरले बृद्ध र युवा मानिसहरू रच्नु भयो।
¹³ परमप्रभुको नाउँको प्रशंसा गर!
    सदा-सर्वदा उहाँको नाउँको सम्मान गर।
स्वर्ग र पृथ्वीमा भएको प्रत्येक चीजले
    उहाँको प्रशंसा गरोस्!
¹⁴ परमेश्वरले आफ्ना मानिसहरूलाई बलियो बनाउनु हुनेछ।
    मानिसहरूले परमेश्वरका चेलाहरूको प्रशंसा गर्नेछन्।
    मानिसहरूले इस्राएललाई प्रशंसा गर्नेछन्।
तिनीहरूकै लागि परमेश्वरले लड्नु भयो, परमप्रभुको प्रशंसा गरौं!

¹ परमप्रभुको प्रशंसा गर।

परमप्रभुले रच्नु भएको नयाँ कुराहरूको बारेमा नयाँ गीत गाऊ!
    महासभामा उहाँको प्रशंसा गर जहाँ उहाँका चेलाहरू आपसमा भेला हुँदछन्।
² इस्राएल का मानिसहरूले आफ्नो सृष्टिकर्तामा आनन्दित होऊन्।
    सियोनका मानिसहरू आफ्ना राजा सहित प्रफुल्लित होऊन्।
³ ती मानिसहरूले नाच्दै खैंजडी र वीणाहरू बजाँउदै,
    परमप्रभु परमेश्वरको प्रशंसा गरून्।
⁴ परमप्रभु उहाँका मानिसहरूसँग खुशी हुनुहुन्छ।
    परमेश्वरले आफ्ना नम्रहरूको लागि आश्चर्यजनक कामहरू गर्नुभयो।
    उहाँले तिनीहरूलाई बचाउनु भयो!
⁵ हे परमेश्वरका चेलाहरू! आफ्नो विजयमा प्रफुल्लित होऊ।
    सुत्न गइसके पश्चात् पनि खुसी होऊ।

⁶ मानिसहरूले चिच्याउँदै, कराउँदै परमप्रभुको प्रशंसा गरून्
    अनि आफ्ना तरवारहरू हातमा लिऊन्।
⁷ आफ्ना शत्रुहरूलाई सजाई दिन तिनीहरूलाई जान देऊ।
    ती मानिसहरूलाई दण्ड दिन, तिनीहरूलाई जान देऊ।
⁸ परमेश्वरका मानिसहरूले ती राजा,
    र प्रमुख मानिसहरूलाई साङ्गलाले बाँध्नेछन्।
⁹ परमेश्वरका मानिसहरूले तिनीहरूलाई दण्ड दिनेछन्
    परमेश्वरले गर्नु भएको आज्ञा जस्तै,
    परमेश्वरका सारा भक्तजनहरूले उहाँलाई सम्मान गर।

परमप्रभुको प्रशंसा गर!

¹ परमप्रभुको प्रशंसा गर!

परमप्रभुलाई उहाँको मन्दिरमा प्रशंसा गर!
    उहाँको शक्तिको स्वर्गमा प्रशंसा गर!
² परमप्रभुले गर्नु भएको महान् कार्यहरूका निम्ति उहाँको प्रशंसा गर।
    उहाँको सारा महानता अनुसार, उहाँको प्रशंसा गर!
³ नरसिंङ्गा र तुरही फुकेर परमेश्वरको प्रशंसा गर!
    वीणाहरू बजाएर उहाँको प्रशंसा गर।
⁴ खैंजडीहरू बजाउँदै नाच्दै परमेश्वरको प्रशंसा गर।
    तारहरूले बनिएको वादनद्वारा उहाँको प्रशंसा गर।
    बाँसुरीहरू बजाएर उहाँको प्रशंसा गर!
⁵ झ्यालीहरू जोड-जोडले बजाएर परमेश्वरको प्रशंसा गर!
    झ्यालीहरूको गर्जनपूर्ण आवाजले उहाँको प्रशंसा गर!

⁶ प्रत्येक जीवित प्राणीले उहाँको प्रशंसा गर।

परमप्रभुको प्रशंसा गर!